សង្គមស៊ីវិលឱ្យដឹងថា ពលករខ្មែរចំណាកស្រុកទៅធ្វើការនៅប្រទេសថៃដែលមានប្រមាណ១លាននាក់ កំពុងប្រឈមបញ្ហាធ្លាក់ចុះចំណូល ដោយសារការឆ្លងនិងវិធានការទប់ស្កាត់ជំងឺកូវីដ-១៩តាមរោងចក្រ ដែលនាំឱ្យពួកគេខ្លះសម្រេចចិត្តត្រឡប់មកស្រុកកំណើតវិញ។
មន្រ្តីគម្រោងនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) ប្រចាំប្រទេសថៃ លោក លឹង សុផុន ប្រាប់ វីអូឌី នៅថ្ងៃទី១៨ ខែមិថុនានេះថា ស្ថានភាពរីករាលដាលជំងឺកូវីដ-១៩ក្នុងប្រទេសថៃ បានកើនពីជាង១ ០០០ករណីក្នុង១ថ្ងៃ នៅក្នុងខែឧសភា ដល់ជាង៣ ០០០ករណីក្នុងមួយថ្ងៃ ចាប់ពីដើមខែមិថុនាមក ខណៈមេរោគនេះបន្តរីករាលដាលពាសពេញពិភពលោកជិត២ឆ្នាំ។
លោកថា រោងចក្រដែលមានពលករខ្មែរកំពុងបម្រើការច្រើន ដូចជា នៅខេត្តសាមុតប្រាកាន សាមុតសាខន រ៉ាយ៉ង បាធុនថានី និងជាយក្រុងថេប ជាដើម បានផ្ទុះការចម្លង និងត្រូវបានអាជ្ញាធរបិទខ្ទប់ជាបន្តបន្ទាប់ ដើម្បីទប់ស្កាត់ការឆ្លងរាលដាលចូលសហគមន៍ខាងក្រៅ។ លោកបន្ថែមថា មានកម្មករខ្មែរជាច្រើននាក់ឆ្លងជំងឺនេះ ប៉ុន្តែមិនអាចដឹងប៉ុន្មាននាក់នោះទេ ខណៈអាជ្ញាធរមិនបានបញ្ចេញជាសាធារណៈ។
មន្រ្តីសង្គមស៊ីវិលដដែលបន្តថា បញ្ហានេះកំពុងប៉ះពាល់ដល់ជីវភាពពលករខ្មែរជាច្រើន ពិសេសអ្នកដែលមិនមានឯកសារត្រឹមត្រូវ អ្នកកាន់បណ្ណការងារឬលិខិតឆ្លងដែនហួសសុពលភាព និងអ្នកធ្វើការក្នុងវិស័យសាងសង់ដែលបើកប្រាក់ថ្ងៃ ខណៈថៅកែរបស់ពួកគេមួយចំនួនមិនទទួលខុសត្រូវ។
លោក លឹង សុផុន និយាយថា៖ «នៅពេលដែលមានបញ្ហាផ្ទុះកូវីដភ្លាម នៅពេលដែលគេត្រួតពិនិត្យឃើញ ថៅកែខ្លះអត់ទទួលស្គាល់ ថៅកែខ្លះគាត់មកប្រឈម មកទទួល! តែថៅកែកន្លែងខ្លះទៀត គាត់មិនបានជួយដោះស្រាយទេ ក៏គេចវេះពីបញ្ហាទាំងអស់ហ្នឹងក៏មានដែរ អ៊ីចឹងហើយបានជាខ្ញុំថាមានការស្មុគស្មាញអ៊ីចឹង»។
ប្រភពដដែលបន្ថែមថា ពលករមួយចំនួនបានសម្រេចត្រឡប់មកស្រុកកំណើតវិញ ដោយសារពួកគេបារម្ភខ្លាចឆ្លងជំងឺក្នុងកន្លែងការងារនិងនៅពេលធ្វើចត្តាឡីស័ក ដែលនាំឱ្យប៉ះពាល់ដល់ប្រាក់ចំណូលចាំបាច់សម្រាប់ផ្គត់ផ្គង់ជីវភាពនិងដោះស្រាយបំណុល។
លោកថា៖ «យើងឃើញថា ពលករ អ្នកខ្លះគាត់មករកការងារមិនទាន់បានផង បើសិនជាមានការឆ្លង អ្នកខ្លះបានហើយបែរជាឯកសារមិនត្រឹមត្រូវតាមច្បាប់អីអ៊ីចឹង។ ហើយខ្ញុំលើកឡើងខាងដើមអ៊ីចឹង ពលករដែលគ្នារស់នៅបែបខុសច្បាប់ មិនទាន់មានសិទ្ធិពេញលេញផង ហើយមានការឆ្លងអ៊ីចឹង រឹតតែព្រួយបារម្ភទៀត»។
ពលករបម្រើការនៅរោងចក្រផលិតត្រីខកំប៉ុងមួយកន្លែងនៅខេត្តសាមុតប្រាកាន លោក នួន ណារិន លើកឡើងថា នៅរោងចក្ររបស់លោកមានពលករខ្មែរប្រមាណ៦០០នាក់។ លោកថា ក្នុងនោះ មួយចំនួនបានឆ្លងជំងឺកូវីដ-១៩ រាប់ទាំងលោកនិងភរិយា។
លោកនិយាយថា៖ «បងប្អូនខ្មែរយើងច្រើនណាស់បងអើយ! រោងចក្រខ្ញុំនៅហ្នឹងភាគច្រើនខ្មែរ ឆ្លងទៅ ខ្លះគេឱ្យទៅត្រួតទៅ។ ដល់ពេលត្រួតដឹងលទ្ធផលទៅ ខ្លះអត់ទាន់ដឹង ខ្លះដឹងទៅក៏រត់ទៅផ្ទះខ្លះទៅ ខ្លះទៅដឹងហើយគេយកទៅព្យាបាលទៅ […] មិនដឹងថាម៉េចទេ ខ្លះក៏ទៅព្យាបាលនៅខ្មែរយើងទៅ»។
យ៉ាងណា បុរសវ័យ៤៤ឆ្នាំ មានស្រុកកំណើតក្នុងខេត្តព្រៃវែងរូបនេះ បញ្ជាក់ថា លោកនិងភរិយាបានជាពីជំងឺនិងបានធ្វើចត្តាឡីស័ក១៤ថ្ងៃរួចហើយ។ លោកថា ខាងរោងចក្រសន្យាផ្តល់ប្រាក់ខែ៤ ០០០បាត សម្រាប់រយៈពេលអវត្តមានពីការងារ ខណៈលោកអាចធ្វើការបានពី១៥ ០០០ ទៅ១៦ ០០០បាត ក្នុងមួយខែ ដោយបូកទាំងប្រាក់ថែមម៉ោង។
លោក នួន ណារិន និយាយថា៖ «អារម្មណ៍នៅតែខ្លាច ភ័យខ្លាចនៅតែឆ្លងទៀត! ធ្វើយ៉ាងម៉េច ដោយសារជីវភាពយើង ចេះតែស៊ូៗមកធ្វើទៅ។ តែប្រពន្ធខ្ញុំគាត់អាការគាត់ធ្ងន់អ៊ីចឹង អត់ទាន់បានមកធ្វើទេ គ្នាសម្រាកទាល់តែយើងជាស្រួលបួល បានមកបាន»។
ពលករខ្មែរបម្រើការផ្នែកសាងសង់មួយរូបឈ្មោះ ផាន់ សុផល បានឱ្យដឹងថា លោកបានសម្រេចត្រឡប់មកស្រុកកំណើតនៅក្នុងខេត្តបន្ទាយមានជ័យវិញ ជាមួយពលករខ្មែរជាច្រើនទៀត កាលពីខែឧសភា បន្ទាប់ពីមានការផ្ទុះនៅជុំវិញតំបន់ដែលលោកធ្វើការក្នុងខេត្តរ៉ាយ៉ង។
លោកថា លោកបានចំណាយពេលធ្វើចត្តាឡីស័ករហូតដល់១ខែនៅមណ្ឌលចត្តាឡីស័ក ដោយសារលោកបានពាក់ព័ន្ធនឹងពលករមានវិជ្ជមានកូវីដ-១៩ មុននឹងបានត្រឡប់មកស្រុកកំណើតវិញ។
បុរសវ័យ២៩ឆ្នាំរូបនេះបន្ថែមថា មូលហេតុដែលលោកសម្រេចត្រឡប់មកស្រុកកំណើតវិញ គឺដោយសារបារម្ភខ្លាចឆ្លងជំងឺកូវីដ-១៩នៅក្នុងប្រទេសគេ ខណៈនៅទីនោះមានមនុស្សរស់នៅច្រើន ហើយមានពលករខ្មែរនិងពលករថៃធ្វើការនិងស្នាក់នៅក្នុងអគារជាមួយគ្នា។
លោក ផាន់ សុផល និយាយថា៖ «កូវីដ ដល់ពេលអ៊ីចឹងទៅបងអើយ ពិបាក! មិនថាវៀតណាម មិនថាខ្មែរ មិនថាថៃទេ បងអើយ ពិបាកដូចតែគ្នា។ នោះទីនោះខ្ញុំ ដល់ពេលខ្ញុំចោលផ្ទះអ៊ីចឹង ខ្ញុំពិបាក! ដល់អ៊ីចឹង ខ្ញុំក៏ត្រឡប់មកផ្ទះទៅ»។
អ្នកនាំពាក្យក្រសួងការបរទេសកម្ពុជា លោក កុយ គួង លើកឡើងថា ពលករខ្មែរដែលកំពុងបម្រើការនៅក្នុងប្រទេសថៃ មានចំនួនប្រមាណ១លាននាក់។ យ៉ាងណា លោកមិនបានទទួលព័ត៌មានថា ពួកគេប៉ុន្មាននាក់បានឆ្លងជំងឺកូវីដ-១៩នៅទីនោះទេ។
លោកបន្ថែមថា ស្ថានទូតនិងស្ថានកុងស៊ុលកម្ពុជានៅប្រទេសថៃ តែងយកចិត្តទុកដាក់ជាប្រចាំដល់ពលករខ្មែរ ហើយសហការជាមួយអាជ្ញាធរថៃ ក៏ដូចជាសហការជាមួយថៅកែរោងចក្រ ដើម្បីសម្របសម្រួលជួយពួកគាត់ និងតែងចែកស្បៀងអាហារដល់អ្នកដែលមានស្ថានភាពលំបាកខ្លាំង។
លោកប្រាប់ វីអូឌី តាមសារ Telegram បន្ថែមថា៖ «ដើម្បីបង្ការការរីករាលដាល យើងមិនបានលើកទឹកចិត្តឱ្យពួកគាត់ធ្វើដំណើរពីកន្លែងមួយទៅកន្លែងមួយទៀតទេ ជាពិសេសការឆ្លងកាត់ព្រំដែន»។
វីអូឌី មិនអាចទាក់ទងសុំការឆ្លើយតបពីអ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន ពីចំនួនពលករខ្មែរដែលត្រឡប់មកពីប្រទេសថៃក្នុងរយៈពេលមួយសប្តាហ៍ចុងក្រោយនេះ ថាមានការកើនឡើងឬយ៉ាងណានោះទេ។ យ៉ាងណា លោកបានប្រាប់កាលពីថ្ងៃចន្ទសប្តាហ៍មុនថា ក្នុងមួយថ្ងៃ ពលករចំណាកស្រុកខ្មែរត្រឡប់មកពីប្រទេសថៃមានប្រមាណ៤០នាក់៕
