មេធាវីការពារក្តីឱ្យអ្នកស្រី សំ សុខា អតីតសកម្មជនគណបក្សសង្គ្រោះជាតិ បានស្នើដល់តុលាការសាលាដំបូងខេត្តកំពង់ស្ពឺ ដោះលែងកូនក្តីរបស់ខ្លួន ដោយលើកហេតុផលថា កូនក្តីរបស់ខ្លួនមានជំងឺប្រចាំកាយរ៉ាំរ៉ៃ និងបារម្ភពីការឆ្លងជំងឺកូវីដ-១៩នៅក្នុងពន្ធនាគារនេះ។
ពិរុទ្ធជនឈ្មោះ សំ សុខា បានរងការចោទប្រកាន់ពីបទ «ប្រមាថ» និង «ញុះញង់ឱ្យមានការរើសអើង» ប្រព្រឹត្តកាលពីខែមេសា ឆ្នាំ២០១៧ ក្នុងស្រុកព្រៃនប់ ខេត្តព្រះសីហនុ។ បទចោទប្រឆាំងអតីតអ្នកគាំទ្រគណបក្សសង្រ្គោះជាតិរូបនេះ ធ្វើឡើងបន្ទាប់ពីអ្នកស្រីបានបង្ហោះវីដេអូនៅលើបណ្ដាញសង្គមហ្វេសប៊ុក ដែលបង្ហាញពីសកម្មភាពគប់ស្បែកជើងទៅលើស្លាកសញ្ញាគណបក្សប្រជាជនកម្ពុជា ដែលមានរូបលោកនាយករដ្ឋមន្រ្តី ហ៊ុន សែន។
ក្រោយចាប់ខ្លួន អង្គការលីកាដូ បានចេញរបាយការណ៍ដោយបញ្ជាក់ថា អ្នកស្រី សំ សុខា ត្រូវបានផ្ដន្ទាទោសដោយកំបាំងមុខ និងបាននាំខ្លួនពីប្រទេសថៃ កាលពីខែកុម្ភៈ ទោះបីជាអ្នកស្រីទទួលបានសិទ្ធិជ្រកកោនពីឧត្តមស្នងការអង្គការសហប្រជាជាតិ ទទួលបន្ទុកជនភៀសខ្លួន (UNHCR) ក៏ដោយ។
នៅក្នុងលិខិតមួយច្បាប់របស់លោក ឡោ ជុនធី ជាសហមេធាវីការពារក្តីឱ្យជនជាប់ចោទ ដាក់ទៅតុលាការខេត្តកំពង់ស្ពឺ កាលពីថ្ងៃម្សិលមិញ លើកឡើងថា កាស្នើសុំឱ្យតុលាការដោះលែងកូនក្តីរបស់ខ្លួន ដោយសារអ្នកស្រី សំ សុខា បានអនុវត្តទោសនៅក្នុងពន្ធនាគារបានជាង៣ឆ្នាំហើយ ក្នុងចំណោមទោសសរុប៤ឆ្នាំ ខណៈអ្នកស្រីក៏កំពុងមានជំងឺក្រពះធ្ងន់ធ្ងរនិងស្គមស្គាំង ជាពិសេសមានការព្រួយបារម្ភពីការឆ្លងជំងឺកូវីដ-១៩ នៅក្នុងពន្ធនាគារថែមទៀត។
បន្ថែមលើលិខិតស្នើសុំនេះ លោក ឡោ ជុនធី មានប្រសាសន៍ថា ការស្នើសុំនេះ ដោយមើលឃើញកូនក្តីរបស់ខ្លួនបានអនុវត្តទោសស្ទើរតែស្មើទោសសរុបទៅហើយ ដែលមានន័យថា នៅសល់តែ៥ខែទៀតប៉ុណ្ណោះ នឹងត្រូវរួចផុតពីការចោទប្រកាន់តាមផ្លូវតុលាការហើយ។
លោកបន្តថា៖ «យើងឃើញថា ការដែលផ្តន្ទាទោសគាត់ហ្នឹង និយាយពីសំណុំរឿងដល់ទៅ៤ឆ្នាំឯណោះ ដល់អ៊ីចឹងទៅ ឥលូវហ្នឹងគាត់ជាប់ដូចជាលើស២ភាគ៣ទៅទៀតផង។ ឥលូវនេះ គាត់មានជំងឺក្រពះអីផង»។
ឆ្លើយតបរឿងនេះ ចៅក្រមសាលាដំបូងខេត្តកំពង់ស្ពឺ លោក សុង ប៊ុណ្ណារិទ្ធ បដិសេធថា លោកមិនបានទទួលរឿងក្តីនេះទេ ហើយក៏មិនទាន់ដឹងប្រាកដទាក់ទិនការស្នើសុំនេះដែរ។
លោកបន្តថា៖ «ខ្ញុំធ្វើម៉េចដឹង! រឿងនេះមិនមែននៅខ្ញុំផង! បើរឿងវាច្រើន ខ្ញុំម៉េចដឹង»។
អ្នកសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកំពង់ស្ពឺ លោក អ៊ុង សាមិត្ត យល់ឃើញថា ដើម្បីបញ្ចៀសបញ្ហាកើតឡើងដោយសារជំងឺ ជាពិសេសជំងឺកូវីដ-១៩ តុលាការគួរផ្តល់ការលើកលែងទោសតាមការស្នើសុំរបស់មេធាវី។
លោកបន្តថា៖ «ការអនុវត្តនិងការកែខ្លួនរបស់គ្នាហ្នឹងក៏បានល្អ មិនឃើញមានបញ្ហាអីទេនៅក្នុងពន្ធនាគារហ្នឹង។ ការអនុវត្តទោសរបស់គ្នាប៉ុណ្ណឹង ដល់ពេលដែលគួរបន្ធូរបន្ថយទោសតាមរយៈកូវីដ និងគួរលើកលែងឱ្យគ្នានៅក្រៅឃុំហើយ»។
គិតចាប់ពីខែមករា ដើមឆ្នាំ២០២០មក អតីតសកម្មជនគណបក្សសង្រ្គោះជាតិ រួមទាំងសកម្មជនការពារបរិស្ថានផង ប្រមាណជាង៤០នាក់ហើយត្រូវបានអាជ្ញាធរចាប់ខ្លួន។ ពួកគេត្រូវរងការចោទប្រកាន់ពីបទ «រួមគំនិតក្បត់ជាតិ» និង«ញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម»ជាដើម៕
កែតម្រូវ៖ វីអូឌី សូមធ្វើការកែតម្រូវកថាខណ្ឌ៖ «នៅក្នុងលិខិតមួយច្បាប់របស់លោក ឡោ ជុនធី ជាសហមេធាវីការពារក្តីឱ្យជនជាប់ចោទ ដាក់ទៅតុលាការខេត្តកំពង់ស្ពឺ កាលពីថ្ងៃម្សិលមិញ លើកឡើងថា កាស្នើសុំឱ្យតុលាការដោះលែងកូនក្តីរបស់ខ្លួនដោយគ្មានលក្ខខណ្ឌនេះ ដោយសារអ្នកស្រី សំ សុខា បានអនុវត្តទោសនៅក្នុងពន្ធនាគារបានជាង៣ឆ្នាំហើយ ក្នុងចំណោមទោសសរុប៤ឆ្នាំ ខណៈអ្នកស្រីក៏កំពុងមានជំងឺក្រពះធ្ងន់ធ្ងរនិងស្គមស្គាំង ជាពិសេសមានការព្រួយបារម្ភពីការឆ្លងជំងឺកូវីដ-១៩ នៅក្នុងពន្ធនាគារថែមទៀត។» ខ្លឹមសារដែលត្រឹមត្រូវ «នៅក្នុងលិខិតមួយច្បាប់របស់លោក ឡោ ជុនធី ជាសហមេធាវីការពារក្តីឱ្យជនជាប់ចោទ ដាក់ទៅតុលាការខេត្តកំពង់ស្ពឺ កាលពីថ្ងៃម្សិលមិញ លើកឡើងថា កាស្នើសុំឱ្យតុលាការដោះលែងកូនក្តីរបស់ខ្លួន ដោយសារអ្នកស្រី សំ សុខា បានអនុវត្តទោសនៅក្នុងពន្ធនាគារបានជាង៣ឆ្នាំហើយ ក្នុងចំណោមទោសសរុប៤ឆ្នាំ ខណៈអ្នកស្រីក៏កំពុងមានជំងឺក្រពះធ្ងន់ធ្ងរនិងស្គមស្គាំង ជាពិសេសមានការព្រួយបារម្ភពីការឆ្លងជំងឺកូវីដ-១៩ នៅក្នុងពន្ធនាគារថែមទៀត។»
