ក្រសួងសុខាភិបាលព្រមានចាត់វិធានការផ្លូវច្បាប់លើម្ចាស់គណនីហ្វេសប៊ុកមួយចំនួនដែលបាននិងកំពុងផ្សព្វផ្សាយលក់តេស្តរហ័សរកអង់ទីគ័រការពារជំងឺកូវីដ-១៩ខុសច្បាប់ និងអំពាវនាវដល់សាធារណជនទាំងអស់បញ្ឈប់នូវការប្រើប្រាស់តេស្តរហ័សទាំងនោះជាបន្ទាន់។
សេចក្តីជូនព័ត៌មានរបស់ក្រសួងចុះថ្ងៃទី២១ ខែមិថុនា ឆ្នាំ២០២១នេះ បានលើកឡើងថា មានគណនីហ្វេសប៊ុកចំនួន៤ រួមមាន បងប្រុសទីពីរ, Leng Kuchnika Pol, Srey Nit និង TMS-Trust Medical Service បាននិងកំពុងផ្សព្វផ្សាយលក់តេស្តរហ័សរកអង់ទីគ័រការពារជំងឺកូវីដ-១៩ គ្មានចុះបញ្ជិកា និងពុំមានការទទួលស្គាល់ពីក្រសួង ខណៈសេវាសុខាភិបាលឯកជនមួយចំនួនទៀតក៏បាននិងកំពុងយកឧបករណ៍ទាំងនោះទៅធ្វើតេស្តជូនប្រជាពលរដ្ឋយ៉ាងអនាធិបតេយ្យ។
ក្រសួងបន្តថា តេស្តរហ័សដែលកំពុងចរាចរនោះ ក៏ពុំមានការទទួលស្គាល់ពីអង្គការសុខភាពពិភពលោក (WHO) នៅឡើយដែរ ហើយលទ្ធផលដែលបានមកពីការប្រើប្រាស់តេស្តទាំងនេះ គឺមិនអាចជឿជាក់បានឡើយ។
ដើម្បីចៀសវាងនូវការខាតបង់ថវិកា និងបង្កឱ្យមានភាពអនាធិបតេយ្យក្នុងសង្គម ដែលធ្វើឱ្យប៉ះពាល់ដល់គោលនយោបាយរបស់រដ្ឋាភិបាលដែលកំពុងចាក់វ៉ាក់សាំងកូវីដ-១៩នៅទូទាំងប្រទេសនោះ ក្រសួងអំពាវនាវដល់សាធារណជនទាំងអស់ត្រូវបញ្ឈប់ជាបន្ទាន់នូវការប្រើប្រាស់តេស្តរហ័សរកអង់ទីគ័រការពារជំងឺកូវីដ-១៩ទាំងនោះ និងបញ្ឈប់ការទៅធ្វើតេស្តតាមសេវាសុខាភិបាលឯកជនជាបន្តទៀត ព្រោះតេស្តនោះពុំមានប្រភពច្បាស់លាស់ ដែលមិនអាចធានាបាននូវគុណភាពនិងសុក្រឹត្យភាពនៃលទ្ធផលបានឡើយ។
ក្រសួងក៏បានព្រមានដល់ម្ចាស់គណនីហ្វេសប៊ុកនិងម្ចាស់សេវាសុខាភិបាលឯកជនទាំងអស់ដែលកំពុងផ្សព្វផ្សាយលក់និងប្រើប្រាស់តេស្តរហ័សនោះ ត្រូវបញ្ឈប់សកម្មភាពជាបន្ទាន់ បើពុំនោះទេ នឹងត្រូវប្រឈមមុខផ្លូវច្បាប់។
ក្រសួងបញ្ជាក់ទៀតថា៖ «ក្រសួងសុខាភិបាលនឹងមានវិធានការយ៉ាងតឹងរ៉ឹងបំផុត ចំពោះសេវាសុខាភិបាលឯកជនណាដែលនៅតែឆ្លៀតឱកាសប្រើប្រាស់ឧបករណ៍តេស្តរហ័សរកអង់ទីគ័រការពារជំងឺកូវីដ-១៩នេះ ម្ចាស់គណនីហ្វេសប៊ុកទាំង៤ [ដែលបាននិងកំពុងផ្សព្វផ្សាយលក់តេស្តនោះ] ព្រមទាំងជនពាក់ព័ន្ធដទៃទៀតដែលបាននិងកំពុងបន្តផ្សព្វផ្សាយឬលក់តេស្តទាំងនោះ ទៅតាមច្បាប់ដែលមានជាធរមាន»៕
