អាជ្ញាធរនិងមន្ត្រីអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ នៃក្រសួងពាណិជ្ជកម្មសាខាខេត្តបន្ទាយមានជ័យ បានបំផ្លាញចោលស្រាថ្នាំ«តាំងគួយ»ជាង២ម៉ឺនដបដែលមានសារធាតុគីមី ក្រោយមានមនុស្សស្លាប់ក្រោយទទួលទានស្រាថ្នាំនេះ។
កាលពីថ្ងៃទី១១ ខែមិថុនា ឆ្នាំ២០២០ ពលរដ្ឋ៧នាក់នៅខេត្តបន្ទាយមានជ័យ បានស្លាប់ជាបន្តបន្ទាប់ ក្រោយពីពួកគាត់បានទទួលទានស្រាថ្នាំចិនតាំងគួយ ខណៈម្ចាស់សិប្បកម្មផលិតស្រាថ្នាំចិនសែមួយនេះបានរត់គេចខ្លួន។
អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ នៃក្រសួងពាណិជ្ជកម្ម បានផ្សព្វផ្សាយលើហ្វេសប៊ុករបស់ខ្លួន កាលពីថ្ងៃទី១៧ ខែមិថុនា ឆ្នាំ២០២១ ថាស្រាថ្នាំតាំងគួយ ចំនួន២៧ ៧៥៦ដប ដែលមានសារធាតុគីមី ត្រូវបានអាជ្ញាធរនិងមន្ត្រី ក.ប.ប បំផ្លាញចោលនៅក្នុងសង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
អភិបាលក្រុងប៉ោយប៉ែត លោក គាត ហ៊ុល ប្រាប់ វីអូឌី នៅថ្ងៃសុក្រនេះថា ស្រាថ្នាំ«តាំងគួយ»ដែលអាជ្ញាធរបំផ្លាញចោលនោះ គឺមន្ត្រីអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ នៃក្រសួងពាណិជ្ជកម្មសាខាខេត្តបន្ទាយមានជ័យ ដកហូតយកមករក្សាទុកតាំងពីឆ្នាំមុន ហើយទើបតែបំផ្លាញចោលនៅពេលនេះ។
អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន មិនទាន់អាចបញ្ជាក់បានថា រហូតដល់ពេលនេះ ម្ចាស់សិប្បកម្មផលិតស្រាថ្នាំ«តាំងគួយ»នោះ ត្រូវបានចាប់ខ្លួនឬនៅទេ ដោយរង់ចាំពិនិត្យមើលសិន។
លោកបន្ថែមថា៖ «រឿងនេះយូរហើយ មកសួរខ្ញុំភ្លាមៗ ចង់បានចម្លើយល្អម៉េចបាន ចាំខ្ញុំឆែកមើលសិន»។
អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានឱ្យដឹងថា ស្រាថ្នាំតាំងគួយដែលបណ្តាលឱ្យមនុស្សពុលស្លាប់ចំនួន៧នាក់ ពិនិត្យឃើញថា ក្នុងស្រាថ្នាំនេះមានសារធាតុមេតាណុលកម្រិតខ្ពស់ដល់១៤ភាគរយ ដែលកម្រិតអនុញ្ញាតឱ្យប្រើមានតែ០,២ភាគរយប៉ុណ្ណោះ។
អគ្គនាយកដ្ឋានមួយនេះ ឱ្យដឹងទៀតថា ការផលិតស្រាថ្នាំនេះក៏ល្មើសនឹងច្បាប់ស្តីពីការគ្រប់គ្រងគុណភាពសុវត្ថិភាពលើផលិតផលទំនិញនិងសេវា ដែលត្រូវហាមឃាត់ការធ្វើពាណិជ្ជកម្មនូវផលិតផលម្ហូបអាហារដែលមានសភាពប្រែប្រួលខូចគុណភាព ឬមានជាតិពុល ឬផលិតផលនោះមិនស្របនឹងលក្ខណៈវិនិច្ឆ័យគុណភាពផ្នែកអតិសុខុមជីវសាស្រ្ត ឬអនាម័យ ដែលអ្នកផលិតប្រឈមជាប់ទោសដាក់ពន្ធនាគារពី១ខែ ដល់១ឆ្នាំ និងពិន័យជាប្រាក់ពី៥ ០០០ ០០០រៀល ដល់១០ ០០០ ០០០រៀល៕
