យុវជនមានតួនាទីសំខាន់ក្នុងការការពារបរិស្ថាន ដោយមានច្បាប់និងគោលនយោបាយនានាលើកទឹកចិត្ត ប៉ុន្ដែពួកគេត្រូវបានរងនូវការរឹតត្បិតសេរីភាពក្នុងការចូលរួមសកម្មភាពទៅវិញ។
លោក ចាន់ សារិន ជាយុវជនព្រៃឡង់រយៈពេល៦ឆ្នាំ បានប្រាប់ វីអូឌី ថាការចូលរួមជាសកម្មជនការពារបរិស្ថាននេះ ដោយសារតែលោកមើលឃើញពីវិនាសកម្មព្រៃឈើ តាមរយៈការកាប់បំផ្លាញព្រៃឈើ ដែលវានឹងធ្វើឱ្យប៉ះពាល់ដល់ភពផែនដី ការឡើងកម្ដៅផែនដី ឬបាតុភូតគ្រោះធម្មជាតិ ដូចជា ខ្យល់ព្យុះ ឬទឹកជំនន់ ជាដើម។
សកម្មជនរូបនេះបន្ដថា៖ «ទឹកចិត្តខ្ញុំចង់ឱ្យព្រៃឈើនៅស្រស់បំព្រង ដូចដូនតាដែលបន្សល់ទុកពីដើមមក គាត់មិនដែលបានកាប់បំផ្លាញទេ»។
ដោយសារតែទឹកចិត្តរបស់គាត់ ឆន្ទៈ ការស្រឡាញ់ធនធានធម្មជាតិដូចជាព្រៃឈើជាដើម លោក ចាន់ សារិន បានប្ដេជ្ញាចិត្តដោយខ្លួនឯង ដើម្បីការពារព្រៃឈើឱ្យបានគង់វង្សសម្រាប់ក្មេងៗជំនាន់ក្រោយ និងជួយផែនដីកុំឱ្យមានគ្រោះធម្មជាតិ។
សកម្មជនព្រៃឡង់រូបនេះលើកឡើងថា៖ «ស្ថានភាពសព្វថ្ងៃពិបាក ដោយសារតែមន្ដ្រីបរិស្ថានអត់ឱ្យបណ្ដាញសកម្មជនព្រៃឡង់ចុះល្បាតទេ»។
សកម្មជនអាយុ២៧ឆ្នាំរូបនេះ និយាយថា យុវជនជាទំពាងស្នងឫស្សីដ៏សំខាន់ គួរតែចូលរួមជួយដាំកូនឈើឡើងវិញផងដែរ។
នៅក្នុងទិវាបរិស្ថានពិភពលោកឆ្នាំ២០២១ កាលពីដើមខែមិថុនាកន្លងទៅនេះ សកម្មជនព្រៃឈើរូបនេះក៏បានចូលរួមជាមួយអង្គការសង្គមស៊ីវិលផ្សេងទៀត ដើម្បីផ្សព្វផ្សាយពីបញ្ហាបរិស្ថាននិងព្រៃឈើផងដែរ។
សកម្មជនការពារព្រៃឈើរូបនេះបានលើកឡើងថា៖ «ព្រៃឈើ គឺជាជីវិតយើងទាំងអស់គ្នា! ចូលរួមការពារព្រៃឈើនិងធនធានធម្មជាតិដែលជាសម្បត្តិដូនតារបស់យើងឱ្យបានគង់វង្ស ដើម្បីឱ្យក្មេងៗជំនាន់ក្រោយបានស្គាល់»។
ប្រធានផ្នែកកម្មវិធីស្រាវជ្រាវ និងតស៊ូមតិនៃបណ្ដាញសមាគមយុវជនកម្ពុជា លោក ហេង គីមហុង បានប្រាប់ វីអូឌី ថាយុវជនិងប្រជាពលរដ្ឋពិតជាមានតួនាទីសំខាន់ណាស់ក្នុងការចូលរួមការពារធនធានធម្មជាតិ ពីព្រោះយុវជនជាក្រុមអ្នករៀនសូត្រ ជាអ្នកមានគំនិតសិក្សាស្វែងយល់ក្នុងការការពារបរិស្ថានច្រើន ហើយស្ថិតក្នុងស្ថានភាពមួយដែលមានការវិវត្តសង្គមពីមួយដំណាក់កាលទៅមួយដំណាក់កាល។
លោក ហេង គីមហុង លើកឡើងថា៖ «បើសិនគ្មានការចូលរួមពីយុវជននិងប្រជាពលរដ្ឋក្នុងការចូលរួមការពារបរិស្ថានទេ នោះជនខិលខូច ជាពិសេសក្រុមអ្នកចង់បំផ្លាញឫក៏ចង់ទាញយកផលប្រយោជន៍ពីបរិស្ថានហ្នឹង នឹងឆ្លៀតឱកាសទាញយកផលប្រយោជន៍ហួសហេតុច្រើនដែលធ្វើឱ្យខូចបរិស្ថាន»។
លោកបន្តថា៖ «សម្រាប់ប្រទេសកម្ពុជា ការចូលរួមរបស់ប្រជាពលរដ្ឋ ជាពិសេសសកម្មជនវ័យក្មេងដែលមានទឹកចិត្តមោះមុតក្នុងការចូលរួមការពារធនធានធម្មជាតិនិងបរិស្ថាននោះ បែរជាត្រូវរងការរឹតត្បិតទៅវិញ»។
លោកបន្ថែមថា បើទោះបីជាច្បាប់និងគោលនយោបាយនានាមានការលើកទឹកចិត្តក៏ពិតមែន ប៉ុន្ដែបែរជាមានរឹតត្បិតពីសំណាក់មន្រ្ដីមួយចំនួនទៅវិញ។
ដោយលោកបានពន្យល់ថា ថ្មីៗនេះ តុលាការសម្រេចឃុំខ្លួនសកម្មជនមាតាធម្មជាតិ៣នាក់ ដោយពួកគាត់គ្រាន់តែមានចេតនាពិភាក្សាកុំឱ្យមានការលុបបឹងតាមោក ព្រោះវាមានតួនាទីសំខាន់ក្នុងការគ្រប់គ្រងបរិស្ថាននិងលំហូរទឹកស្អុយក្នុងទីក្រុងភ្នំពេញ។
ដើម្បីឱ្យយុវជនអនុវត្តសិទ្ធិខ្លួនឯងបានពេញលេញ លោក ហេង គីមហុង លើកឡើងថា៖ «ពួកគាត់ត្រូវសិក្សាស្វែងយល់អំពីច្បាប់ឱ្យបានច្រើន មានចំណេះដឹងឱ្យបានខ្ពស់ ហើយឈរលើឆន្ទៈឱ្យពិតប្រាកដក្នុងការរក្សានិងការពារបរិស្ថានឱ្យមាននិរន្ដរភាព សម្រាប់ការចូលរួមរបស់ខ្លួនផងនិងសម្រាប់ទុកជាមរតកសម្រាប់អ្នកជំនាន់ក្រោយផង»។
លោកបានលើកឡើងបន្ថែមថា យុវជនគួរតែផ្លាស់ប្ដូរឥរិយាបថការប្រើប្រាស់សម្ភារជុំវិញខ្លួន ដូចជា កុំប្រើប្រាស់ប្លាស្ទិកច្រើនពេក ដោយប្រើប្រាស់ឧបករណ៍កែច្នៃឡើងវិញបាន។ លោកបន្ដថា យុវជនគួរតែចាប់ផ្ដើមចែករំលែកចំណេះដឹងអំពីសារៈប្រយោជន៍នៃបរិស្ថានទៅសហគមន៍របស់ខ្លួន និងអនុវត្តសិទ្ធិនិងករណីយកិច្ចដែលកំណត់ដោយច្បាប់ទាំងឡាយក្នុងការចូលរួមការពារ ជាពិសេសចូលរួមទប់ស្កាត់បទល្មើសធំៗដែលបង្កឱ្យមានការបំផ្លិចបំផ្លាញដល់បរិស្ថាន។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន ស្វាគមន៍និងលើកទឹកចិត្តសម្រាប់យុវជនក្នុងការចូលរួមការពារបរិស្ថាននិងធនធានធម្មជាតិ ព្រោះជាតួនាទីរបស់ពលរដ្ឋទាំងអស់គ្នា។ តែអ្វីដែលជាសំណូមពររបស់លោក គឺការចូលរួមដោយមានភាពស្មោះត្រង់ និងធ្វើការងារបម្រើឱ្យផលប្រយោជន៍សហគមន៍ ដោយមិនមានរបៀបវារៈនយោបាយនៅពីក្រោយខ្នង។
លោក នេត្រ ភក្ត្រា លើកឡើងថា ការចូលរួមរបស់យុវជនមានគ្រប់រូបភាព មានការអនុវត្តផ្ទាល់ទៅលើបរិស្ថាននិងធនធានធម្មជាតិ។ លោកពន្យល់ថា យុវជនត្រូវចូលរួមសម្អាត ថែរក្សាអនាម័យបរិស្ថានឱ្យបានល្អស្អាត ឱ្យមានផាសុកភាព ការរស់នៅស្អាតមានអនាម័យ។
អ្នកនាំពាក្យរូបនេះបន្ថែមថា៖ «ការចូលរួមជាមួយសង្គម គឺការចូលរួមសម្អាតអនាម័យបរិស្ថានជារួមនៅក្នុងសកម្មភាពផ្សេងៗ ជាការជំរុញលើកទឹកចិត្ត ក៏ដូចជាបណ្ដុះស្មារតីឱ្យមានការស្រឡាញ់បរិស្ថាន»។
លោកបន្ដថា៖ «ពួកគាត់អាចចូលរួមដាំដើមឈើ ចូលរួមសកម្មភាពផ្សេងទៀតដែលជាសកម្មភាពមានភាពស្មោះត្រង់ក្នុងកិច្ចការពារនិងអភិរក្សធនធានធម្មជាតិរបស់យើង»។
ពាក់ព័ន្ធនឹងការការពារនិងអភិរក្សធនធានធម្មជាតិនេះដែរ អ្នកនាំពាក្យក្រសួងបរិស្ថានរូបនេះបញ្ជាក់ថា ក្រសួងបានធ្វើកិច្ចការសំខាន់ទៅលើសសរស្ដម្ភចំនួន៤ចំណុច ក្នុងនោះ ផ្ដោតទៅលើកិច្ចការពារបរិស្ថាន ដោយគិតគូរពីគោលនយោបាយក្នុងការផ្ដល់កិច្ចគាំពារបរិស្ថាន សម្រាប់ការរស់នៅរបស់ប្រជាពលរដ្ឋមានផាសុកភាពនិងគុណភាពល្អ។
លោកបន្តថា ក្រសួងបាននិងកំពុងធ្វើការងារអភិរក្សធនធានធម្មជាតិលើផ្ទៃដី៧លាន៣សែនហិកតាក្នុងតំបន់ការពារធម្មជាតិ ដែលមានឧទ្យានជាតិ និងដែនជម្រកសត្វព្រៃជាដើម សរុបជាង៧០កន្លែង។
លោកបន្ថែមថា ក្រសួងក៏បានប្រើប្រាស់មធ្យោបាយបច្ចេកវិទ្យាព័ត៌មានទំនើបជាជំនួយ និងសហការជាមួយសហគមន៍ក្នុងតំបន់ការពារធម្មជាតិដែលទទួលស្គាល់ដោយក្រសួងនិងមានច្បាប់ត្រឹមត្រូវ ក្នុងការធ្វើសកម្មភាពចូលរួមការពារនិងអភិរក្ស។
លោកបានលើកឡើងបន្ថែមថា ក្រៅពីនោះ ការអភិរក្សជីវចម្រុះដែលមានសត្វព្រៃគ្រប់ប្រភេទក្នុងតំបន់ការពារ ក្នុងនោះ ចំនួនសត្វព្រៃក្នុងប្រទេសមានកំណើនឡើង និងចំនួនថេរចំពោះប្រភេទសត្វខ្លះ និងមានការធ្លាក់ចំពោះប្រភេទសត្វមួយចំនួនដែរ។ ចំណែកការអភិវឌ្ឍដោយចីរភាព សំដៅដល់តុល្យភាពនៃការអភិវឌ្ឍនិងអភិរក្ស ដោយរាល់ការអភិវឌ្ឍត្រូវតែឆ្លងកាត់ការវាយតម្លៃលើហេតុប៉ះពាល់បរិស្ថាននិងសង្គម។
លោក នេត្រ ភក្ត្រា បានថ្លែងថា៖ «ក្នុងរយៈពេល១០ឆ្នាំចុងក្រោយនេះ ស្ថានភាពនៃការការពារនិងអភិរក្សធនធានធម្មជាតិរបស់យើងមានភាពល្អប្រសើរ។ ហើយយើងឈានទៅដល់ការលក់កាបូនលើទីផ្សារអន្ដរជាតិ ដែលនៅតាមតំបន់ការពារធម្មជាតិនានា»។
លោកបន្ថែមថា៖ «ពីឆ្នាំ២០១៦ ដល់ឆ្នាំ២០២០ យើងបានលក់ឥណទានកាបូនបានថវិកាចំនួន១១,៦លានដុល្លារសហរដ្ឋអាមេរិក។ ហើយថវិកានេះ យើងយកមកប្រើប្រាស់ទៅលើការពង្រឹងតួនាទីភារកិច្ចនៃការការពារ អភិរក្សធនធានធម្មជាតិ និងអភិវឌ្ឍសហគមន៍តំបន់ការពារធម្មជាតិ»។
គោលនយោបាយជាតិស្ដីពីការអភិវឌ្ឍយុវជន ដែលរៀបចំដោយក្រសួងអប់រំ យុវជន និងកីឡា ចែងថា៖ «យុវជនជាធនធានគន្លឹះនិងមានតម្លៃបំផុតសម្រាប់ការអភិវឌ្ឍសេដ្ឋកិច្ច សង្គមកិច្ច វប្បធម៌ បរិស្ថាន និងការរក្សាសន្ដិភាព ទាំងបច្ចុប្បន្ននិងអនាគត»។
ឯកសារដដែលក៏បានលើកឡើងអំពីយុទ្ធសាស្រ្ដក្នុងការលើកកម្ពស់ការយល់ដឹងពីបរិស្ថានដល់យុវជនផងដែរ ដោយក្នុងនោះរួមមាន ការលើកកម្ពស់ការយល់ដឹងរបស់យុវជនស្ដីពីបរិស្ថាន ក្នុងការយកចិត្តទុកដាក់អភិវឌ្ឍនិងថែរក្សាបរិស្ថានប្រកបដោយចីរភាពជាដើម។
កម្ពុជាបានប្រារព្ធទិវាបរិស្ថានពិភពលោកឆ្នាំ២០២១ ដោយសមាគម អង្គការសង្គមស៊ីវិល និងសហគមន៍ ចំនួន១២ស្ថាប័ន បានសហការគ្នាធ្វើយុទ្ធនាការលើបណ្តាញសង្គមរយៈពេល៥ថ្ងៃ ចាប់ពីថ្ងៃទី១ ខែមិថុនា ដល់ថ្ងៃទី៥ ខែមិថុនា ឆ្នាំ២០២១ ក្រោមប្រធានបទ ស្តីពី «បរិស្ថាន ជាបញ្ហាសកលដែលគ្រប់គ្នាមានសិទ្ធិនិងករណីកិច្ចចូលរួមការពារថែរក្សាប្រកបដោយបរិយាប័ន្ន»។
សកម្មជនបរិស្ថាន បានប្រើប្រាស់វេទិកានេះភាគច្រើនជជែកនិងរិះគន់អាជ្ញាធររដ្ឋាភិបាលរឿងវិនាសកម្មព្រៃឈើនៅកម្ពុជា ការធ្វើទុក្ខបុកម្នេញនិងការចាប់ខ្លួនសកម្មជនបរិស្ថាន ព្រមទាំងទទូចឱ្យរដ្ឋាភិបាលបើកទូលាយឱ្យប្រជាពលរដ្ឋនិងអាជ្ញាធររួមគ្នាទប់ស្កាត់គ្រប់បទល្មើសកាប់បំផ្លាញព្រៃឈើ និងសកម្មភាពទាំងឡាយណាដែលបង្កផលប៉ះពាល់ចំពោះបរិស្ថាន។
បើតាមសេចក្ដីប្រកាសព័ត៌មានរបស់អង្គការសង្គមស៊ីវិល បានឱ្យដឹងថា ការប្រារព្ធទិវាបរិស្ថានឆ្នាំនេះ មានគោលបំណងសំខាន់៤ចំណុច រួមមាន ការលើកកម្ពស់ការយល់ដឹងអំពីសារៈសំខាន់របស់បរិស្ថាន ធនធានធម្មជាតិ និងព្រៃឈើ ដល់យុវជននិងប្រជាជនទូទៅ រួមទាំងលើកទឹកចិត្តបំផុសគំនិត ផ្តល់ឱកាសដល់យុវជន ដើម្បីចូលរួមដោះស្រាយបញ្ហានានាដែលបានបង្កហានិភ័យដល់បរិស្ថាន ធនធានធម្មជាតិ និងព្រៃឈើ។
ពួកគេក៏បានជំរុញកិច្ចសហការពីគ្រប់ភាគីពាក់ព័ន្ធទាំងអស់ឱ្យកាន់តែទូលំទូលាយ ដើម្បីរួមគ្នាទប់ស្កាត់និងបញ្ឈប់គ្រប់បទល្មើសកាប់បំផ្លាញព្រៃឈើ និងសកម្មភាពដែលបំផ្លាញបរិស្ថាន ព្រមទាំងស្នើឱ្យក្រសួងបរិស្ថាននិងស្ថាប័នពាក់ព័ន្ធបង្កលក្ខណៈងាយស្រួលដល់យុវជន ប្រជាពលរដ្ឋ សង្គមស៊ីវិល និងសកម្មជនបរិស្ថាន ឱ្យចូលរួមការពារបរិស្ថាននិងធនធានធម្មជាតិស្របតាមច្បាប់ដែលបានកំណត់៕
អត្ថបទទាក់ទង
យុវជនបរិស្ថាន៣នាក់កំពុងប្រឈមនឹងការចោទពីបទ «រួមគំនិតក្បត់»
