តុលាការ និងច្បាប់, បរិស្ថាន, ព័ត៌មានជាតិ, សិទ្ធិមនុស្ស

CYN ថាយុវជនបរិស្ថាន៤នាក់ទៀតត្រូវបានអាជ្ញាធរចាប់ខ្លួន

តុលាការ និងច្បាប់ បរិស្ថាន ព័ត៌មានជាតិ សិទ្ធិមនុស្ស-

លោក ញឹម សុខន
| ១៦ មិថុនា ២០២១
ម៉ោង ១៨:៤២

សកម្មជានបរិស្ថាន លោក យឹម លាងហ៊ី និងលោក លី ចាន់ដារ៉ាវុទ្ធ។ (CYN)

សមាគមបណ្តាញយុវជនកម្ពុជា (CYN) ឱ្យដឹងថា សកម្មជនបរិស្ថាន៤នាក់ត្រូវបានអាជ្ញាធរឃាត់ខ្លួននៅ២កន្លែងផ្សេងគ្នា នៅថ្ងៃពុធនេះ ក្នុងនោះ សកម្មជន៣នាក់ត្រូវបានឃាត់ខ្លួនក្រោយពួកគេថតវីដេអូទឹកស្អុយហូរចូលទន្លេ នៅម្តុំមុខព្រះបរមរាជវាំង។

មន្ត្រីគម្រោងតស៊ូមតិនៃគម្រោងអ្នកការពារព្រៃឈើ នៃសមាគមបណ្តាញយុវជនកម្ពុជា លោក សាន់ ម៉ាឡា មានប្រសាសន៍ថា តាមការផ្តល់ដំណឹងពីក្រុមគ្រួសារបរិស្ថាន លោក យឹម លាងហ៊ី ត្រូវបានអាជ្ញាធរស្រុកកោះធំ ឃាត់ខ្លួននៅម៉ោងប្រមាណជា១១ព្រឹកនេះ ខណៈសកម្មជនបរិស្ថាន៣នាក់ទៀត រួមមាន លោក លី ចាន់ដារ៉ាវុទ្ធ លោក លី ម៉េង និងកញ្ញា ស៊ុន រដ្ឋា ត្រូវបានអាជ្ញាធរឃាត់ខ្លួននៅក្នុងរាជធានីភ្នំពេញ ក្រោយពីពួកគេថតវីដេអូទឹកស្អុយហូរចូលទន្លេ។

លោកថា៖ «ព័ត៌មានបឋមដែលយើងទទួលបានពីប្រពន្ធសកម្មជនបរិស្ថាន លោក លឹម លាងហ៊ី ដែលគាត់នៅខាងស្រុកកោះធំ ខេត្តកណ្តាល គាត់ថាសមត្ថកិច្ចបានមកហៅប្តីគាត់ឱ្យទៅប៉ុស្តិ៍ ដើម្បីសាកសួរព័ត៌មានមួយចំនួន។ ហើយក្រោយមក គេឱ្យប្រពន្ធគាត់មកផ្ទះវិញ ហើយគេធ្វើការឃាត់ខ្លួនប្តីគាត់»។

ភរិយាលោក យឹម លាងហ៊ី គឺអ្នកស្រី ម៉ៅ បានប្រាប់ដោយខ្លីថា ប្តីគាត់ពិតជាត្រូវបានអាជ្ញាធរស្រុកកោះធំឃាត់ខ្លួនមែន ប៉ុន្តែមិនបានបញ្ជាក់ពីមូលហេតុទេ។

អធិការស្រុកកោះធំ លោក ស៊ីម ឃាង អះអាងថា លោកមិនទាន់បានដឹងករណីចាប់ខ្លួននេះទេ។

អ្នកនាំពាក្យស្នងការរាជធានីភ្នំពេញ លោក សាន សុខសីហា មានប្រសាសន៍ថា លោកមិនទាន់ទទួលបានព័ត៌មាននេះនៅឡើយដែរ។

លោកថា៖ «អ្នកសារព័ត៌មានខលមកខ្ញុំច្រើនដែរ ប៉ុន្តែទាក់ទងចំពោះកម្លាំងស្នងការរាជធានីភ្នំពេញ ប៉ុន្មានថ្ងៃមកនេះ អត់មានករណីឃាត់ខ្លួនខាងណាទេ។ ខ្ញុំអត់ដឹងខាងណាឃាត់ទេ តែកម្លាំងស្នងការរាជធានីភ្នំពេញអត់បានឃាត់ខ្លួនខាងណាទេ»។

នាយករងអង្គការឃ្លាំមើលសិទ្ធិមនុស្សលីកាដូ លោក អំ សំអាត អះអាងថា លោកទទួលបានព័ត៌មាននេះ ប៉ុន្តែថាមិនទាន់ដឹងពីមូលហេតុនៃការចាប់ខ្លួននេះនៅឡើយទេ។

គួរបញ្ជាក់ថា កន្លងមក យុវជនមាតាធម្មជាតិចំនួន៣នាក់ រួមមាន លោក ថុន រដ្ឋា កញ្ញា ឡុង គន្ធា និងកញ្ញា ភួន កែវរស្មី ក៏ត្រូវបានសាលាដំបូងរាជធានីភ្នំពេញ សម្រេចផ្តន្ទាទោស១៨ខែ និងពិន័យប្រាក់ម្នាក់ៗ៤លានរៀល ក្រោមបទចោទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» កាលពីថ្ងៃទី៥ ខែឧសភា ឆ្នាំ២០២១។

ពួកគេត្រូវបានចាប់ខ្លួនកាលពីថ្ងៃទី៣ ខែកញ្ញា ឆ្នាំ២០២០ បន្ទាប់ពីប្រកាសគម្រោងធ្វើយុទ្ធនាការដើរថ្មើរជើងពីវត្តភ្នំ ទៅកាន់ផ្ទះលោកនាយករដ្ឋមន្ត្រី ហ៊ុន សែន ដើម្បីដាក់ញត្តិសុំឱ្យបញ្ឈប់ការលុបបឹងកប់ស្រូវ ឬបឹងតាមោក ក្នុងរាជធានីភ្នំពេញ។ បើគិតត្រឹមថ្ងៃអង្គារនេះ ពួកគេត្រូវបានឃុំខ្លួនជាង៩ខែមកហើយ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។