ក្រសួងសង្គមកិច្ច ទុកពេល១សប្តាហ៍ទៀតសម្រាប់ពលរដ្ឋទីទ័លក្រក្នុងក្រុងភ្នំពេញ ក្រុងតាខ្មៅ និងក្រុងព្រះសីហនុដែលរងផលប៉ះពាល់ផ្នែកជីវភាពអំឡុងការបិទខ្ទប់ អាចស្នើសុំបើកប្រាក់ឧបត្ថម្ភពីរដ្ឋាភិបាលតាមរយៈកម្មវិធីជំនួយសង្គមជាសាច់ប្រាក់ដែលបានចាប់ផ្តើមកាលពីខែមុន។
សេចក្តីប្រកាសនេះធ្វើឡើងក្នុងសន្និសីទសារព័ត៌មានមួយនៅក្រសួងសង្គមកិច្ច កាលពីថ្ងៃព្រហស្បតិ៍ ទី១០ ខែមិថុនា ម្សិលមិញ ដើម្បីបិទបញ្ចប់ដំណើរការកំណត់អត្តសញ្ញាណគ្រួសារគោលដៅជុំដំបូងដែលក្រសួងជ្រើសរើសបានជាង៦ម៉ឺន (៦១ ៦៧៨) គ្រួសារ ឬស្មើនឹងជាង២០ម៉ឺននាក់។
តាមការបញ្ជាក់ពីប្រធាននាយកដ្ឋានសុខុមាលភាពសង្គម លោក ហួរ សុបញ្ញា អំឡុងសន្និសីទ ឱ្យដឹងថា កម្មវិធីនេះមិនផ្តល់ជូនសម្រាប់គ្រួសារកាន់បណ្ណសមធម៌នៅមានសុពលភាព និងកម្មករកាត់ដេរនោះទេ។ លោកថា ក្រសួងបានចាប់ផ្តើមផ្សព្វផ្សាយ និងទទួលពាក្យនៅថ្ងៃទី១៣ ខែឧសភា ឆ្នាំ២០២១ ហើយប្រើក្រុមការងារចម្រុះប្រមាណ១ពាន់នាក់ ដើម្បីសម្ភាសគ្រួសារផ្ទាល់មាត់ឬតាមទូរសព្ទ។
ប្រតិភូរដ្ឋាភិបាលទទួលបន្ទុកអគ្គនាយកដ្ឋានផែនការ លោក ថេង បញ្ញាធន លើកឡើងក្នុងសន្និសីទថា គ្រួសារដែលទទួលបានប្រាក់ឧបត្ថមត្រូវចុះឈ្មោះជាមួយអាជ្ញាធរមូលដ្ឋាន និងឆ្លងកាត់ការសម្ភាសផ្ទាល់មាត់ឬតាមទូរសព្ទ ក្នុងករណីពួកគេរស់នៅតំបន់បិទខ្ទប់ពីក្រុមការងារចម្រុះ ដោយផ្តោតសំខាន់លើស្ថានភាពលំនៅដ្ឋាន សម្ភារប្រើប្រាស់ និងសេដ្ឋកិច្ចប្រចាំថ្ងៃរបស់ក្រុមគ្រួសារនីមួយៗ។
មន្រ្តីជាន់ខ្ពស់ក្រសួងផែនការរូបនេះ អំពាវនាវឱ្យគ្រួសារដែលគិតថាខ្លួនក្រីក្រ ឋិតក្នុងលក្ខខណ្ឌកំណត់ តែមិនទាន់មានឱកាសចុះឈ្មោះ ត្រូវប្រញាប់រួសរាន់ទាក់ទងទៅអាជ្ញាធរមូលដ្ឋានឱ្យបានមុនថ្ងៃទី១៨ ខែមិថុនា ឆ្នាំ២០២១ ដើម្បីទទួលបានប្រាក់ឧបត្ថម្ភដែលមានចាប់ពី១៥៦ ០០០រៀល ដល់៣១១ ០០០រៀល សម្រាប់ការចំណាយលើថ្លៃទឹក ភ្លើង និងអាហាររយៈពេល២ខែ។
លោកមានប្រសាសន៍ថា៖ «នេះគឺសូមជម្រាបជូនឱ្យហើយ ហើយសុំមេត្តារួសរាន់ធ្វើការទាក់ទង។ បើសិនជាមិនបានទេ ហ្នឹងមិនមែនជាកំហុសរបស់អាជ្ញាធរ ឬកំហុសរបស់ក្រុមការងារយើងដែលចុះទៅធ្វើកិច្ចការងារនេះទេ គឺជាកំហុសរបស់បងប្អូនប្រជាជនយើងផ្ទាល់តែម្តង»។
យ៉ាងណា រដ្ឋមន្រ្តីក្រសួងសង្គមកិច្ច អតីតយុវជន និងយុវនីតិសម្បទា លោក វង សូត លើកឡើងថា ក្រសួងនឹងពិនិត្យពន្យារពេលបន្ថែមទៀតដោយផ្អែកលើភាពជាក់ស្តែង ប្រសិនបើការផ្តល់ពេល១សប្តាហ៍នៅតែមិនគ្រប់គ្រាន់សម្រាប់ពលរដ្ឋក្រីក្រធ្វើការស្នើសុំ។
បើតាមលោករដ្ឋមន្រ្តី កម្មវិធីជំនួយសង្គមជុំដំបូងនេះ ក្រសួងត្រូវចំណាយថវិកាចំនួន៤លានដុល្លារសម្រាប់គ្រួសារក្រីក្រដែលនៅតំបន់បិទខ្ទប់ ក្រោយបានសម្ភាសជាប់ ហើយនឹងចំណាយបន្ថែមទៀតសម្រាប់ដំណាក់កាលបន្តបន្ទាប់ បើនៅតែមានប្រជាពលរដ្ឋខ្វះខាតពិត។
លោកមានប្រសាសន៍ថា៖ «មិនមែនមានន័យថា មួយអាទិត្យហ្នឹងយើងបិទគ្រឹប លែងទទួលពាក្យនោះទេ! ខ្ញុំគិតថា មិនមានបញ្ហាអីស្មុគស្មាញប៉ុន្មានទេ ព្រោះតំបន់បិទខ្ទប់ហ្នឹង វានៅក្នុងកម្រិតមួយតូចដែរទេ។ យើងកន្លងមក យើងធ្វើទូទាំងប្រទេស យើងធ្វើបាន! គ្រាន់តែប៉ុណ្ណឹង យើងទាមទារពេលវេលាបន្តិច»។
ដោយឡែក លោក កៅ ពឿន អគ្គលេខាធិការរងសមាគមឯករាជ្យនៃសេដ្ឋកិច្ចក្រៅប្រព័ន្ធ (IDEA) លើកឡើងថា ពាក់ព័ន្ធរបៀបស្នើសុំសាច់ប្រាក់ឬកំណត់អត្តសញ្ញាណក្នុងការទទួលបានជំនួយសង្គមកិច្ចនេះ មានបញ្ហាស្មុគស្មាញ និងមិនមានតម្លាភាពគ្រប់គ្រាន់ចំពោះពលរដ្ឋក្រីក្រឬខ្វះខាត ជាពិសេសសមាជិកសមាគមរបស់លោកផ្ទាល់តែម្តង។
លោកមានប្រសាសន៍ថា៖ «ខ្ញុំធ្លាប់ឱ្យខាងសមាជិកយើង សមាជិករបស់សមាគម IDEA ហ្នឹង គាត់យក list [បញ្ជី]ឈ្មោះ ទៅឱ្យខាងសង្កាត់ស្ទឹងមានជ័យ២ ហើយគាត់អត់ទាំងទទួលផង មិនដឹងថា តើខាងរដ្ឋជ្រើសរើសម៉េចទេ? ប៉ុន្តែបើតាមសេចក្តីជូនដំណឹងហ្នឹង ឃើញគាត់ដាក់អីត្រឹមត្រូវ ឧទាហរណ៍ថា អ្នកដែលមានមុខរបរលក់ដូរក្នុងផ្សារ លក់ដូរតាមផ្លូវអ៊ីចឹង អ្នករត់កង់បី ប៉ុន្តែពេលយកទៅដាក់ គាត់អត់ទទួល មិនដឹងម៉េច? គាត់ថែមទាំងនិយាយថា អ្នកណាឱ្យយកមកហ្នឹង យកឱ្យអ្នកហ្នឹងទៅ!»។
លោក កៅ ពឿន បន្ថែមថា ចំពោះបញ្ហាដំណើរការនីតិវិធីក្នុងការចែកសាច់ប្រាក់វិញ ក៏មានលក្ខណៈលម្អៀងនិងមិនទូលំទូលាយចំពោះពលរដ្ឋក្រីក្រពិតប្រាកដដែលពួកគាត់ត្រូវការជំនួយជាចាំបាច់នោះទេ ប៉ុន្តែកម្មវិធីនេះ ពេលខ្លះគ្រាន់តែធ្វើឱ្យល្អមើល។
លោកថា៖ «អារឿងហ្នឹង យើងអត់បានគិតថាវាមានប្រយោជន៍អី ឬក៏អ្នកដែលរងផលប៉ះពាល់នឹងទទួលបានពិតប្រាកដទេ! ជាក់ស្តែង យើងទៅដាក់ គាត់អត់ទទួលផង ហើយយើងក៏មិនសង្ឃឹមថាទទួលបានប្រយោជន៍ពីហ្នឹងដែរ»។
លោកស្រី ហីង អះអាងថាជាពលរដ្ឋក្រីក្រម្នាក់ រស់នៅភូមិព្រែកទាល់ សង្កាត់ស្ទឹងមានជ័យ ខណ្ឌមានជ័យ ដែលមានមុខរបរដើរបេះត្រកួនលក់ផង រើសអេតចាយលក់ផង ហើយរកមួយថ្ងៃហូបមួយថ្ងៃ និងកំពុងជំពាក់បំណុលគេជាច្រើននៅក្នុងអំឡុងពេលកូវីដ-១៩នេះ។
លោកស្រីមានប្រសាសន៍ថា៖ «ខ្ញុំនៅភូមិព្រែកទាល់ហ្នឹង សង្កាត់ស្ទឹងមានជ័យ២ហ្នឹង មានការខ្វះខាតក្នុងជីវភាព ហើយមានការខ្វះខាតជាច្រើន ផ្ទះបាក់បែក ធ្លុះធ្លាយ ខ្ញុំបានដាក់សំណើទៅខាងរដ្ឋថ្ងៃមុន តែគាត់អត់ទទួលសំណើខ្ញុំទេ»។
រដ្ឋាភិបាលបានសម្រេចផ្តល់ការឧបត្ថម្ភជាសាច់ប្រាក់ឡើងវិញដល់គ្រួសារក្រីក្រក្នុងរាជធានីភ្នំពេញ ក្រុងតាខ្មៅ ខេត្តកណ្តាល និងក្រុងព្រះសីហនុ ខេត្តព្រះសីហនុ ដែលមានការបិទខ្ទប់ទ្រង់ទ្រាយធំដោយសារជំងឺកូវីដ-១៩ កាលពីថ្ងៃទី១១ ខែឧសភា ឆ្នាំ២០២១ ក្រោមលក្ខខណ្ត្រូវឆ្លងកាត់ការចុះឈ្មោះ វាយតម្លៃពីអាជ្ញាធរមូលដ្ឋាន និងការសម្ភាស។ ការផ្តល់សារជាថ្មីនេះ ធ្វើឡើងបន្ទាប់ពីលោកនាយករដ្ឋមន្រ្តី ហ៊ុន សែន បានប្រកាសបើកផ្តល់ម្តងនៅអំឡុងមុនថ្ងៃចូលឆ្នាំខ្មែរ តែត្រូវលុបចោលវិញដោយប្តូរទៅជាជំនួយស្បៀងអាហារ៕