ក្រសួងកសិកម្ម រុក្ខាប្រមាញ់ និងនេសាទ លើកឡើងដោយទទួលស្គាល់ថា តម្រូវការនិងការផ្គត់ផ្គង់ត្រីនៅកម្ពុជានៅជួបបញ្ហាប្រឈមនិងមិនទាន់អាចដោះស្រាយបាននៅឡើយ ដោយសារកត្តាចម្បងៗមួយចំនួន។
ក្នុងសេចក្ដីប្រកាសព័ត៌មានរបស់ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី១៥ ខែមិថុនា ឆ្នាំ២០២១ ឱ្យដឹងថា បញ្ហាប្រឈមនៃការផ្គត់ផ្គង់ត្រីដែលមិនទាន់ដោះស្រាយបាននោះ បណ្តាលមកពីការថមថយផលត្រីពីធម្មជាតិដោយសារកំណើនប្រជានេសាទប្រើបច្ចេកទេសនេសាទខ្ពស់ និងជនប្រព្រឹត្តបទល្មើសកើនឡើង។ ក្រសួងបន្តថា ការរេចរឹលបរិស្ថាន ការបាត់បង់ជម្រកត្រីសម្រាប់ពងកូន ការប្រែប្រួលអាកាសធាតុនិងរបបទឹកទន្លេមេគង្គ រួមនឹងការប្រើប្រាស់ដីធ្លី ជាដើម ក៏ជាមូលហេតុធ្វើឱ្យការផ្គត់ផ្គង់ត្រីជួបបញ្ហាផងដែរ។
បន្ថែមពីលើនេះទៀត ក្រសួងថា កិច្ចសហការនិងការទទួលខុសត្រូវរបស់សមត្ថកិច្ចក្នុងការបង្ក្រាបបទល្មើសជលផលនៅមានកម្រិត បន្ទាប់ពីរដ្ឋាភិបាលបានដាក់ចេញនូវគោលនយោបាយកំណែទម្រង់នៃការផ្ទេរសិទ្ធិអំណាចទៅថ្នាក់ក្រោមជាតិកន្លងមក។
ក្រសួងបន្តទៀតថា ទីផ្សារត្រីនៅកម្ពុជាមិនមានការព្រមព្រៀងណាមួយរវាងអ្នកចិញ្ចឹមត្រីក្នុងស្រុកនិងអ្នកគាំទ្រការនាំចូល ខណៈខាងវារីវប្បករ ក៏មិនអាចផលិតនិងផ្គត់ផ្គង់ទីផ្សារត្រីក្នុងស្រុកក្នុងតម្លៃប្រកួតប្រជែងជាមួយផលិតផលនាំចូលបានឡើយ ដោយសារកត្តាមួយចំនួន។
សេចក្តីប្រកាសព័ត៌មានក្រសួងកសិកម្ម៖ «ដោយមូលហេតុទី១ ការជ្រើសរើសទីតាំងចិញ្ចឹមមានលក្ខណៈភូមិសាស្ត្រមិនសមស្រប ក្នុងនោះ ខ្វះប្រភពទឹក បរិស្ថានជុំវិញមិនគាប់ប្រសើរ។ ទី២ ការវិនិយោគលើហេដ្ឋារចនាសម្ព័ន្ធ ការងារប្រតិបត្តិការ និងចំណីក្នុងការចិញ្ចឹមមានតម្លៃខ្ពស់។ ទី៣ បណ្ដាញហេដ្ឋារចនាសម្ព័ន្ធទីផ្សារនិងការចែកចាយភាគច្រើនគ្រប់គ្រងដោយបណ្តាញអាជីវករនាំចូលត្រី»។
ជាមួយគ្នានោះដែរ ក្រសួងកសិកម្មបន្តថា វិស័យវិនិយោគឯកជនលើការធ្វើវារីវប្បកម្មនៅខ្វះទុននិងខ្វះចំណេះដឹងក្នុងការសិក្សាពីតម្រូវការទីផ្សារក្នុងនិងក្រៅប្រទេស គួបផ្សំជាមួយតម្លៃនៃការដឹកជញ្ជូនក្នុងស្រុកនិងការនាំចេញ តម្លៃសេវាក្នុងការផលិត កែច្នៃ និងស្តុក នៅមានតម្លៃខ្ពស់។
ពាក់ព័ន្ធនឹងបញ្ហាប្រឈមទាំងនេះ ក្រសួងដដែលនេះបញ្ជាក់ថា ខ្លួនបាននិងកំពុងខិតខំប្រឹងប្រែងយ៉ាងសកម្មតាមអភិក្រម «រដ្ឋ ឯកជន ដៃគូអភិវឌ្ឍន៍ និងសហគមន៍» ដើម្បីរួមចំណែកដោះស្រាយបញ្ហាប្រឈមទាំងឡាយ។
ប្រធានសមាគមវារីវប្បករកម្ពុជា លោក សុខ រ៉ាដែន ចាត់ទុកការលើកឡើងរបស់ក្រសួងកសិកម្ម គឺបានឆ្លុះបញ្ចាំងពីផលលំបាករបស់អ្នកចិញ្ចឹមត្រីនៅកម្ពុជា។
លោកថា៖ «ខ្ញុំជឿថា រដ្ឋាភិបាលលោកក៏បានជ្រាបពីបញ្ហាហ្នឹង! ខ្ញុំជឿថា លោកនឹងមានវិធានការដើម្បីទប់ស្កាត់ ដើម្បីជួយស្រោចស្រង់នូវវិស័យហ្នឹងបាន។ ខ្ញុំជឿថា លោកក៏ដឹងពីបញ្ហាហ្នឹង ហើយសង្ឃឹមថា អាជ្ញាធរគ្រប់លំដាប់ថ្នាក់នឹងជួយវិស័យហ្នឹង ប៉ុន្តែបើមិនជួយទេ យើងអាចនឹងមានបញ្ហាហើយ ដោយសារយើងលក់ត្រីមិនចេញ»។
ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន មានប្រសាសន៍ថា ប្រសិនបញ្ហាប្រឈមទាំងអស់នេះមិនត្រូវបានដោះស្រាយទេ អ្នកដែលចំណេញនោះគឺប្រទេសជិតខាងកម្ពុជា ប៉ុន្តែករណីនេះ អាចនឹងដោះស្រាយបាន លុះត្រាតែមានការចូលរួមពីគ្រប់ភាគីពាក់ព័ន្ធ ជាពិសេសរដ្ឋាភិបាល។
លោកថា៖ «យើងនឹងបាត់បង់ចំណូលសេដ្ឋកិច្ចជាតិខ្លាំងទៅលើការចំណាយវិស័យម្ហូបអាហារ ពិសេសត្រី សាច់ ដែលវានឹងហូរចូលកម្រៃនិងកំណើនសេដ្ឋកិច្ចទៅបណ្ដាប្រទេសជិតខាង។ ទី២ អាចមានបញ្ហាទាក់ទងនឹងសុវត្ថិភាពស្បៀងអាហារសម្រាប់ប្រជាពលរដ្ឋក្នុងប្រទេសកម្ពុជា។ ទី៣ វានឹងប៉ះពាល់សុខភាពដែរ ធម្មតាការនាំចូលត្រីពីបណ្ដាប្រទេសជិតខាង ក៏អាចប៉ះពាល់សុខភាព និងប៉ះពាល់សេដ្ឋកិច្ចគ្រួសារ សេដ្ឋកិច្ចសហគមន៍ សេដ្ឋកិច្ចជាតិ»។
កាលពីថ្ងៃទី២ ខែឧសភា ឆ្នាំ២០២១ សមាគមវារីវប្បករនៅកម្ពុជា បានចេញសេចក្ដីប្រកាសព័ត៌មានមួយឱ្យដឹងថា គិតត្រឹមថ្ងៃទី៣០ ខែមេសា ឆ្នាំ២០២១ ត្រីជាច្រើនប្រភេទរបស់ប្រជាពលរដ្ឋជាសមាជិកវារីវប្បករចំនួន៣១៥កន្លែង ដែលមានបរិមាណត្រីចំនួនជាង៥ពាន់តោន (៥ ៥២៧តោន) ត្រូវកកស្ទះនៅសល់ក្នុងស្រះនៅឡើយ ដោយមិនអាចលក់ចេញបាន។ ត្រីទាំងនោះមានដូចជា ត្រីប្រា ត្រីឆ្ដោ ត្រីពោ ត្រីអណ្ដែង ត្រីឆ្ពិន ត្រីទីឡាព៉្យា ត្រីក្រាញ់ និងត្រីធម្មជាតិដទៃទៀត។
សេចក្ដីប្រកាសព័ត៌មានដដែលបញ្ជាក់ថា ដោយឡែក ក្នុងខែឧសភាកន្លងទៅ ប្រជាពលរដ្ឋជាសមាជិកវារីវប្បករទាំងនោះ នៅមានត្រីចំនួនជិត៥ពាន់តោន (៤ ៨២៩តោន) ទៀត ដែលត្រូវចាប់លក់ជាបន្តបន្ទាប់ផងដែរ។
យ៉ាងណា សមាគមមួយនេះបានស្នើទៅក្រសួងចំនួន៣ រួមមាន ក្រសួងកសិកម្ម ក្រសួងពាណិជ្ជកម្ម និងក្រសួងសេដ្ឋកិច្ច ឱ្យជួយបន្តរឹតបន្តឹងការគ្រប់គ្រងត្រីនាំចូលឱ្យបានកាន់តែម៉ឺងម៉ាត់ និងដាក់ចេញនូវវិធានការជាក់លាក់ ដើម្បីដោះស្រាយបញ្ហាទីផ្សារ ព្រមទាំងហានិភ័យរបស់កសិករចិញ្ចឹមត្រីនៅកម្ពុជា៕
អត្ថបទទាក់ទង
កសិករចិញ្ចឹមត្រីស្នើរដ្ឋាភិបាលជួយដោះស្រាយបញ្ហាតម្លៃត្រីចុះថោកនិងគ្មានទីផ្សារ
ប្រជាពលរដ្ឋប្រកបរបរចិញ្ចឹមត្រីមួយចំនួនស្នើទៅក្រសួងពាក់ព័ន្ធឱ្យជួយដោះស្រាយបញ្ហាតម្លៃត្រីចុះថោកនិងគ្មានទីផ្សារលក់ចេញ ខណៈពួកគេអះអាងថា ប្រសិនបើគ្មានដំណោះស្រាយនឹងអាចបោះបង់ចោលមុខរបរនេះតែម្តង។