រដ្ឋបាលរាជធានីភ្នំពេញ ប្រកាសផ្អាកសកម្មភាពការងារ មុខរបរ ឬអាជីវកម្មដែលមានហានិភ័យខ្ពស់នៃការឆ្លងជំងឺកូវីដ-១៩ និងការជួបជុំមនុស្សមិនឱ្យលើសពី១៥នាក់ ជាបណ្តោះអាសន្នរយៈពេល១៤ថ្ងៃ។
ក្នុងសេចក្ដីសម្រេចរបស់រដ្ឋបាលរាជធានីភ្នំពេញ ចុះថ្ងៃទី០២ ខែមិថុនា ឆ្នាំ២០២១ ឱ្យដឹងថា សកម្មភាពការងារ មុខរបរ ឬអាជីវកម្មដែលមានហានិភ័យខ្ពស់នៃការឆ្លងរាលដាលជំងឺកូវីដ-១៩ មានសាលារៀន រួមទាំងសាលាបណ្តុះបណ្តាលវិជ្ជាជីវៈទាំងរដ្ឋនិងឯកជន លើកលែងតែសាលារៀនដែលបណ្តុះបណ្តាលតាមប្រព័ន្ធអនឡាញ ត្រូវបានផ្អាកជាបណ្តោះអាសន្ន។
ក្រៅពីសាលារៀន ក៏មានអាជីវកម្មក្លឹបកម្សាន្តគ្រប់ប្រភេទ ដូចជា ខារ៉ាអូខេ រង្គសាល ឌីស្កូតែក បៀហ្គាឌិន និងកាស៊ីណូ ខណៈរមណីយដ្ឋាន សារមន្ទីរ និងសួនកម្សាន្តនានា និងអាជីវកម្មម៉ាស្សា រោងភាពយន្ត រោងសម្តែងសិល្បៈ ក្លឹបហាត់ប្រាណ និងមជ្ឈមណ្ឌលកីឡា។
រដ្ឋបាលរាជធានីភ្នំពេញ ក៏ប្រកាសមិនអនុញ្ញាតឱ្យមានការជួបជុំឬប្រមូលផ្តុំមនុស្សជាលក្ខណៈឯកជនលើសពី១៥នាក់ នៅក្នុងភូមិសាស្ត្ររាជធានីភ្នំពេញ ដោយវិធានការនេះត្រូវអនុវត្តរយៈពេល១៤ថ្ងៃ គិតចាប់ពីថ្ងៃទី៣ រហូតដល់ថ្ងៃទី១៦ ខែមិថុនា ឆ្នាំ២០២១។
បើតាមរដ្ឋបាលរាជធានីភ្នំពេញ អាជ្ញាធរនឹងពិនិត្យសម្រេចផ្អាកសកម្មភាពការងារ មុខរបរ និងអាជីវកម្មផ្សេងទៀត ទៅតាមស្ថានភាពវិវត្តជាក់ស្តែង ដោយអនុលោមតាមតម្រូវការចាំបាច់ក្នុងការប្រយុទ្ធនិងទប់ស្កាត់ការឆ្លងរាលដាលនៃជំងឺកូវីដ-១៩។
វីអូឌី មិនអាចសុំការបញ្ជាក់បន្ថែមពីខាងអភិបាលរាជធានីភ្នំពេញ លោក ឃួង ស្រេង បានទេ ដោយលោកថាជាប់រវល់ប្រជុំ។
កាលពីថ្ងៃទី២៨ ខែឧសភា ឆ្នាំ២០២១ រដ្ឋលេខាធិការ និងជាអ្នកនាំពាក្យក្រសួងសុខាភិបាល លោកស្រី ឱ វណ្ណឌីន មានប្រសាសន៍ថា ទោះបីការបិទខ្ទប់នៅរាជធានីភ្នំពេញត្រូវបានបញ្ចប់ហើយក្ដី ហើយតំបន់លឿងទុំក៏រួមតូច ខណៈតំបន់ក្រហមក៏លែងមានពិតមែន ប៉ុន្តែករណីឆ្លងជំងឺកូវីដ-១៩ នៅតែរកឃើញជារៀងរាល់ថ្ងៃនិងមានចំនួនខ្ពស់ទៀតផង។
លោកស្រីបញ្ជាក់ថា ការចម្លងមេរោគកូវីដ-១៩ នៅតែខ្លាំងក្លានៅឡើយ ដែលមិនទាន់មានសញ្ញាណាបង្ហាញថា វាមានការចុះថមថយនៅឡើយទេ។
អ្នកស្រាវជ្រាវការអភិវឌ្ឍសង្គម លោកបណ្ឌិត មាស នី ចាត់ទុកវិធានការរបស់អាជ្ញាធររាជធានីភ្នំពេញ ថាជារឿងបច្ចេកទេសមួយត្រឹមត្រូវ ដោយថា ស្ថានភាពពេលនេះពុំមានជម្រើសល្អណាផ្សេងក្រៅពីការបើកនិងបិទបែបនេះទេ។
លោកបន្តថា បើសិនជារដ្ឋាភិបាលដាក់វិធានការបែបនេះ រដ្ឋគួរមានការទទួលខុសត្រូវនិងធានាឱ្យបានការទំនុកបម្រុងជីវភាពអ្នកធ្វើការនិងអ្នកប្រកបរបរអាជីវកម្មទាំងនោះ ក្រោយពីពួកគេបាត់បង់ការងារ ជាពិសេសក្នុងពេលផ្អាកសកម្មភាពបណ្ដោះអាសន្ននេះ។
លោកបណ្ឌិត មាស នី បញ្ជាក់ថា៖ «[បញ្ហាការឆ្លងនៅតែបន្តកើនឡើង] រឿងនេះមិនអាចហុចឬបញ្ជូនកំហុសទៅថា [ប្រជាពលរដ្ឋមិនសហការ ឬអាជ្ញាធរអនុវត្តនៅមានការខ្វះចន្លោះ] បានឡើយ ព្រោះជំងឺនេះ វាដល់ដំណាក់កាលមួយ ដែលយើងលែងអាចគ្រប់គ្រងវាបានមាំទាំដូចមុនហើយ ដែលយើងត្រូវអង្គុយពិភាក្សារកដំណោះស្រាយគ្រប់កន្លែងហ្នឹងតែម្ដង។ អ៊ីចឹងរឿងការបិទហើយការផ្អាកនេះជាវិធានធម្មតាដែលត្រូវតែធ្វើហើយ ប៉ុន្ដែពេលបិទនិងផ្អាកនេះ ថាមានការជជែកគ្នារវាងវិស័យរដ្ឋនិងឯកជន ថាតើត្រូវជួយសង្គ្រោះយ៉ាងម៉េចទៅដល់គ្នាអ្នកទទួលរងផលប៉ះពាល់ធ្ងន់ធ្ងរ ដោយសារការបិទផ្អាកនេះជារឿងសំខាន់»។
វិធានការផ្អាកសកម្មភាពការងារ មុខរបរ និងអាជីវកម្ម រយៈពេល១៤ថ្ងៃ ដែលចេញដោយរដ្ឋបាលរាជធានីភ្នំពេញនេះ ធ្វើឡើងស្របពេលចំនួនអ្នកឆ្លងជំងឺកូវីដ-១៩ មួយរយៈពេលចុងក្រោយមានការកើនឡើងវិញ ខណៈចំនួនអ្នកស្លាប់ ដោយសារជំងឺនេះក៏កើនឡើងដែរ។
បើតាមក្រសួងសុខាភិបាល គិតត្រឹមព្រឹកថ្ងៃទី៣ ខែមិថុនា ឆ្នាំ២០២១ កម្ពុជារកឃើញអ្នកឆ្លងជំងឺកូវីដ-១៩ សរុប៣២ ១៨៩នាក់ ក្នុងនោះ ករណីនាំចូលពីក្រៅប្រទេសសរុប៩៩៤នាក់។ ចំណែកអ្នកស្លាប់មានចំនួនកើនឡើងដល់២៣៦នាក់ និងអ្នកជំងឺព្យាបាលជាសះស្បើយសរុបមានចំនួន២៤ ៧៦៣នាក់៕