សមាគមសេរីភាពអ្នកសារព័ត៌មានកម្ពុជា ស្វែងរកកិច្ចអន្តរាគមន៍ ដើម្បីឱ្យអ្នកកាសែត៨នាក់ដែលតុលាការខេត្តព្រះវិហារចាប់ឃុំខ្លួននោះ បាននៅក្រៅឃុំបណ្តោះអាសន្ន ក្រោយពីពួកគេរងការចោទពីបទកំហែងយក ប៉ុន្តែការដាក់បន្ទុកនោះតុលាការមិនទាន់បានបញ្ជាក់នៅឡើយ។
អ្នកសារព័ត៌មានចំនួន៨នាក់ ក្នុងនោះមានទាំងស្ត្រី២នាក់ផង ត្រូវបានសមត្ថកិច្ចស្រុកត្បែងមានជ័យ ចាប់ខ្លួនកាលពីថ្ងៃសុក្រ ដោយចោទពីបទ «កំហែងយក» បន្ទាប់ពីពួកគេរងការចោទថា បានជំរិតទារប្រាក់ក្នុងម្នាក់ចំនួន១០០ដុល្លារ ពីម្ចាស់សិប្បកម្មឈើមួយកន្លែងនៅចំណុចអូរទីទុយ ភូមិក្រាំងដូង ឃុំព្រះឃ្លាំង ស្រុកត្បែងមានជ័យ ខេត្តព្រះវិហារ។ ក្រោយមក តុលាការខេត្តនេះសម្រេចឱ្យឃុំខ្លួនបណ្តោះអាសន្ននៅពន្ធនាគារ។
ប្រធានសមាគមសេរីភាពអ្នកសារព័ត៌មានកម្ពុជា លោក ទេស វិបុល ឱ្យដឹងនៅថ្ងៃពុធនេះថា កាលពីថ្ងៃទី៥ ខែមិថុនា លោកបានដាក់លិខិតចំនួន២ដាច់ដោយឡែកពីគ្នា ដោយលិខិតមួយដាក់ទៅអាជ្ញាធរខេត្ត និងមួយទៀតដាក់ទៅព្រះរាជអាជ្ញា ដើម្បីរកការសម្របសម្រួលឱ្យអ្នកកាសែតទាំង៨នាក់នោះបាននៅក្រៅឃុំបណ្តោះអាសន្ន ក្នុងនាមអ្នកប្រកបអាជីពដូចគ្នា។
លោកថា៖ «អ្វីដែលគេដាក់បន្ទុកគាត់ហ្នឹង គេចោទពីបទកំហែងយក ក៏ប៉ុន្តែយើងមិនទាន់ដឹងថា ការកំហែងយកនោះរបៀបម៉េចឱ្យច្បាស់លាស់នៅឡើយទេ ហើយនរណាជាអ្នកប្តឹង[ក៏មិនទាន់ដឹង]នៅឡើយដែរ។ អ៊ីចឹង បងកំពុងតែបន្តនីតិវិធីរបស់អ្នកសារព័ត៌មានយើង ដើម្បីស្វែងរកអំពីមូលហេតុពិតនិងអ្វីដែលគេបានប្តឹងផ្តល់ហ្នឹង»។
អភិបាលខេត្តព្រះវិហារ លោក ប្រាក់ សុវណ្ណ មិនអាចទាក់ទងបានទេ នៅថ្ងៃនេះ។
ប៉ុន្តែព្រះរាជអាជ្ញាអមសាលាដំបូងខេត្តព្រះវិហារ លោក ទី សុវិនថាល់ មានប្រសាសន៍ថា លោកបានឃើញលិខិតនោះហើយ តែថាលោកមិនមានសិទ្ធិក្នុងការអន្តរាគមន៍ដោះលែងជនត្រូវចោទទាំងនោះទេ។
លោកថា៖ «ខ្ញុំបានបញ្ជូនទៅប្រធានសាលាដំបូងហើយ ដើម្បីឱ្យគាត់ដាក់នៅក្នុងសំណុំរឿង ថាតើចៅក្រម[ស៊ើប]ពិចារណាឬក៏អត់! ព្រោះខ្ញុំមើលទៅ គ្មានគុណសម្បត្តិក្នុងនីតិវិធី»។
ប្រធានសាលាដំបូងខេត្តព្រះវិហារ លោក យុត ពន្លឺ មានប្រសាសន៍ថា លោកមិនទាន់ឃើញលិខិតនេះនៅឡើយទេ ប៉ុន្តែថាលិខិតសុំអន្តរាគមន៍គ្មានមូលដ្ឋានច្បាប់ក្នុងការដោះលែងជនត្រូវចោទឱ្យនៅក្រៅឃុំទេ វាលើកលែងតែមានលិខិតស្នើសុំនៅក្រៅឃុំបណ្តោះអាសន្នពីសំណាក់មេធាវី ឬជនត្រូវចោទផ្ទាល់ ឬក៏ប្រធានពន្ធនាគារ។
លោកថា៖ «ការនៅក្រៅឃុំហ្នឹង មិនមែនលិខិតអន្តរាគមន៍ហ្នឹង គេឱ្យនៅក្រៅឃុំទេ! តាមច្បាប់ ចៅក្រមស៊ើបសួរទាល់តែមានលិខិតសុំនៅក្រៅឃុំ។ សុំនៅក្រៅឃុំហ្នឹង យើងមានលក្ខខណ្ឌអីបំពេញបានខ្លះ គេឃុំយើងមានប៉ុន្មានលក្ខខណ្ឌ មានលក្ខខណ្ឌអីខ្លះ បើយើងបំពេញលក្ខខណ្ឌហ្នឹងបានមួយចំនួនឬបានទាំងអស់ អាហ្នឹងគេឱ្យយើងនៅក្រៅឃុំហើយ»។
VOD មិនអាចស្វែងរកប្រភពទាក់ទងក្រុមគ្រួសារអ្នកសារព័ត៌មានទាំងនោះ ឬមេធាវីការពាក្តីបាននៅឡើយទេ។
យ៉ាងណា អ្នកសម្របសម្រួលសមាគមការពារសិទ្ធិមនុស្សអាដហុកប្រចាំខេត្តព្រះវិហារ លោក ឡោ ចាន់ ឱ្យដឹងកាលពីថ្ងៃចន្ទថា អ្នកសារព័ត៌មានទាំង៨រូបនេះ ត្រូវបានព្រះរាជអាជ្ញារងសាលាដំបូងខេត្ត លោក គឹម សំលេង ដឹកនាំកម្លាំងចុះចាប់ដោយផ្ទាល់ តាមបណ្តឹងរបស់ម្ចាស់សិប្បកម្មឈើមួយកន្លែងនៅឃុំក្រាំងដូង។
លោកបានរៀបរាប់ពីដើមចមនៃការចាប់ខ្លួនអ្នកសារព័ត៌មានទាំងនោះថា ដំបូងឡើយ មានអ្នកសារព័ត៌មានមកពីអង្គភាពចំនួន៤ទៀតបានទៅជួបម្ចាស់សិប្បកម្មឈើមួយកន្លែង ហើយបានត្រឡប់ចេញទៅវិញក្រោយពីម្ចាស់សិប្បកម្មឈើនោះ ផ្តល់លុយក្នុងម្នាក់១៥០ ០០០រៀល ។
លោកបន្តថា ក្រោយពីអ្នកសារព័ត៌មានមកពីអង្គភាពទាំង៤នោះត្រឡប់ទៅវិញ អ្នកសារព័ត៌មានចំនួន៨នាក់នេះក៏បាននាំគ្នាទៅដល់សិប្បកម្មឈើនោះដែរ ហើយបានទារប្រាក់ពីម្ចាស់សិប្បកម្មឈើនោះ ក្នុងម្នាក់១០០ដុល្លារ តែម្ចាស់សិប្បកម្មមិនព្រម ដោយសុំផ្តល់ឱ្យត្រឹមតែ២០០ ០០០រៀល សម្រាប់អ្នកសារព័ត៌មានម្នាក់។
លោកបន្តទៀតថា ដោយសារការចរចាតម្លៃមិនត្រូវគ្នា ទើបម្ចាស់សិប្បកម្មនោះដាក់ពាក្យប្តឹង ដែលឈានដល់ការចាប់ខ្លួនអ្នកសារព័ត៌មានទាំង៨នាក់នោះតែម្តង។
ទោះយ៉ាងណា លោក ឡោ ចាន់ ចង់ឃើញស្ថាប័នពាក់ព័ន្ធរកការពិតឱ្យឃើញ ថាហេតុអ្វីបានជាម្ចាស់សិប្បកម្មឈើមួយនេះផ្តល់លុយទៅអ្នកឱ្យអ្នកសារព័ត៌មានទាំងនោះ។
លោកថា៖ «ចុះបើអ្នកឯងអត់មានបទល្មើស ហេតុអ្វីបានអ្នកឯងចាំបាច់ឱ្យលុយគេ? ហើយថា បើម្នាក់៥០ដុល្លារ ៨នាក់ វាអស់៤០០ដុល្លារ! អាមុន៦០០ ០០០រៀល ផ្សេង៤នាក់ហើយ! អានេះ ៤០០ដុល្លារទៀត! វាឡើងប៉ុន្មានហើយ? គាត់សុខចិត្តចំណាយលុយលានៗធ្វើអីបើគាត់មិនខុសផងហ្នឹង! ដូចខ្ញុំអ៊ីចឹង អាណាមកសុំៗទៅ បើខ្ញុំមិនឱ្យ ចុះផ្សាយអីចុះទៅ»។
កាលពីដើមឆ្នាំនេះ ស្ថាប័នចំនួន៤ រួមមាន សម្ព័ន្ធអ្នកសារព័ត៌មានកម្ពុជា (ខេមបូចា) មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) ក្លឹបអ្នកសារព័ត៌មានបរទេសនៃកម្ពុជា និងសហព័ន្ធអ្នកសារព័ត៌មានអន្តរជាតិ បានកត់សម្គាល់ឃើញថា ចាប់ពីខែមករា ដល់ខែតុលា ឆ្នាំ២០២០ អ្នកសារព័ត៌មានចំនួន៥៩នាក់បានទទួលរងនូវការធ្វើទុក្ខបុកម្នេញក្នុងរូបភាពផ្សេងៗ រួមមាន ការប្រើអំពើហិង្សា ការចាប់ខ្លួន និងការរងបណ្តឹងពីតុលាការ។ ក្នុងនោះ មានអ្នកសារព័ត៌មានចំនួន២៧នាក់ត្រូវបានចាប់ខ្លួន ៧នាក់ជាជនរងគ្រោះនៃការប្រើអំពើហិង្សា និងម្នាក់បានស្លាប់៕
