គណៈកម្មាធិការជាតិរៀបចំការបោះឆ្នោត (គ.ជ.ប) ដាក់ការព្រួយបារម្ភថា អាចនឹងមិនមានអង្គបោះឆ្នោតច្រើនចាប់អារម្មណ៍ចំពោះប្រព័ន្ធបោះឆ្នោតថ្មីតាមបច្ចេកវិទ្យាអនឡាញនេះទេ ខណៈការបោះឆ្នោតសាកល្បងនឹងត្រូវចាប់ផ្តើមក្នុងរយៈពេលប្រមាណ១០ថ្ងៃខាងមុខទៀតនេះ។
លោក ហង្ស ពុទ្ធា អ្នកនាំពាក្យ គ.ជ.ប ប្រាប់ វីអូឌី នៅថ្ងៃពុធនេះថា ការបោះឆ្នោតសាកល្បងតាមប្រព័ន្ធអនឡាញនេះ នឹងប្រព្រឹត្តទៅនៅថ្ងៃទី២០ ខែមិថុនាខាងមុខនេះហើយ។ លោកបន្តថា គិតមកដល់ពេលនេះ តួលេខនៃអ្នកចុះឈ្មោះបោះឆ្នោតសម្រាប់ការបោះឆ្នោតសាកល្បងនេះនៅមានចំនួនតិចតួចនៅឡើយ។
លោកបន្តថា៖ «គ.ជ.ប មានការបារម្ភខ្លះដែរ! គ.ជ.ប កំពុងតែពិនិត្យជាមួយរដ្ឋបាលគ្រប់រាជធានី-ខេត្ត ដើម្បីឱ្យលោកចូលរួមក្នុងការទទួលខុសត្រូវ និងឆ្លើយតបថាតើអាចដំណើរការបានឬក៏អត់! បាទ» ។
បើតាមលោក ហង្ស ពុទ្ធា គិតត្រឹមថ្ងៃនេះ មានអ្នកចុះឈ្មោះបោះឆ្នោតប្រមាណ២៥ ០០០នាក់ហើយ ក្នុងចំណោមការិយាល័យទាំង៥០ទូទាំងប្រទេស។
នេះជាលើកទី១ហើយដែលកម្ពុជាដាក់ឱ្យអនុវត្តការបោះឆ្នោតតាមប្រព័ន្ធបច្ចេកវិទ្យាឬការបោះឆ្នោតតាមអនឡាញ។
លោក ហង្ស ពុទ្ធា បញ្ជាក់ថា ថ្វីបើនេះជាការបោះឆ្នោតតាមអនឡាញ តែចំពោះអ្នកបោះឆ្នោតគឺតម្រូវឱ្យទៅបោះឆ្នោតដោយផ្ទាល់នៅតាមការិយាល័យដែលខ្លួនបានចុះឈ្មោះជាចាំបាច់ មិនមែនបោះឆ្នោតតាមទូរសព្ទដៃឬតាមកុំព្យូទ័រពីផ្ទះទៅទេ។
បើទោះជាបែបណា លោក សិត វណ្ណា ជាពលរដ្ឋរស់នៅក្នុងស្រុកភ្នំស្រួច ខេត្តកំពង់ស្ពឺ មានប្រសាសន៍ថា លោកហាក់មិនដែលទទួលបានព័ត៌មានពីការបោះឆ្នោតតាមរយៈប្រព័ន្ធនៃការបោះឆ្នោតថ្មីនិងទំនើបនេះទេពីមុនមក។
បុរសដែលមានវ័យ៣០ឆ្នាំរូបនេះ បញ្ជាក់ថា លោកពិតជាពិបាកសន្និដ្ឋានណាស់ ថាតើប្រព័ន្ធបោះឆ្នោតថ្មីនេះអាចនឹងដំណើរការទៅបានល្អប្រសើរឬមានភាពស្មុគស្មាញសម្រាប់អ្នកបោះឆ្នោត។
លោកបន្តថា៖ «ព័ត៌មានហ្នឹង ដល់ពេលខ្ញុំអត់បានតាមដានអ៊ីចឹង ក៏ពិបាកជ្រាបអារឿងហ្នឹងដែរ! ខ្ញុំមិនធ្លាប់ដែលបានដឹងពីមុនមក ដល់អ៊ីចឹងទៅមិនដឹងថាការដឹកនាំរបស់គេពីមុនមក គេធ្វើម៉េចអីម៉េចអ៊ីចឹងដែរ»។
បើតាមមន្ត្រី គ.ជ.ប ការបោះឆ្នោតសាកល្បងតាមអនឡាញដែលគ្រោងរៀបចំនៅថ្ងៃទី២០ ខែមិថុនាខាងមុខនេះ គឺជាការបោះដែលប្រព្រឹត្តទៅក្នុងក្របខណ្ឌទូទាំងប្រទេស ប៉ុន្តែក្នុង១ខេត្តជ្រើសរើសយកតែ១ឃុំ-សង្កាត់ ហើយក្នុង១ឃុំ-សង្កាត់ គឺជ្រើសរើសយកតែ២ការិយាល័យប៉ុណ្ណោះ ដោយ១ការិយាល័យនៅទីប្រជុំជន ហើយ១ការិយាល័យទៀតនៅតាមជនបទ។
ដោយឡែក សម្រាប់គណបក្សនយោបាយដែលត្រូវចូលរួមដាក់ឱ្យអង្គបោះឆ្នោត ឬអ្នកបោះឆ្នោតជ្រើសរើស សម្រាប់ការបោះឆ្នោតសាកល្បងតាមប្រព័ន្ធអនឡាញនេះ គ្រាន់តែជាសំណាកប៉ុណ្ណោះ។ សំណាកនេះ មានន័យថា គណបក្សនយោបាយសម្រាប់ការបោះឆ្នោតសាកល្បងនេះ គឺជាឧទាហរណ៍ដែល គ.ជ.ប សន្មតឡើងនៅលើសន្លឹកបណ្ណបោះឆ្នោត។
លោក កង សាវាង្ស មន្ត្រីជាន់ខ្ពស់នៃកម្មវិធីផ្នែកអង្កេតរបស់អង្គការខុមហ្វ្រែល (Comfrel) ចាត់ទុកការបោះឆ្នោតសាកល្បងតាមអនឡាញដែលរៀបចំដោយ គ.ជ.ប នេះ ថាជាការកែប្រែមួយដែលនាំឱ្យការបោះឆ្នោតអាណត្តិបន្តបន្ទាប់ទៀតកាន់តែមានភាពល្អប្រសើរ។
លោកបន្តថា ប្រព័ន្ធដែលនឹងដាក់ឱ្យដំណើរការក្នុងកម្រិតសាកល្បងនេះ អាចមានភាពងាយស្រួលដល់ការគ្រប់គ្រងទិន្នន័យសម្រាប់ការបោះឆ្នោតថែមទៀតផង។
លោកថា៖ «ខ្ញុំគិតថា នេះជារឿងមួយល្អ ជាពិសេសការដាក់ឱ្យប្រើប្រាស់ការសាកល្បងនៃការចុះឈ្មោះរបស់បេក្ខជនតាមរយៈប្រព័ន្ធកុំព្យូទ័រនេះ។ វាជារឿងល្អមួយដែរ ព្រោះអីមានភាពងាយស្រួលក្នុងការគ្រប់គ្រង ដែលអាចដឹងមុនថា បុគ្គលជាបេក្ខភាពដែលដាក់តំណាងឱ្យគណបក្សនយោបាយ វាមានពិតឬមួយគាត់ទៅឈរក្នុងតំណាងគណបក្សផ្សេងទៀត មានន័យថា គណៈកម្មការរៀបចំការបោះឆ្នោតឃុំ-សង្កាត់ ឬ គ.ជ.ប អាចគ្រប់គ្រងបាន រួមទាំងអាយុផង»។
អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា ឱ្យដឹងថា សម្រាប់ប្រព័ន្ធថ្មីដែលនឹងដាក់ឱ្យសាកល្បងក្នុងពេលដ៏ឆាប់នេះ មានលក្ខខណ្ឌចំនួន៤ គឺទី១ ចង់សាកល្បងដោយប្រើប្រាស់កម្មវិធីរៀបចំបញ្ជីគណបក្សនិងបេក្ខជនគណបក្សតាមប្រព័ន្ធកុំព្យូទ័រ ដោយជំនួសទម្រង់ចាស់ ១០ ០៨ ពីមុន។ ទី២ គឺប្រព័ន្ធត្រួតពិនិត្យនិងផ្ទៀងផ្ទាត់លទ្ធផលសរុបតាមប្រព័ន្ធកុំព្យូទ័រ។ ទី៣ គ.ជ.ប ចង់សាកល្បងឱ្យអង្គបោះឆ្នោតចេះប្រើប្រាស់នូវប៊ិកគំនូសសញ្ញាគាំទ្រ និងលក្ខខណ្ឌទី៤ ស្របពេលបរិបទនៃការរីករាលដាលជំងឺកូវីដ-១៩នេះ ដូច្នេះ គ.ជ.ប សម្រេចជ្រើសរើសការ បោះឆ្នោតសាកល្បងតាមអនឡាញនេះ ដើម្បីវាស់ស្ទង់ពីរបៀបនៃការបោះឆ្នោតតាមរបៀបថ្មីនេះ។
បើតាមអ្នកនាំពាក្យ គ.ជ.ប ប្រសិនបើដំណើរការសាកល្បងនេះប្រព្រឹត្តទៅបានល្អ ការបោះឆ្នោតតាមប្រព័ន្ធទំនើបនឹងដាក់ឱ្យប្រើប្រាស់សម្រាប់ការបោះឆ្នោតក្នុងអាណត្តិបន្តបន្ទាប់ទៀត ដើម្បីធានាថា ការបោះឆ្នោតនឹងប្រព្រឹត្តទៅដោយសេរី ត្រឹមត្រូវ និងយុត្តិធម៌៕