ក្រុមអង្គការ-សមាគម អំពាវនាវឱ្យរដ្ឋាភិបាលបង្កើនការយកចិត្តទុកដាក់ដល់កម្មករដែលបាត់បង់ការងារដោយសារការអូសបន្លាយនៃការឆ្លងរាលដាលកូវីដ-១៩ ដោយថា បញ្ហានេះកំពុងជំរុញឱ្យពួកគាត់ប្រឈមនឹងការកើនឡើងនូវបំណុល និងបង្កឱ្យមានហានិភ័យដល់សុខភាពសាធារណៈ។
ការទាមទារនេះបានធ្វើឡើងតាមរយៈសេចក្តីថ្លែងការណ៍មួយរបស់អង្គការសមាគមចំនួន២២ ចុះថ្ងៃទី១៧ ខែមិថុនា ឆ្នាំ២០២១នេះ។
អង្គការទាំងនោះបានលើកឡើងក្នុងសេចក្តីថ្លែងការណ៍នោះថា ការរីករាលដាលនៃជំងឺកូវីដ-១៩ រួមទាំងវិធានការនានា កន្លងមកនេះ កំពុងគំរាមកំហែងដល់សិទ្ធិជាមូលដ្ឋានរបស់កម្មករ ទាំងអ្នកប្រកបមុខរបរសេដ្ឋកិច្ចក្រៅប្រព័ន្ធនិងក្នុងប្រព័ន្ធ ធ្វើឱ្យពួកគេបាត់បង់ប្រាក់ចំណូល ថែមទាំងប្រឈមនឹងបញ្ហាជាច្រើន។
បញ្ហាចម្បងមួយក្នុងចំណោមបញ្ហាជាច្រើនដែលក្រុមអង្គការសមាគមលើកយកមកបង្ហាញ នោះគឺ «ការកើនឡើងនូវបំណុលថ្មី ដើម្បីដោះស្រាយបញ្ហាជីវភាពប្រចាំថ្ងៃ»។
ក្រុមអង្គការទាំងនោះបានគូសបញ្ជាក់ថា បញ្ហាបំណុលកើនឡើង ដោយសារពួកគេបាត់បង់ការងារយូរខែ ព្រោះតែការគំរាមកំហែងពីជំងឺកូវីដ-១៩ ស្របគ្នានឹងការមិនទទួលបានការគាំពារជំនួយសង្គមផងនោះ បានទាញទម្លាក់ជីវភាពពួកគេឱ្យខ្វះលទ្ធភាពក្នុងការបង់ថ្លៃបន្ទប់ជួល ថ្លៃទឹក ភ្លើង និងការចំណាយលើស្បៀងអាហារដែលហក់ឡើងខ្ពស់ផងដែរ។
បញ្ហានេះ អង្គការទាំងនោះបានចោទទៅលើកត្តាកង្វះជំនួយសង្គម ដែលធ្វើឱ្យកម្មករមិនអាចរើខ្លួនរួចពីការដោះស្រាយបញ្ហាបំណុល ខណៈអំឡុងពេលកម្ពុជាផ្ទុះជំងឺឆ្លងកូវីដ-១៩ រដ្ឋាភិបាលឧបត្ថម្ភកម្មករដែលបាត់បង់ការងារម្នាក់ត្រឹម៤០ដុល្លារក្នុង១ខែ និងឧបត្ថម្ភប្រាក់១៦ម៉ឺនរៀលតែម្តងគត់ដល់កម្មករមួយចំនួននៅក្នុងតំបន់បិទខ្ទប់ រួមទាំងការផ្តល់ស្បៀងអាហារ ជាដើម។
បញ្ហានេះ អង្គការសមាគមចំនួន២២ ដែលមានទាំងសហព័ន្ធសហជីពកម្ពុជាផងនោះ បានស្នើរដ្ឋាភិបាលបន្តយកចិត្តទុកដាក់ពង្រីកវិសាលភាពផ្តល់ការគាំទ្រដល់កម្មករក្នុងនិងក្រៅប្រព័ន្ធ នូវសេវាសាធារណៈជាតម្រូវការមូលដ្ឋាន ដូចជា ជម្រក ទឹក ភ្លើង បញ្ហាជីវភាព ផ្អាកការសងបំណុល អំឡុងនៃការរីករាលដាលជំងឺកូវីដ-១៩នេះ។
លោកស្រី យ៉ាង សុភ័ណ្ឌ ប្រធានសហព័ន្ធសហជីពកម្ពុជា និយាយថា បើរដ្ឋាភិបាលមិនជួយអន្តរាគមន៍ទាន់ពេលទេ អ្នកងាយរងគ្រោះទាំងនោះនឹងធ្វើអ្វីគ្រប់យ៉ាងដើម្បីតែបញ្ហាក្រពះ ទោះប្រឈមនឹងហានិភ័យខ្ពស់នៃការឆ្លងជំងឺកូវីដ-១៩ ក៏ដោយ ដែលនោះជាក្តីបារម្ភដល់ការធ្លាក់ចូលវិបត្តិធំមិនអាចស្រោចស្រង់បាន។
លោកស្រីថា៖ «មកដល់ដំណាក់កាលឥលូវនេះ នៅពេលដែលខ្ញុំជួបពិភាក្សាជាមួយសមាជិកនៅមូលដ្ឋាន ភាគច្រើនគាត់អត់សូវជាខ្វល់ខ្វាយអីច្រើនទេ គាត់គិតថា ទី១ គាត់ត្រូវរកលុយដើម្បីផ្គត់ផ្គង់ចិញ្ចឹមកូនចៅរបស់គាត់ អ៊ីចឹងរកគ្រប់មធ្យោបាយណាក៏ដោយឱ្យតែគាត់រកថវិកា អាចរស់បានក្នុងដំណាក់កាលហ្នឹង គឺគាត់ធ្វើទាំងអស់»។
ប្រធានក្រុមអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន បានច្រានចោលការទាមទារនេះ ដោយថា ការខ្ចីបំណុលជាការទទួលខុសត្រូវរវាងអ្នកខ្ចីនិងម្ចាស់បំណុល ហើយសម្រាប់អ្នកដែលរងផលប៉ះពាល់ដោយជំងឺកូវីដ-១៩ដែលជួបបញ្ហាខ្វះស្បៀងនិងធ្លាក់ខ្លួនក្រ ត្រូវទាក់ទងអាជ្ញាធរមូលដ្ឋានដែលជាសេនាធិការរបស់រដ្ឋាភិបាលសម្រាប់ដោះស្រាយបញ្ហានេះ។
លោកថា៖ «ទី១ នៅពេលដែលគាត់ទៅខ្ចីលុយពីធនាគារ មិនមែនតំណាងរដ្ឋាភិបាលទៅចូលរួមទេ អាហ្នឹងត្រូវគាត់ទទួលខុសត្រូវខ្លួនគាត់ចំពោះមុខធនាគារ។ រាជរដ្ឋាភិបាលបានរៀបចំនិងសំណូមពរឱ្យម្ចាស់ធនាគារដែលជាម្ចាស់បំណុលហ្នឹងសម្របសម្រួលជាមួយកូនបំណុលរបស់ខ្លួនហើយ»។
អ្នកប្រកបរបរសេដ្ឋកិច្ចក្រៅប្រព័ន្ធ ជាអ្នករត់ម៉ូតូកង់បី នៅរាជធានីភ្នំពេញ លោក ហេង សុភក្រ្តា និយាយថា មុនផ្ទុះជំងឺកូវីដ-១៩ គាត់ជាប់បំណុលធនាគារតែមួយម្ចាស់ប៉ុណ្ណោះ។ ប៉ុន្តែថា ក្រោយជំងឺនេះបន្តរីករាលដាលខ្លាំងរហូតដល់មានការបិទខ្ទប់រាជធានីភ្នំពេញ ធ្វើឱ្យបំណុលគាត់បានកើនឡើងដល់៦ម្ចាស់។
បុរសវ័យ៤១ឆ្នាំរូបនេះ បញ្ជាក់ថា មូលហេតុកើនឡើងបំណុលនេះ ដោយសារអំឡុងនៃការបិទខ្ទប់មិនអាចចេញទៅប្រកបមុខរបរបាន ហើយត្រូវប្រឈមនឹងការបង់ថ្លៃផ្ទះ ទឹក និងភ្លើង បញ្ហាជីវភាពប្រចាំថ្ងៃ និងបង់រម្លស់ថ្លៃម៉ូតូកង់បីជាដើម។
លោកថា៖ «ម្ចាស់បំណុលចូល៦ហើយ [យកធ្វើអ្វីខ្លះ?] ទី១ បង់ភ្លើង! បន្ទាប់មក កង់បីខ្ចី[លុយ]គេទៀត […] មួយរយៈនៃការបិទខ្ទប់ហ្នឹង ឮថាថ្លៃទឹកថ្លៃភ្លើងអីហ្នឹង រដ្ឋជួយខ្លះជួយអីហ្នឹង ដូចអត់មានទាន់ឃើញទាល់ឥលូវ។ ប៉ុន្តែជំនាន់គេបិទខ្ទប់ហ្នឹង ខ្ញុំបានអង្ករ២៥គីឡូម្តង»។
អង្គការសហប្រជាជាតិប្រចាំកម្ពុជា កាលពីថ្ងៃអង្គារ បានចេញផ្សាយអត្ថបទមួយថា «ខណៈដែលជំងឺកូវីដ-១៩ បានជះឥទ្ធិពលយ៉ាងខ្លាំងដល់ឧស្សាហកម្មកាត់ដេរនៅកម្ពុជា ស្ត្រីចំនួន៨០ភាគរយនៃកម្លាំងពលកម្មក្នុងវិស័យកាត់ដេរនេះ បានរងផលប៉ះពាល់ធ្ងន់ធ្ងរជាងគេ ដោយប្រឈមនឹងការកើនឡើងនូវវិសមភាពនិងភាពក្រីក្រ»។
អត្ថបទនោះបានគូសបញ្ជាក់ថា ការរាតត្បាតនៃជំងឺនេះធ្វើឱ្យរោងចក្រមួយចំនួនឈានទៅដល់ការបិទទ្វារជាបណ្តោះអាសន្ បញ្ឈប់បុគ្គលិកពីការងារ និងការមិនទទួលបានប្រាក់ពេលឈប់សម្រាក បានប៉ះពាល់ដល់ការរស់នៅជាប្រចាំថ្ងៃរបស់កម្មករផ្នែកកាត់ដេរប្រមាណ៩០ម៉ឺននាក់។
អង្គការអន្តរជាតិមួយនេះបន្តទៀតថា វិបត្តិនេះក៏បានធ្វើឱ្យកម្មករជាច្រើនខ្វះលទ្ធភាពក្នុងការទទួលបានកញ្ចប់សុវត្ថិភាពសង្គម ដូចជា គ្មានការងារធ្វើ ប្រឈមនឹងការធ្លាក់ទៅក្នុងភាពក្រីក្រ និងភាពអត់ឃ្លាន ហើយបញ្ហានេះបានជះឥទ្ធិពលដល់សមាជិកគ្រួសាររបស់ពួកគេ និងអ្នកប្រកបរបរសេដ្ឋកិច្ចក្រៅប្រព័ន្ធជុំវិញរោងចក្រផងដែរ៕
អត្ថបទទាក់ទង
កម្មកររាប់រយនាក់នៅរោងចក្រមួយនៅភ្នំពេញឆ្លងកូវីដ-១៩ ខណៈចាក់វ៉ាក់សាំងរួចទាំង២លើក
កម្មករជាច្រើនរយនាក់ដែលបម្រើការងារនៅរោងចក្រមួយឈ្មោះ Y&W ក្នុងខណ្ឌដង្កោ រាជធានីភ្នំពេញ ដែលបានរកឃើញវិជ្ជមានជំងឺកូវីដ-១៩ នៅសប្តាហ៍មុន ត្រូវបានតំណាងកម្មករអះអាងថា ពួកគេបានចាក់វ៉ាក់សាំងប្រឆាំងជំងឺផ្លូវដង្ហើមថ្មីមួយនេះទាំង២លើករួចរាល់ហើយ។
