ពលរដ្ឋចំនួន២៤គ្រួសារ នៅភូមិតានី ឃុំរុនតាឯក ស្រុកបន្ទាយស្រី ខេត្តសៀមរាប ស្នើជាថ្មីដល់អាជ្ញាធរជាតិអប្សរាដោះស្រាយបញ្ហាដីធ្លីរបស់ពួកគាត់ ដោយផ្តល់សំណងសមរម្យ។
លោក នឿម សាណន អះអាងជាតំណាងពលរដ្ឋចំនួន២៤គ្រួសារនោះ បានលើកឡើងនៅថ្ងៃទី០៨ ខែមិថុនានេះថា ពួកគាត់បានទៅរស់នៅអាស្រ័យផលលើដីទំហំ៩៦ហិកតានេះ តាំងពីឆ្នាំ១៩៧៩មក ប៉ុន្តែនៅអំឡុងឆ្នាំ២០០៥ អាជ្ញាធរជាតិអប្សរាបានចុះទៅស្រាវជ្រាវនិងទិញដីនោះពីប្រជាពលរដ្ឋក្នុងតម្លៃ៥០០ទៅ៦០០ដុល្លារ ប៉ុន្តែពលរដ្ឋមិនព្រម។
លោកបន្តថា កន្លងមក ពួកគាត់ធ្លាប់បានដាក់ពាក្យបណ្តឹងនិងញត្តិសុំអន្តរាគមន៍ឱ្យអាជ្ញាធរពាក់ព័ន្ធជួយដោះស្រាយវិវាទដីធ្លីនេះជាច្រើនលើកច្រើនសារហើយ ប៉ុន្តែមកដល់ពេលនេះ នៅពុំទាន់មានដំណោះស្រាយសមរម្យនៅឡើយ។ ករណីនេះ លោកស្នើជាថ្មីដល់អាជ្ញាធរពន្លឿនការដោះស្រាយវិវាទដីធ្លីនេះឱ្យបានឆាប់និងផ្តល់សំណងសមរម្យដល់ពួកគាត់។
លោកបន្តថា៖ «បងប្អូនប្រជាពលរដ្ឋយើងអត់ទទួលយកទេ ពីព្រោះសំណងហ្នឹងវាអត់សមរម្យ អត់ទៅតាមគោលការណ៍ច្បាប់ដែលបានជួយគាំទ្រយើង។ នេះជាដំណោះស្រាយដែលបងប្អូនពលរដ្ឋយើងទទួលអត់បាន ដី១ហិកតាឱ្យយើង២០[ម៉ែត្រ] គុណនឹង៣០[ម៉ែត្រ] យើងធ្វើអីរស់? យើងទទួលយកអត់បានទេ»។
តំណាងពលរដ្ឋរូបនេះក៏បានស្នើដល់អាជ្ញាធរជាតិអប្សរាដោះស្រាយបញ្ហាដីធ្លីនេះ ដោយផ្តល់ដីនៅទីតាំងថ្មីដែលនៅក្បែរទីតាំងចាស់ ទៅតាមទំហំដីចាស់ដែលពួកគាត់កាន់កាប់ជាក់ស្តែង។
វីអូឌី មិនអាចសុំការបញ្ជាក់ពីអ្នកនាំពាក្យអាជ្ញាធរជាតិអប្សរា លោក ឡុង កុសល បានទេ។
តែយ៉ាងណា លោកធ្លាប់បានប្រាប់កាលពីថ្ងៃទី២៤ ខែមីនា ឆ្នាំ២០២១ ថាករណីនេះ អាជ្ញាធរនឹងបន្តសម្របសម្រួលដោះស្រាយបញ្ហាដីធ្លីនេះ។
មន្រ្តីផ្នែកសិទ្ធិមនុស្សនៃសមាគមអាដហុកប្រចាំខេត្តសៀមរាប លោក សួស ណារិន មានប្រសាសន៍ថា ករណីវិវាទដីធ្លីនេះ អាជ្ញាធរធ្លាប់បានចុះទៅដោះស្រាយរួចមកហើយ ប៉ុន្តែជាគោលការណ៍ អាជ្ញាធរផ្ដល់ដីជូនពលរដ្ឋត្រឹមតែ២០គុណនឹង៣០ម៉ែត្រ ជាហេតុដែលធ្វើឱ្យប្រជាពលរដ្ឋមិនព្រមទទួលយក។
លោកថា៖ «នៅក្នុង២៤គ្រួសារ គេបានសម្រួលឱ្យពួកគាត់ក្នុងម្នាក់មួយឡូត៍ ២០គុណនឹង៣០ តែពួកគាត់អត់ព្រម! […] អ្វីដែលគាត់ថតបង្ហោះនៅលើហ្វេសប៊ុក លើកបដាតាមអីហ្នឹង គឺគាត់ចង់និយាយថា ដីគាត់ខ្លះមាន៥ហិកតា ៣ហិកតា ៤ហិកតាអ៊ីចឹង បើឱ្យគាត់តែ២០ម៉ែត្រគុណ៣០ម៉ែត្រ [មួយឡូត៍] អ៊ីចឹង គាត់ម៉េចយក! តែបើអាជ្ញាធរដោះស្រាយឱ្យគាត់ម្នាក់២ឡូត៍អី ហើយថែមលុយថែមកាក់អីខ្លះឱ្យគាត់ ប្រហែលជាគាត់យក»៕
