រដ្ឋាភិបាលបានបន្តផ្ញើសារនយោបាយថា ខ្លួននឹងបន្តយកចិត្តទុកដាក់លើសិស្សក្រីក្រ កុមារកំព្រា ជនពិការ និងជនជាតិដើមភាគតិច ជាដើម ដើម្បីឱ្យពួកគេមានលទ្ធភាពទទួលបានការបណ្តុះបណ្តាលប្រកបដោយសមធម៌ឬស្មើគ្នា។
តាមសារលិខិត «ក្នុងឱកាសទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៤ ថ្ងៃទី១៥ មិថុនា ឆ្នាំ២០២១» កម្រាស់ជិត៤ទំព័រ លោកនាយករដ្ឋមន្ត្រី ហ៊ុន សែន លើកឡើងថា កន្លងមកនិងបច្ចុប្បន្ន រដ្ឋាភិបាលបានចាត់ទុកការអភិវឌ្ឍប្រព័ន្ធអប់រំបណ្តុះបណ្តាលបច្ចេកទេសវិជ្ជាជីវៈ ជាអាទិភាពខ្ពស់បំផុតក្នុងគ្រប់ក្របខណ្ឌគោលនយោបាយជាតិ ដើម្បីខិតខំរត់ឱ្យទាន់មហិច្ឆតាក្នុងការអភិវឌ្ឍសង្គម។
ប៉ុន្តែលោកថា ចាប់ពីឆ្នាំ២០២០មក គ្រឹះស្ថានសិក្សានៅទូទាំងប្រទេស រួមទាំងឯកជន ត្រូវបានផ្អាកសកម្មភាពជាបន្តបន្ទាប់ទៅតាមដំណាក់កាលនៃការឆ្លងជំងឺកូវីដ-១៩។ កត្តានេះធ្វើឱ្យការសិក្សាផ្តាស់ប្តូរទៅបង្រៀនតាមអនឡាញជំនួសវិញ ធ្វើឱ្យកម្មវិធីបណ្តុះបណ្តាលខ្លះត្រូវបានរៀបចំឱ្យមានភាពបត់បែន ដើម្បីធានាបាននូវនិរន្តរភាពនិងប្រសិទ្ធភាព។
លោកនាយករដ្ឋមន្ត្រី ហ៊ុន សែន បានគូសបញ្ជាក់ក្នុងសារលិខិតនោះទៀតថា៖ «ដើម្បីផ្តល់លទ្ធភាពទទួលបានការបណ្តុះបណ្តាលប្រកបដោយសមធម៌ រាជរដ្ឋាភិបាលបានពង្រីកការផ្តល់អាហារូបករណ៍កាន់តែច្រើនឡើងសម្រាប់យុវជនដែលបានបោះបង់ការសិក្សា ប្រជាពលរដ្ឋក្រីក្រ ស្ត្រី ជនពិការ កុមារកំព្រា ជនជាតិដើមភាគតិច ជនងាយរងគ្រោះ ជាលទ្ធផលរយៈពេល៥ឆ្នាំចុងក្រោយនេះ មានសិក្ខាកាម សិស្ស និស្សិត និងកម្មករ និយោជិត ជាង២០ម៉ឺននាក់ បានទទួលការបណ្តុះបណ្តាល»។
តែយ៉ាងណា សារលិខិតនោះមិនបានប្រាប់ថា រដ្ឋាភិបាលនឹងពង្រីកការផ្តល់អាហារូបករណ៍នេះក្នុងទំហំប៉ុនណានិងនៅពេលណាពិតប្រាកដនោះទេ។
ក្រៅពីនេះ រដ្ឋាភិបាលបានអំពាវនាវផងដែរ ឱ្យស្ថានីយវិទ្យុទូរទស្សន៍របស់រដ្ឋនិងឯកជនជួយផ្សព្វផ្សាយឱ្យបានទូលំទូលាយអំពីវិស័យអប់រំបណ្តុះបណ្តាលបច្ចេកទេសនេះ នូវអ្វីដែលលោកថា ដើម្បីបង្កើនការយល់ដឹងដល់សាធារណៈ៕