អ្នកជំងឺ៦នាក់បន្ថែមទៀតបានស្លាប់ដោយសារជំងឺកូវីដ-១៩ ដែលធ្វើឱ្យចំនួនអ្នកស្លាប់សរុបកើនឡើងដល់ជាង២៤០នាក់ ស្របពេលអ្នកឆ្លងថ្មីមានជិត៩០០នាក់ទៀត ដែលធ្វើឱ្យអ្នកឆ្លងសរុបនៅកម្ពុជាកើនឡើងជាង៣៣ ០០០នាក់។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី០៤ ខែមិថុនា ឆ្នាំ២០២១ ឱ្យដឹងថា អ្នកស្លាប់ដោយសារជំងឺកូវីដ-១៩ កាលពីថ្ងៃម្សិលមិញ មានចំនួន៦នាក់ និងករណីឆ្លងថ្មីមានចំនួន៨៨៦នាក់ ខណៈអ្នកជាសះស្បើយថ្មីមានចំនួន៧៨១នាក់។
បើតាមតួលេខពីក្រសួងសុខាភិបាល គិតត្រឹមព្រឹកថ្ងៃសុក្រនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន៣៣ ០៧៥នាក់ ក្នុងនោះ អ្នកជំងឺជាសះស្បើយសរុបមានចំនួន២៥ ៥៤៤នាក់ ព្រមទាំងចំនួនអ្នកស្លាប់សរុប២៤២នាក់ និងករណីនាំចូលពីក្រៅប្រទេសសរុប៩៩៤នាក់៕