អគ្គនាយកដ្ឋានគយ និងរដ្ឋាករកម្ពុជា សម្រេចឱ្យប្រទេសឥណ្ឌានាំចូលសាច់បង្កកនិងមុខទំនិញបង្កកគ្រប់ប្រភេទឡើងវិញ ក្រោមហេតុផលថា ស្ថានភាពនៃការឆ្លងរាលដាលជំងឺកូវីដ-១៩ នៅប្រទេសឥណ្ឌាធូរស្រាល ខណៈលទ្ធផលនៃការធ្វើតេស្តលើសាច់បង្កកនាពេលកន្លងមក គឺអវិជ្ជមានកូវីដ-១៩។
ការសម្រេចអនុញ្ញាតនេះ ធ្វើឡើងបន្ទាប់ពីឯកអគ្គរដ្ឋទូតឥណ្ឌាប្រចាំកម្ពុជា កាលពីថ្ងៃទី៣ ខែមិថុនា បានស្នើឱ្យកម្ពុជាដកចេញនូវបម្រាមលើការនាំចូលសាច់បង្កកនិងទំនិញបង្កកផ្សេងៗទៀតពីប្រទេសឥណ្ឌា ក្រោយពីវិទ្យាស្ថានប៉ាស្ទ័រកម្ពុជាបានប្រមូលនិងធ្វើតេស្ដលើសាច់បង្កកទាំងនោះកន្លងមក លទ្ធផលបង្ហាញថាគ្មានកូវីដ-១៩។
ក្នុងលិខិតរបស់អគ្គនាយកដ្ឋានគយ និងរដ្ឋាករកម្ពុជា ចុះថ្ងៃទី១៩ ខែមិថុនា ឆ្នាំ២០២១ ដែល វីអូឌី ទើបទទួលបាន ឱ្យដឹងថា ការសម្រេចលើកលែងបម្រាមលើការនាំចូលសាច់បង្កកនិងមុខទំនិញបង្កក ដោយដាក់មកជំនួសវិញនូវវិធានការបណ្តោះអាសន្ន ក្នុងនោះ តម្រូវឱ្យអាជ្ញាធរមានសមត្ថកិច្ចនៃប្រទេសដើមកំណើតទំនិញចេញវិញ្ញាបនបត្រឬលិខិតបញ្ជាក់បន្ថែមថាគ្មានវីរុសកូវីដ-១៩លើសាច់បង្កក។
លើសពីនេះទៀត រាល់ពេលដែលទំនិញមកដល់នោះ តម្រូវឱ្យយកសំណាកធ្វើតេស្តរកវីរុសកូវីដ-១៩ ដោយវិទ្យាស្ថានប៉ាស្ទ័រកម្ពុជា មុននឹងអនុញ្ញាតឱ្យបំពេញបែបបទបញ្ចេញទំនិញពីគយ។
អគ្គនាយកដ្ឋានគយ និងរដ្ឋាករកម្ពុជា បន្តថា លក្ខខណ្ឌទាំង២ដែលបានដាក់ចេញនេះ នឹងត្រូវបន្ធូរបន្ថយឬដកចេញទាំងស្រុងផ្អែកលើស្ថានភាពធូរស្រាលនៃការរីករាលដាលជំងឺកូវីដ-១៩ នៅប្រទេសនាំចេញ និងលទ្ធផលនៃការធ្វើតេស្តលើសាច់បង្កកដោយវិទ្យាស្ថានប៉ាស្ទ័រកម្ពុជា រកឃើញថា អវិជ្ជមានជាបន្តបន្ទាប់។
បើតាមអគ្គនាយកដ្ឋានគយ និងរដ្ឋាករកម្ពុជា សេចក្តីជូនដំណឹងនេះនឹងមានប្រសិទ្ធភាពចាប់ពីថ្ងៃទី២១ ខែមិថុនានេះតទៅ រហូតដល់មានការណែនាំជាថ្មីម្តងទៀត។
វីអូឌី មិនអាចសុំការបញ្ជាក់បន្ថែមពីអគ្គនាយក នៃអគ្គនាយកដ្ឋានគយ និងរដ្ឋាករកម្ពុជា លោក គុណ ញឹម បានទេ នៅថ្ងៃនេះ។
យ៉ាងណា អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ លោក ផាន អូន មានប្រសាសន៍ថា មូលហេតុដែលកម្ពុជាអនុញ្ញាតឱ្យនាំចូលសាច់បង្កកនិងមុខទំនិញបង្កកឡើងវិញនេះ ដោយសារប្រទេសផ្សេងៗក៏មិនបានបិទការនាំចូលទំនិញបង្កកពីឥណ្ឌានោះដែរ។
លោកថា៖ «ប្រទេសផ្សេងៗគេមិនទាន់រកឃើញ ការដាក់បម្រាមលើសាច់បង្កករបស់ប្រទេសឥណ្ឌា អ៊ីចឹងយើងក៏រកមិនទាន់ឃើញអ៊ីចឹង យើងមិនទាន់មានហេតុផលវេជ្ជសាស្ត្រដែលអាចដាក់បម្រាមទៅគេបានទេ។ ប៉ុន្តែយើងក៏មានវិធានការបង្ការដែរ សម្រាប់ការអនុញ្ញាតឱ្យមានការនាំចូលនោះ»។
ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន ជំរុញរដ្ឋាភិបាលរៀបចំការកែច្នៃនិងផលិតសាច់បង្កកនិងមុខទំនិញបង្កកផ្សេងៗទៀតឱ្យបានកាន់តែច្រើន ជាជាងនាំចេញចូលពីខាងក្រៅប្រទេស។ លោកចាត់ទុកការកែច្នៃនិងផលិតមុខទំនិញខ្លួនឯងនេះ ថាបានជួយដល់ប្រជាពលរដ្ឋនិងសេដ្ឋកិច្ចជាតិផងដែរ។
លោកថា៖ «ទី១ វាចំណេញទាំងសេដ្ឋកិច្ច ទី២ វាចំណេញទាំងមុខរបរ ចំណេញទាំងប្រាក់ចំណូល។ ហើយមួយទៀត អាចធានានិរន្តរភាពនៃការផ្គត់ផ្គង់នូវគ្រឿងឧបភោគនិងបរិភោគក្នុងស្រុក ក្នុងការប្រើប្រាស់តម្រូវការមនុស្សទូទៅ»។
កាលពីថ្ងៃទី១ ខែឧសភា ឆ្នាំ២០២១ អគ្គនាយកដ្ឋានគយ និងរដ្ឋាករកម្ពុជា បានសម្រេចផ្អាកជាបណ្តោះអាសន្នការនាំចូល និងព្យួរការបំពេញបែបបទបញ្ចេញទំនិញពីគយ ចំពោះសាច់បង្កកនិងមុខទំនិញបង្កកដែលអាចមានហានិភ័យផ្សេងទៀត ដែលមានប្រភពមកពីប្រទេសឥណ្ឌា ខណៈស្ថានភាពនៃឆ្លងរាលដាលជំងឺកូវីដ-១៩ ពិសេសពពួកវីរុសជំងឺនេះបំប្លែងខ្លួនថ្មីនៅប្រទេសឥណ្ឌាមានសភាពធ្ងន់ធ្ងរ៕
