អ្នកនាំពាក្យរដ្ឋសភា បង្ហើបថា គិតត្រឹមថ្ងៃពុធនេះ មានបេក្ខជនចំនួន ៣នាក់ហើយបានដាក់ពាក្យប្រកួតប្រជែងយកតំណែងប្រធានគណៈកម្មាធិការជាតិរៀបចំការបោះឆ្នោត (គ.ជ.ប) ក្រោយពីប្រធាន គ.ជ.ប ចាស់ លោក ស៊ិក ប៊ុនហុក បានសុំលាឈប់ពីតំណែង។
លោក ស៊ិក ប៊ុនហុក អាយុ៧៥ឆ្នាំ បានដាក់ពាក្យលាឈប់ពីតំណែងប្រធាន គ.ជ.ប កាលពីថ្ងៃទី១ ខែមិថុនា ឆ្នាំ២០២១ ដោយប្រាប់ពីមូលហេតុនៃការលាឈប់នោះ ថាមកពីបញ្ហាសុខភាព។ ការស្នើសុំនេះ ត្រូវបានគណៈកម្មាធិការអចិន្រ្តៃយ៍រដ្ឋសភាអនុម័តយល់ព្រមនៅថ្ងៃទី៤ ខែមិថុនា ឆ្នាំ២០២១។
លោក ឡេង ប៉េងឡុង អ្នកនាំពាក្យរដ្ឋសភា ប្រាប់ VOD នៅថ្ងៃពុធនេះថា នីតិវិធីជ្រើសរើសប្រធាន គ.ជ.ប ថ្មី បានចាប់ផ្តើមហើយ ចាប់ពីថ្ងៃពុធនេះទៅ រហូតដល់ថ្ងៃទី២៤ ខែមិថុនា។
លោកថា៖ «មាន៣នាក់ គាត់មកដាក់ពាក្យឬបែបបទហើយ! ប៉ុន្តែម្នាក់បានដាក់រួចហើយ»។
បើតាមអ្នកនាំពាក្យរូបនេះ នីតិវិធីនៃការជ្រើសរើសប្រធាន គ.ជ.ប ត្រូវឆ្លងកាត់ប្រធានគណៈកម្មាធិការអចិន្ត្រៃយ៍នៃរដ្ឋសភាប្រជុំសម្រេចជ្រើសរើសបេក្ខជន បន្ទាប់មកបេក្ខជននោះត្រូវសុំការយល់ព្រមពីសភាពេញអង្គបោះឆ្នោតអនុម័ត ទើបអាចចូលកាន់តំណែងបាន។
លោក ស៊ិក ប៊ុនហុក បានចូលកាន់តំណែងប្រធាន គ.ជ.ប ចាប់តាំងពីថ្ងៃទី១៣ ខែមេសា ឆ្នាំ២០១៥ តាមរូបមន្ត ៤+៤+១ ក្រោមការសម្របសម្រួលនយោបាយរវាងគណបក្សប្រជាជនកម្ពុជា និងគណបក្សសង្គ្រោះជាតិ ជាគណបក្សមានអាសនៈក្នុងសភា។
រូបមន្តនេះ សមាជិក គ.ជ.ប ចំនួន៩រូប មាន៤រូបមកពីបក្សប្រឆាំង ៤រូបមកពីបក្សកាន់អំណាច និង១រូបមកពីតំណាងអង្គការសង្គមស៊ីវិល តែតំណែងប្រធានបានទៅលើកូតាមកពីបក្សកាន់អំណាច គឺលោក ស៊ិក ប៊ុនហុក រីឯតំណែងអនុប្រធានបានទៅលើកូតាមកពីអតីតបក្សប្រឆាំង លោក គុយ ប៊ុនរឿន៕
