ពលរដ្ឋអះអាងថា ការចរចារកដំណោះស្រាយរឿងវិវាទដីធ្លីរវាងអាជ្ញាធរនិងប្រជាពលរដ្ឋដែលរងផលប៉ះពាល់ពីគម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មី ស្ថិតក្នុងស្រុកកណ្តាលស្ទឹង ខេត្តកណ្តាល មិនទទួលបានលទ្ធផលនោះទេ ក្រោយភាគីពាក់ព័ន្ធចរចាគ្នាអស់រយៈពេលជាង៥ម៉ោងនៅព្រឹកថ្ងៃអង្គារនេះ។
តំណាងប្រជាពលរដ្ឋប្រហែល៣០នាក់បានជួបប្រជុំជាមួយអភិបាលខេត្តកណ្តាលនិងអាជ្ញាធរពាក់ព័ន្ធផ្សេងទៀត នៅថ្ងៃទី១៥ ខែមិថុនា ឆ្នាំ២០២១នេះ ដើម្បីស្វែងរកដំណោះស្រាយផលប៉ះពាល់ដីធ្លី ក្រោមគម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មី។
ពលរដ្ឋនៅឃុំបឹងខ្យាង អ្នកស្រី ឃឹម ម៉ាលី ដែលចូលរួមកិច្ចប្រជុំនោះបានប្រាប់ វីអូឌី ថាការជួបប្រជុំនោះ អាជ្ញាធរបានត្រឹមតែសម្របសម្រួលឱ្យពលរដ្ឋទទួលយកសំណងផលប៉ះពាល់ត្រឹមតែ៨ដុល្លារក្នុងមួយម៉ែត្រការ៉េ និងដោះដូរដីកន្លែងផ្សេងដែលជាដំណោះស្រាយដដែលៗតែប៉ុណ្ណោះ។ អ្នកស្រីបន្តថា ពលរដ្ឋនៅតែរក្សាជំហរមិនព្រមទទួលយកសំណងនេះឡើយ។
អ្នកស្រី ឃឹម ម៉ាលី ដែលអះអាងថា ប៉ះពាល់ដីទំហំ២៧អា បានបន្តទៀតថា សំណងដែលអ្នកភូមិចង់បានគឺដីនៅជាប់ផ្លូវតម្លៃ១៥០ដុល្លារក្នុងមួយម៉ែត្រការ៉េ ខណៈដីមិនជាប់ផ្លូវអាស្រ័យលើការចរចាគ្នាបន្ថែមទៀត។ អ្នកស្រីបន្ថែមថា មូលហេតុដែលពួកគាត់មិនអាចទទួលយកសំណងតាមការកំណត់របស់អាជ្ញាធរ ដោយសារសំណងនេះតិចតួចពេក មិនអាចទៅរកទិញដីកន្លែងផ្សេងបាន និងបារម្ភខ្លាចដីដែលដោះដូរនោះមានបញ្ហាបណ្ណកម្មសិទ្ធិទៀតផង។
អ្នកស្រីបន្ថែមថា៖ «តម្លៃហ្នឹង ពួកខ្ញុំទទួលយកអត់បានទេ និងការដូរដី គឺខាងពួកខ្ញុំមិនព្រមដែរ ពីព្រោះអីបើយើងដូរ មិនដឹងថាដីនោះនៅកន្លែងណា ទៅមើលម្តងគាត់ចង្អុលថាកន្លែងនេះកន្លែងនោះ។ មួយទៀត ខ្លាចមានបញ្ហារឿងប្លង់ រាល់ថ្ងៃនេះដីពួកខ្ញុំមានបណ្ណកម្មសិទ្ធិស្របច្បាប់ផងនៅលំបាក»។
ពលរដ្ឋនៅឃុំបឹងខ្យាងម្នាក់ទៀត លោក សួង ពៅ ឱ្យដឹងថា ការសម្របសម្រួលដោះស្រាយនៅព្រឹកមិញនេះ អាជ្ញាធរហៅពលរដ្ឋតែ១៣គ្រួសារប៉ុណ្ណោះមកដោះស្រាយ ហើយការដោះស្រាយរបៀបនេះ អ្នកភូមិមិនអាចទទួលយកបានឡើយ។ លោកថា អ្នកភូមិទាមទារទៅអាជ្ញាធរឱ្យដោះស្រាយជាសរុបរួមសម្រាប់ពលរដ្ឋដែលរងផលប៉ះពាល់ទាំងអស់គ្នា។
ពលរដ្ឋរូបនេះបន្តថា បញ្ហាប្រឈមសម្រាប់អ្នកភូមិមួយទៀតនោះ គឺអាជ្ញាធរបានបិទការទិញលក់ដីនៅតំបន់ពួកគាត់ និងហាមប្រជាពលរដ្ឋមិនឱ្យចូលទៅបង្កបង្កើនផលក្នុងដីស្រែរបស់ខ្លួនរយៈពេលជិត៣ឆ្នាំហើយ ដែលធ្វើឱ្យប្រជាពលរដ្ឋខ្វះខាតស្បៀងនិងជួបបញ្ហាជីវភាព។
លោកបន្ថែមថា៖ «ជំហររបស់ប្រជាពលរដ្ឋ គឺនៅតែតវ៉ាទាមទារ ហើយទាមទារឱ្យក្រុមហ៊ុនមកចរចាជាមួយប្រជាពលរដ្ឋ ដែលពលរដ្ឋទាមទារ១៥០ដុល្លារក្នុងមួយម៉ែត្រការ៉េ ដែលនេះជាគោលការណ៍របស់ប្រជាពលរដ្ឋ។ ហើយទាមទារដោះស្រាយជារួម គឺមិនមែនដោះស្រាយត្រឹមតែ១៣ក្បាលដីហ្នឹងទេ ដោយសារតែរាប់រយគ្រួសារទៀតបានបិទការទិញជិត៣ឆ្នាំហើយ»។
វីអូឌី មិនអាចសុំការបញ្ជាក់ពីអភិបាលខេត្តកណ្តាល លោក គង់ សោភ័ណ្ឌ បានទេ នៅថ្ងៃអង្គារនេះ ដោយទូរសព្ទចូលគ្មានអ្នកទទួល។ ប៉ុន្តែលោកធ្លាប់ប្រាប់ វីអូឌី កាលពីចុងខែឧសភា ថាការសម្រេចផ្តល់សំណង៨ដុល្លារក្នុងមួយម៉ែត្រការ៉េជូនពលរដ្ឋ និងសុំដោះដូរដីនោះ គឺរដ្ឋាភិបាលជាអ្នកកំណត់ ក្រោយមានការវាយតម្លៃផលប៉ះពាល់ពីក្រសួងពាក់ព័ន្ធ។
លោក គង់ សោភ័ណ្ឌ ក៏ព្រមានចាត់វិធានការច្បាប់ផងដែរ ប្រសិនពលរដ្ឋនៅតែមិនព្រមទទួលសំណងដែលរដ្ឋាភិបាលបានកំណត់នេះ។
លោកបន្ថែមថា៖ «អាហ្នឹងខ្ញុំគិតថា វាល្អបំផុតហើយ ដោយសារចេញពី៨ដុល្លារបាន បានអាដីនៅក្បែរហ្នឹងចុះ គាត់ចង់បានដីហ្នឹង វាថ្លៃ! ប៉ុន្តែពួកគាត់មិនព្រមទៀត ដល់ពួកគាត់មិនព្រមទៀត អាហ្នឹងយើងអស់ជម្រើស។ ដល់អស់ជម្រើស [ចូលដល់] កាតព្វកិច្ចហើយ ព្រោះយើងត្រូវមានកាតព្វកិច្ចដែរ មិនអាចឆ្លើយថាទេចំពោះកាតព្វកិច្ចទេ ហើយប្រើច្បាប់អស្សាមិករណ៍ ។ល។ ទៅ»។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា មានប្រសាសន៍ថា កន្លងមកនេះ ការអភិវឌ្ឍភាគច្រើនមិនបានគោរពទៅតាមច្បាប់នោះទេ ដោយថា គម្រោងខ្លះមិនបានដោះស្រាយសំណងសមរម្យនិងយុត្តិធម៌ជូនពលរដ្ឋឡើយ។ លោកថា តាមច្បាប់ រាល់ការដកហូតសិទ្ធិស្របច្បាប់លើកម្មសិទ្ធិឯកជន ដើម្បីយកទៅអភិវឌ្ឍនានានោះ គឺត្រូវបានធានាពីការទូទាត់សំណងជាមុនដោយសមរម្យនិងយុត្តិធម៌។
មន្ត្រីសិទ្ធិមនុស្សរូបនេះ បន្តថា ចំពោះពលរដ្ឋដែលរងផលប៉ះពាល់ដីធ្លីពីគម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មី នៅខេត្តកណ្តាល ភាគច្រើនមានបណ្ណកម្មសិទ្ធិស្របច្បាប់ ដែលអាជ្ញាធរនិងក្រុមហ៊ុនត្រូវតែដោះស្រាយសំណងសមរម្យនិងយុត្តិធម៌ជូនពួកគេ។
លោកបន្ថែមថា៖ «ខ្ញុំយល់ថា អាជ្ញាធរគប្បីមានការពិនិត្យនិងចរចាតម្លៃឱ្យបានសមរម្យដែលពួកគាត់អាចទទួលយកបាន ចៀសវាងនូវការប្រើវិធានការគំរាមកំហែង ឬក៏ដាក់សម្ពាធ ឬក៏ហិង្សាណាមួយចំពោះពួកគាត់ ពីព្រោះចំណុចទាំងអស់នេះ ពួកគាត់សុទ្ធតែបានបណ្ណកម្មសិទ្ធិស្របច្បាប់។ អ៊ីចឹងប្រសិនបើពួកគាត់មិនទាន់អាចទទួលយកបានទេ គួរតែមានការចរចា ចរចាហើយចរចាទៀត ធ្វើយ៉ាងណាឱ្យពួកគាត់អាចទទួលបាន»៕
