ក្រសួងអប់រំ យុវជន និងកីឡា បន្តផ្អាកគ្រឹះស្ថានសិក្សាសាធារណៈនិងឯកជននៅទូទាំងប្រទេសបន្តទៀត ដោយពុំទាន់កំណត់ពេលបើកដំណើរការឡើងវិញនៅឡើយ ខណៈព្រឹត្តិការណ៍ «សហគមន៍២០កុម្ភៈ» នៅបន្តមានអ្នកឆ្លងជំងឺកូវីដ-១៩ជាច្រើនរយនាក់ក្នុងមួយថ្ងៃៗ។
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា មានប្រសាសន៍ប្រាប់ វីអូឌី តាមសារតេឡេក្រាមថា ក្រសួងអប់រំនៅតែមានជំហរបន្តផ្អាកគ្រឹះស្ថានសិក្សាសាធារណៈនិងឯកជននៅទូទាំងប្រទេស ដោយបន្តតាមដាននិងវាយតម្លៃស្ថានភាពព្រឹត្តិការណ៍សហគមន៍២០កុម្ភៈ និងគោរពអនុវត្តតាមគោលការណ៍នានារបស់រាជរដ្ឋាភិបាល។
ស្របពេលគ្នានេះដែរ លោកថា ក្រសួងអប់រំលើកទឹកចិត្តដល់គ្រឹះស្ថានសិក្សាសាធារណៈនិងឯកជនទាំងអស់ត្រូវបន្តការបង្រៀននិងរៀនពីចម្ងាយនិងតាមអនឡាញ ស្របតាមគន្លងជីវិតថ្មីនៃវិស័យអប់រំ ខណៈក្រសួងបានចេញរួចហើយនូវសេចក្តីណែនាំស្ដីពីការបង្រៀននិងរៀនពីចម្ងាយនិងតាមប្រព័ន្ធអេឡិចត្រូនិច សម្រាប់គ្រឹះស្ថានបឋមសិក្សានិងមធ្យមសិក្សាសាធារណៈឆ្នាំសិក្សា២០២០និង២០២១។
លោកបន្ថែមថា៖ «សូមទាំងអស់គ្នាបន្តអនុវត្តវិធានការការពារ ៣ការពារ ៣កុំ ឱ្យបានខ្ជាប់ខ្ជួន។ ហើយក្រសួងលើកទឹកចិត្តអ្នកផ្តល់សេវាអប់រំឯកជន អ្នកទទួលសេវាអប់រំឯកជន និងភាគីពាក់ព័ន្ធ បន្តពិភាក្សាគ្នា ចរចាគ្នា រកដំណោះស្រាយសមស្របប្រកបដោយការយោគយល់គ្នាកម្រិតខ្ពស់ និងសម្បទានគ្នាទៅវិញទៅមក ព្រោះទាំងអស់គ្នាសុទ្ធតែទទួលផលជះពីជំងឺកូវីដ-១៩»។
ការបញ្ជាក់ជំហររបស់ក្រសួងអប់រំ បានធ្វើឡើងក្រោយពីតំណាងអង្គការសុខភាពពិភពលោក និងអង្គការយូនីសេហ្វ (UNICEF) ប្រចាំតំបន់ បានចេញវិចារណកថាមួយកាលពីថ្ងៃទី១៦ ខែមិថុនា ដោយលើកឡើងថា ការបើកសាលារៀនឡើងវិញមិនគួរពន្យារពេលបន្តទៀតទេ។
តំណាងស្ថាប័នអន្តរជាតិធំៗទាំងពីរនេះបានសង្កត់ធ្ងន់ថា ការបើកដំណើរការសាលារៀនឡើងវិញប្រកបដោយសុវត្ថិភាព គឺជាអាទិភាពបន្ទាន់មួយសម្រាប់កុមារ ដោយការរៀននៅក្នុងសាលាមានសារៈសំខាន់យ៉ាងខ្លាំងសម្រាប់ការអប់រំនិងសក្តានុពលសម្រាប់ជីវិតពួកគេ។
អង្គការទាំងពីរនេះបន្តទៀតថា ការអូសបន្លាយរយៈពេលយូរក្នុងការបិទទ្វារសាលារៀន បង្កផលប៉ះពាល់ជាច្រើនដល់កុមារមិនត្រឹមតែប៉ះពាល់ដល់ការទទួលបានជំនាញរបស់កុមារ និងសក្តានុពលរបស់ពួកគេក្នុងការរកចំណូលប៉ុណ្ណោះទេ ថែមទាំងប៉ះពាល់ដល់ផលិតភាព ព្រមទាំងលទ្ធភាពរកចំណូលពេញមួយជីវិត និងមានផលប៉ះពាល់សុខភាពផ្លូវកាយនិងសុខភាពផ្លូវចិត្តរបស់ពួកគេទៀតផង។
អង្គការទាំងពីរនេះបញ្ជាក់ថា៖ «ការខាតបង់រយៈពេលវែងចេញពីការបិទទ្វារសាលារៀន មានទំហំធំធេងក្រៃលែង ទាំងសម្រាប់កុមារម្នាក់ៗ និងសម្រាប់សង្គមទាំងមូល ដែលពិបាកនឹងលើកហេតុផលណាមួយសម្រាប់ការបន្តបិទទ្វារសាលារៀនទៀត»។
បើតាមវិចារណកថាដដែលបញ្ជាក់ថា ប្រទេសកំពុងអភិវឌ្ឍន៍នៅអាស៊ីជិតពាក់កណ្តាលបានបិទទ្វារសាលារៀនជាង២០០ថ្ងៃហើយ ក្នុងអំឡុងពេលប្រឈមការរាតត្បាតជាសកល ហើយកុមារមួយចំនួននៅតែបន្តការរៀនសូត្របាន ខណៈមានកុមារជាច្រើនជួបការលំបាក រួមទាំងកុមារមានពិការភាព កុមាររងផលប៉ះពាល់ពីការធ្វើចំណាកស្រុក និងក្រុមកុមារជនជាតិភាគតិចដែលពុំសូវទទួលបានការគាំទ្រ ត្រូវទទួលរងការខាតបង់ការសិក្សា ព្រោះពួកគេពុំមានលទ្ធភាពទទួលបានការអប់រំតាមប្រព័ន្ធឌីជីថល។
លោក ភី រក្សា ប្រកបរបររត់ម៉ូតូកង់បី វ័យ៣៣ឆ្នាំ រស់នៅសង្កាត់ទួលទំពូង ខណ្ឌចំការមន រាជធានីភ្នំពេញ ដែលមានកូនម្នាក់ចូលរៀនកម្រិតបឋមសិក្សា មានប្រសាសន៍ថា ជាការល្អ ប្រសិនបើមានការបើកសាលារៀនឡើងវិញ ដើម្បីឱ្យកូនរបស់គាត់បានចូលរៀនវិញ។ ប៉ុន្ដែលោកក៏នៅមានការព្រួយបារម្ភដែរអំពីលទ្ធភាពនៃការឆ្លងកូវីដ-១៩ទៅកាន់កូននៅសាលារៀន។
លោកថា៖ «ធម្មតា ការបិទសាលា ប្រព័ន្ធអប់រំអ៊ីចឹង ទាំងកូនខ្ញុំ កូនគេ វាមិនបានចំណេះដឹងអីមកក្នុងខ្លួន។ ហើយអនាគតទៅ មិនដឹងថាយ៉ាងម៉េច បើអត់បានរៀនបានអីអ៊ីចឹង! ចេះតែចង់ឱ្យបើកហើយ តែបើគេបើកមិនបើក អាហ្នឹងខាងក្រសួងជាអ្នកសម្រេច»។
នាយករងអង្គការភ្លែនអន្តរជាតិកម្ពុជា លោក យី គីមថាន មានប្រសាសន៍ថា លោកគាំទ្រការលើកឡើងរបស់តំណាង WHO និង UNICEF ថ្នាក់តំបន់ ដែលជំរុញឱ្យមានការបើកសាលារៀនឡើងវិញ ដោយអនុវត្តវិធានការសុវត្ថិភាព។ លោកថា រដ្ឋាភិបាលគួរពិចារណានិងមានចំណាត់ការក្នុងការបើកសាលារៀនឡើងវិញ ទៅតាមដំណាក់កាលនិងតាមតំបន់ដែលមិនសូវមានហានិភ័យនៃការឆ្លងជំងឺកូវីដ-១៩ ដើម្បីឱ្យសិស្សអាចទទួលបានការសិក្សាឡើងវិញ ខណៈសិស្សភាពច្រើននៅតំបន់ដាច់ស្រយាលពិបាកក្នុងការទទួលបានការសិក្សាតាមប្រព័ន្ធអនឡាញ។
លោក យី គីមថាន មានប្រសាសន៍ថា៖ «យើងមានការព្រួយបារម្ភមែនទែន ទាក់ទងនឹងការអប់រំរបស់កុមារ ព្រោះប្រសិនជាការបិទសាលាចេះតែពន្យារទៅ អ៊ីចឹងកុមារភាគច្រើនដែលងាយរងគ្រោះបំផុត គឺនឹងជួបផលវិបាកច្រើនសម្រាប់ជីវិតទៅថ្ងៃមុខរបស់គាត់ មិនត្រឹមតែពេលនេះ តែយើងក៏សម្រាប់ទៅថ្ងៃមុខដែរ។ អាចមានកុមារមួយចំនួនធំបោះបង់ការសិក្សា អ៊ីចឹងវាធ្វើឱ្យអាវដ្តនៃភាពក្រីក្ររបស់គាត់នៅតែបន្តទៅមុខទៀត»។
លោកបានស្នើដែរថា៖ «សូមក្រសួងគិតគូរផងដែរនៅពេលសាលាបើកឡើងវិញ ថាតើកម្មវិធីសិក្សាឬវិធីសាស្ត្របង្រៀន បង្រៀនយ៉ាងម៉េច ដើម្បីឱ្យសិស្សហ្នឹងគាត់អាចរៀនរំឭកពីមេរៀនចាស់ៗវិញ ឬអាចធ្វើឱ្យសិស្សយល់ពីមេរៀន ត្រូវរៀនថ្នាក់ដែលគាត់មិនបានរៀន ដែលធ្វើឱ្យគាត់អាចរៀនទាន់តាមកម្មវិធី ក៏ដូចជាមានចំណេះដឹងគ្រាន់ផងដែរ»។
គួរបញ្ជាក់ថា គិតមកដល់ពេលនេះ មានរយៈពេល៣ខែមកហើយដែលសាលារៀនទូទាំងប្រទេសបានបិទទ្វារ បើគិតតាំងពីការប្រកាសបិទចុងក្រោយ ក្រោយផ្ទុះព្រឹត្តិការណ៍សហគមន៍២០កុម្ភៈ។
បើតាមក្រសួងអប់រំ យុវជន និងកីឡា តួលេខគ្រូបង្រៀនដែលបានចាក់វ៉ាក់សាំងការពារកូវីដ-១៩ រួចរាល់មានចំនួនប្រមាណជាង ៩៥% នៃចំនួនគ្រូបង្រៀន ១៥៨ ០០០នាក់ទូទាំងប្រទេស។
ដោយឡែក បើតាមក្រសួងសុខាភិបាល គិតត្រឹមថ្ងៃទី១៩ ខែមិថុនា ឆ្នាំ២០២១ កម្ពុជារកឃើញអ្នកឆ្លងជំងឺកូវីដ-១៩ សរុប៤២ ០៥២នាក់ ក្នុងនោះករណីនាំចូលពីក្រៅប្រទេសចំនួន១ ៦៦២នាក់ ខណៈអ្នកជាសះស្បើយសរុប៣៦ ៨៦៨នាក់ និងស្លាប់ដោយសារជំងឺនេះចំនួន៤១៤នាក់៕