រដ្ឋមន្ត្រីក្រសួងវប្បធម៌ និងវិចិត្រសិល្បៈ លើកឡើងថា កម្ពុជាបានបាត់បង់មរតកមនុស្សរស់មួយរូបទៀតនាថ្ងៃអង្គារនេះ ដោយលោកយាយ ទេវនាដនិម្មិត ឯម ធាយ បានទទួលមរណភាពដោយរោគាពាធ ក្នុងជន្មាយុ៨៦ឆ្នាំ។
សារនៅលើទំព័រហ្វេសប៊ុករបស់រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកស្រី ភឿង សកុណា នៅថ្ងៃទី១៥ ខែមិថុនានេះ បានចាត់ទុកការទទួលមរណភាពរបស់ទេវនាដនិម្មិតរូបនេះថាជាការបាត់បង់ដ៏ធំធេងមួយក្នុងវិស័យវប្បធម៌ ទាំងផ្នែករបាំក្បាច់បុរាណ តន្ត្រី ចម្រៀងបុរាណខ្មែរ។
លោកស្រី ភឿង សកុណា សរសេរថា៖ «រាងកាយបាត់ទៅ ក្នុងជន្មាយុ៨៦ឆ្នាំ តែលោកយាយបានបន្សល់ទុកនូវស្នាដៃសិល្បៈខ្មែរមិនអាចកាត់ថ្លៃបាន សម្រាប់កូនខ្មែរជំនាន់ក្រោយ ដោយចងចាំនូវគុណបំណាច់ជូនជាតិនេះ គ្មានថ្ងៃបំភ្លេចបានឡើយ។ នាងខ្ញុំសូមក្រាបសំពះជូនដំណើរ និងគោរពលាលោកយាយជាលើកចុងក្រោយ ដោយចងចាំមិនភ្លេចទេនូវអ្វីដែលលោកយាយបានលះបង់និងបូជាសម្រាប់វប្បធម៌ជាតិ។ សូមវិញ្ញាណក្ខន្ធលោកយាយបានទៅកាន់សុគតិភពកុំបីឃ្លៀងឃ្លាតឡើយ»។
យោងតាមគេហទំព័រមជ្ឈមណ្ឌលសោតទស្សន៍បូផាណា បានឱ្យដឹងថា លោកយាយ ឯម ធាយ គឺជាព្រឹទ្ធាចារ្យនៃរបាំបុរាណខ្មែរ និងជានាដការីរបាំព្រះរាជ្យទ្រព្យផងដែរ។ លោកយាយ ឯម ធាយ កើតនៅឆ្នាំ១៩៣២។ កាលនៅមានជីវិត លោកយាយនៅបន្តធ្វើការក្នុងការអភិវឌ្ឍរបាំបុរាណខ្មែរជានិច្ច។
ក្នុងបទសម្ភាសជាមួយបូផាណា ឱ្យដឹងទៀតថា លោកយាយ ឯម ធាយ បានរៀបរាប់ពីដំណើរជីវិតរបស់ខ្លួនដែលឆ្លងកាត់សម័យកាលជាច្រើន ដោយផ្សារភ្ជាប់ជីវិតរបស់ខ្លួនជាមួយនឹងវិស័យសិល្បៈស្ទើរពេញមួយជីវិត។
រដ្ឋបាលសាលាសង្កាត់ព្រែកប្រា ខណ្ឌច្បារអំពៅ រាជធានីភ្នំពេញ នៅថ្ងៃទី១៥ ខែមិថុនានេះ បានឱ្យដឹងថា នៅម៉ោងប្រមាណ៩ព្រឹក ក្រុមគ្រូពេទ្យបង្អែកច្បារអំពៅ សហការជាមួយអាជ្ញាធរសង្កាត់ភូមិ បានចុះយកសំណាកសព លោកយាយ ឯម ធាយ ដោយពិនិត្យឃើញថា មានវិជ្ជមានកូវីដ-១៩។ ប៉ុន្តែដោយកូនចៅមិនអស់ចិត្ត ក៏បានហៅក្រុមគ្រូពេទ្យធីតា ទៅយកសំណាកម្តងទៀតនៅម៉ោង១១ព្រឹក តែលទ្ធផលនៅតែវិជ្ជមានកូវីដ-១៩ដដែល។
យ៉ាងណា ព័ត៌មាននេះត្រូវបានលុបចេញពីទំព័រហ្វេសប៊ុករបស់សាលាសង្កាត់ព្រែកប្រាវិញ នៅថ្ងៃអង្គារនេះ។
ដោយឡែក អ្នកនាំពាក្យក្រសួងសុខាភិបាល លោកស្រី ឱ វណ្ណឌីន ប្រាប់ វីអូឌី នៅរសៀលថ្ងៃអង្គារនេះថា អ្នកស្រីនៅពុំទាន់ទទួលបានព័ត៌មាននេះនៅឡើយទេ។ ប៉ុន្តែលោកស្រីថា ជាធម្មតា នៅក្នុងស្ថានភាពជំងឺកូវីដ-១៩កំពុងរីករាលដាល មន្ត្រីជំនាញតែងមានការប្រយ័ត្នប្រយែងខ្ពស់ ដោយត្រូវចុះពិនិត្យនិងយកសំណាកសពដែលស្លាប់ ដើម្បីឱ្យប្រាកដថា អ្នកស្លាប់នោះស្លាប់ដោយជំងឺអ្វីពិតប្រាកដ ចៀសវាងការឆ្លងជំងឺផ្លូវដង្ហើមនេះទៅកាន់អ្នកផ្សេងទៀតដោយមិនបានដឹង៕