ចៅក្រមជំនុំជម្រះសាលាដំបូងរាជធានីភ្នំពេញ កំណត់ថ្ងៃបើកសវនាការលើសំណុំរឿងមន្រ្តីជាន់ខ្ពស់អតីតគណបក្សសង្រ្គោះជាតិ និងអ្នកគាំទ្ររបស់ខ្លួន ចំនួន៩រូប នៅថ្ងៃទី១ ខែកក្កដា ខាងមុខនេះ។
នៅក្នុងដីកាបញ្ជូនសំណុំរឿងទៅជំនុំជម្រះដែល វីអូឌី ទទួលបាននៅថ្ងៃទី២១ ខែមិថុនា ឱ្យដឹងថា ជនជាប់ចោទចំនួន៣រូប រួមមាន លោក ហូរ វ៉ាន់ អតីតសមាជិកព្រឹទ្ធសភាជាមន្ត្រីជាន់ខ្ពស់អតីតគណបក្សសង្រ្គោះជាតិ លោក សាន សីហៈ និងអ្នកស្រី ហុង អាន ជាសកម្មជនគាំទ្រអតីតគណបក្សសង្រ្គោះជាតិ ត្រូវរងការចោទប្រកាន់ពីបទ «អ្នកផ្តើមគំនិតក្នុងអំពើញុះញង់ បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
នៅក្នុងដីកាដដែលនេះបញ្ជាក់ទៀតថា នៅមានមនុស្សចំនួន៦នាក់ទៀតដែលរងការចោទពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ក៏ត្រូវបានតុលាការកំណត់ថ្ងៃបើកសវនាការនៅដើមខែក្រោយនេះដែរ ក្នុងនោះមាន អ្នកស្រី លឹម សាន, អ្នកស្រី យ៉យ ស្រីម៉ុម, អ្នកស្រី សាត ផា, អ្នកស្រី ប៉ៃ រ៉េន, អ្នកស្រី សាន់ ស្រីនាថ និងលោក តុន និមល។
សវនាការនេះនឹងមានលោក អ៊ុក រ៉េតគន្ធា ជាចៅក្រមជំនុំជម្រះ និងលោក ឆាយ ហុង ជាតំណាងអយ្យការ។
លោក សំ សុគង់ មេធាវីការពារក្តីម្នាក់ក្នុងចំណោមមេធាវី ២រូប ដែលកាន់សំណុំរឿងនេះ មានទុទ្ទិដ្ឋិនិយមថា វាសនាកូនក្តីរបស់ខ្លួនហាក់មិនមានសង្ឃឹមថាអាចនឹងរួចផុតពីការចោទប្រកាន់តាមផ្លូវតុលាការឡើយ។ តែយ៉ាងណា លោកថា លោកនឹងប្រឹងប្រែងក្នុងនាមជាមេធាវី ដើម្បីស្វែងរកផលប្រយោជន៍ឱ្យកូនក្តីរបស់លោកឱ្យបាន បើទោះជាមិនមានសង្ឃឹមក្តី។
លោកបន្តថា៖ «ទាក់ទងទៅនឹងរឿងនេះ ដោយសារវាពាក់ព័ន្ធនឹងនយោបាយហើយ យើងឃើញជាបទពិសោធន៍នោះ គឺបើជារឿងនយោបាយ ពុំបានយុត្តិធម៌ទេ»។
នៅក្នុងអង្គហេតុនៃរឿងក្តីព្រហ្មទណ្ឌមួយនេះ ជនជាប់ចោទទាំង៩រូបបានប្រមូលផ្តុំគ្នាតវ៉ានៅខាងមុខស្ថានទូតចិន កាលពីខែតុលា ឆ្នាំ២០២០។ កាលណោះ ពួកគេរួមទាំងអ្នកគាំទ្រនៃអតីតគណបក្សសង្រ្គោះជាតិផ្សេងទៀត បានចូលរួមសំដែងមតិដោយទាមទារឱ្យរដ្ឋាភិបាលអនុវត្តគោលនយោបាយដោយតម្កល់ស្មារតីនៃកិច្ចព្រមព្រៀងទីក្រុងប៉ារីសស្តីពីកម្ពុជា។ ភ្លាមៗ ក្រោយហេតុការណ៍កើតឡើង លោកនាយករដ្ឋមន្រ្តី ហ៊ុន សែន បានចេញប្រតិកម្ម ដោយចាត់ទុកការប្រមូលផ្តុំនេះ ថាមានលោក ហូរ វ៉ាន់ មន្ត្រីជាន់ខ្ពស់អតីតគណបក្សសង្រ្គោះជាតិ ជាអ្នកនៅពីក្រោយខ្នង។
វីអូឌី ពុំអាចសុំការអធិប្បាយបន្ថែមពីលោក អ៊ី រិន្ទ អ្នកនាំពាក្យសាលាដំបូងរាជធានីភ្នំពេញ បានទេនៅថ្ងៃនេះ។
នាយករងអង្គការការពារសិទ្ធិមនុស្សលីកាដូ (Licadho) លោក អំ សំអាត មានប្រសាសន៍ថា សម្រាប់កម្ពុជា ស្ទើរក្លាយទៅជាទម្លាប់ទៅហើយដែលយករឿងជាប់ពាក់ព័ន្ធនឹងនយោបាយទៅលាយឡំជាមួយតុលាការវិញ។ យ៉ាងណា សម្រាប់អ្នកការពារសិទ្ធិមនុស្សរូបនេះ យល់ឃើញថា ដើម្បីកុំឱ្យមានការឈឺចាប់ផ្នែកនយោបាយនេះតទៅទៀត និងដើម្បីផលប្រយោជន៍ជាតិរួម អ្នកនយោបាយគួរបញ្ចប់វប្បធម៌នេះ ហើយដោះស្រាយគ្នាតាមផ្លូវនយោបាយវិញ។
លោកបន្តថា៖ «អ៊ីចឹងយើងគ្រាន់តែសង្ឃឹមថា ទាក់ទងផ្នែកនយោបាយ អ្នកនយោបាយទាំងអស់គួរតែគិតពីឧត្តមប្រយោជន៍ជាតិ និងឧត្តមប្រយោជន៍ប្រជាពលរដ្ឋជាធំ។ យើងដោះស្រាយគ្នាតាមវប្បធម៌សន្ទនាគ្នារវាងខ្មែរនិងខ្មែរ»។
គិតចាប់ពីខែមករា ដើមឆ្នាំ២០២១កន្លងទៅនេះ អ្នកនយោបាយ និងសកម្មជនអតីតគណបក្សសង្រ្គោះជាតិ រួមទាំងយុវជនការពារបរិស្ថានផង ត្រូវបានអាជ្ញាធរចាប់ខ្លួនប្រមាណ៤០នាក់ហើយ។ ពួកគេទាំងនោះត្រូវរងការចោទប្រកាន់ពីបទ «រួមគំនិតក្បត់ជាតិ» និង «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» រួមទាំងបទចោទមួយចំនួនទៀតផងដែរ។
បើទោះជាបែបណា បញ្ហានេះ មេធាវីការពារក្តី លោក សំ សុគង់ យល់ឃើញថា តាមពិតអ្នកដែលត្រូវបានអាជ្ញាធរចាប់ខ្លួនទាំងអស់ ទាក់ទិននឹងការសំដែងមតិ។ បើតាមលោក សំ សុគង់ ទាំងរដ្ឋធម្មនុញ្ញ និងកតិកាសញ្ញាអន្តរជាតិស្តីពីសិទ្ធិពលរដ្ឋនិងសិទ្ធិនយោបាយ រាល់ការសំដែងមតិណាមួយ វាពុំមែនជាបទល្មើសនោះឡើយ៕