អង្គការជាតិ-អន្តរជាតិ រួមនឹងតំណាងទូតជិត១០០ស្ថាប័ន បង្ហាញការព្រួយបារម្ភនិងទាមទារឱ្យរដ្ឋាភិបាលកម្ពុជា ទម្លាក់ចោលការចោទប្រកាន់ទៅលើសកម្មជនបរិស្ថានវ័យក្មេងចំនួន៤នាក់និងដោះលែងពួកគេឱ្យមានសេរីភាពវិញ។
ការទាមទារនេះធ្វើឡើងបន្ទាប់ពីអាជ្ញាធរបានចាប់ខ្លួនយុវជនបរិស្ថានមាតាធម្មជាតិ ចំនួន៤នាក់ កាលពីថ្ងៃទី១៦ ខែមិថុនា ក្នុងនោះ មានម្នាក់ត្រូវបានសមត្ថកិច្ចដោះលែងវិញ ប៉ុន្តែ៣នាក់ផ្សេងទៀត រួមមាន យុវជន លី ចាន់ដារ៉ាវុទ្ធ អាយុ២២ឆ្នាំ យុវជន យឹម លាងហ៊ី អាយុ៣២ឆ្នាំ និងកញ្ញា ស៊ុន រដ្ឋា អាយុ២៦ឆ្នាំ ត្រូវបានតុលាការសាលាដំបូងរាជធានីភ្នំពេញសម្រេចឃុំខ្លួនបណ្តោះអាសន្ននៅពន្ធនាគារ ដោយចោទប្រកាន់ពីបទ «រួមគំនិតក្បត់ប្រឆាំងនឹងរដ្ឋ» និង «ប្រមាថអង្គព្រះមហាក្សត្រ»។
សេចក្តីថ្លែងការណ៍រួមរបស់អង្គការ-សមាគមចំនួន៧៥ នៅថ្ងៃអង្គារនេះ ចាត់ទុកការចោទប្រកាន់សមាជិក៤នាក់នៃចលនាបរិស្ថានមាតាធម្មជាតិ ពីសំណាក់តុលាការនេះ ថាជាផ្នែកមួយនៃការផ្ដន្ទាទោសដោយការដាក់គោលដៅ និងមិនអាចទទួលយកបាននោះទេ។
សេចក្តីថ្លែងការណ៍រួម បន្តថា ការចាប់ខ្លួននិងបទចោទប្រឆាំងសកម្មជនបរិស្ថានវ័យក្មេងទាំងនោះ គឺគ្មានមូលដ្ឋានច្បាស់លាស់ និងជាឧទាហរណ៍មួយទៀតនៃអាជ្ញាធរកម្ពុជានិងប្រព័ន្ធយុត្តិធម៌ក្នុងការប្រើប្រាស់បទចោទមិនត្រឹមត្រូវ ដើម្បីចាប់អ្នកការពារសិទ្ធិមនុស្សវ័យក្មេងដាក់ពន្ធនាគារ។
អង្គការទាំងនោះបន្ថែមថា៖ «ការតស៊ូមតិសម្រាប់សិទ្ធិមនុស្សនិងការទាមទារឱ្យអាជ្ញាធរការពារបរិស្ថាន មិនមែនជាបទល្មើសនោះទេ ហើយការចាប់ខ្លួនអ្នកការពារបរិស្ថានដែលជាយុវជនជំនាន់ក្រោយរបស់ប្រទេសជាតិដាក់ពន្ធនាគារ គឺធ្វើឱ្យមានគ្រោះថ្នាក់ដល់យើងទាំងអស់គ្នា»។
សេចក្តីថ្លែងការណ៍បន្តទៀតថា អាជ្ញាធរគួរបញ្ឈប់ការចាប់សកម្មជនវ័យក្មេងទាំងនោះដាក់ពន្ធនាគារ និងគួរចាប់ផ្ដើមស្ដាប់មតិយោបល់របស់ពួកគេដែលស្ថិតនៅជួរមុខក្នុងការចងក្រងឯកសារពីហានិភ័យដែលប្រទេសកម្ពុជាកំពុងប្រឈម ចំពោះការជញ្ជក់ផលប្រយោជន៍ពីធនធានធម្មជាតិនិងការបំផ្លិចបំផ្លាញបរិស្ថាន។
អង្គការ-សមាគមទាំងនោះស្នើថា៖ «យើងខ្ញុំសូមស្នើសុំឱ្យដោះលែងសកម្មជនបរិស្ថាននៃចលនាមាតាធម្មជាតិទាំងនេះ ក៏ដូចជាសកម្មជនការពារបរិស្ថាន និងសកម្មជនសិទ្ធិមនុស្សដទៃទៀត ដែលកំពុងជាប់ឃុំក្នុងពន្ធនាគារ ឱ្យបានឆាប់រហ័ស ព្រមទាំងទម្លាក់ចោលបទចោទទាំងអស់ចំពោះអ្នកទាំងនោះដោយគ្មានលក្ខខណ្ឌ»។
Very troubled to hear of the arrests of more environmental youth activists. Documenting pollution is a public service, not terrorism. We urge authorities to be responsive to its citizens, not to silence them. pic.twitter.com/bAWtPUwknH
— Ambassador W. Patrick Murphy (@USAmbCambodia) June 21, 2021
ឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក Patrick Murphy ក៏បានសរសេរនៅលើបណ្តាញសង្គមធ្វីតទ័រ (Tweeter) របស់លោក ដោយបង្ហាញការមិនសប្បាយចិត្តនៅពេលទទួលព័ត៌មានថា មានការចាប់ខ្លួនសកម្មជនយុវជនបរិស្ថានបន្ថែមទៀត។
លោកបន្តថា៖ «ការចងក្រងឯកសារអំពីការបំពុលបរិស្ថាន ជាកិច្ចការបម្រើសាធារណៈ ពុំមែនជាអំពើភេរវកម្មនោះទេ។ យើងជំរុញឱ្យអាជ្ញាធរឆ្លើយតបទៅពលរដ្ឋរបស់ខ្លួន មិនមែនបំបិទមាត់ពួកគេឡើយ»។
ស្ថានទូតស៊ុយអ៊ែតប្រចាំនៅកម្ពុជា ក៏បានបង្ហាញការព្រួយបារម្ភផងដែរ ជុំវិញការប្រើប្រាស់ផ្លូវច្បាប់ប្រឆាំងនឹងសកម្មជនបរិស្ថានវ័យក្មេងនៅកម្ពុជា។
ស្ថានទូតនេះបានសរសេរនៅលើបណ្តាញសង្គមរបស់ខ្លួនថា៖ «ការចូលរួមរបស់ពលរដ្ឋ ការទទួលបានព័ត៌មាន តម្លាភាព និងការសន្ទនា ជាគន្លឹះនៃការអភិវឌ្ឍប្រកបដោយចីរភាព។ ការចូលរួមរបស់យុវជន គឺជាផ្នែកមួយនៃអនាគត ហើយគួរតែត្រូវបានលើកទឹកចិត្ត»។
Sweden is concerned about recent legal actions against young environmental activists in Cambodia. Civil engagement, access to information, transparency and dialogue key components for sustainable development. Engaged youth is part of the future and should be encouraged.
— Sweden in Cambodia (@SwedeninKH) June 21, 2021
ចំណែកអង្គការ Human Rights Watch ក៏បានចេញសេចក្តីថ្លែងការណ៍មួយនៅថ្ងៃនេះ ទាមទារឱ្យរដ្ឋាភិបាលកម្ពុជា ទម្លាក់ចោលការចោទប្រកាន់លើយុវជនទាំងនោះ និងដោះលែងយុវជន៣នាក់ដែលត្រូវបានតុលាការសម្រេចឃុំខ្លួនជាបណ្តោះអាសន្ននោះវិញផងដែរ។
UK Foreign Minister @DominicRaab plans to visit #Cambodia tomorrow, says wants to talk about the environment. OK great, how about raising imprisonment of environmental rights defenders? Time for @FCDOGovUK @ukincambodia to start speaking out! @hrw https://t.co/8oacYES6UF pic.twitter.com/vTfqA7SJ0L
— Phil Robertson (@Reaproy) June 22, 2021
លោក Phil Robertson នាយករងអង្គការ Human Rights Watch ប្រចាំតំបន់អាស៊ី បានលើកឡើងក្នុងសេចក្តីថ្លែងការណ៍នោះថា រដ្ឋាភិបាលកម្ពុជាបានបង្កើនយុទ្ធនាការរបស់ខ្លួន ដើម្បីបំបិទមាត់សកម្មជនតស៊ូមតិដើម្បីការពារបរិស្ថាន។
លោកបន្តថា៖ «រដ្ឋាភិបាលបរទេស ក្រុមប្រទេសជាសមាជិកអង្គការសហប្រជាជាតិ និងម្ចាស់ជំនួយអន្តរជាតិ គួរតែអំពាវនាវទៅអាជ្ញាធរកម្ពុជាទម្លាក់ចោលការចោទប្រកាន់ដែលមិនសមហេតុផល ចំពោះសកម្មជនបរិស្ថានទាំងនោះ និងថ្កោលទោសជាសាធារណៈចំពោះការគាបសង្កត់បន្ថែមទៀតលើសកម្មភាពដែលធ្វើឡើងដោយសន្តិវិធី»។
មេធាវីការពារក្តីឱ្យសកម្មជនការពារបរិស្ថាន លោក សំ សុគង់ មានប្រសាសន៍ថា កាលពីថ្ងៃម្សិិលមិញ ក្រុមមេធាវីបានស្នើសុំទៅតំណាងអយ្យការនិងចៅក្រមស៊ើបសួរ ឱ្យលើកលែងការចោទប្រកាន់កូនក្តីរបស់ខ្លួនដែរ ប៉ុន្តែត្រូវបានមន្ត្រីតុលាការច្រានចោលការស្នើសុំនេះ។
លោកមេធាវីរូបនោះយល់ឃើញថា ការឃុំខ្លួននិងចោទប្រកាន់កូនក្តីរបស់លោកជារឿងអយុត្តិធម៌ ដោយសារពួកគេធ្វើការងារជួយការពារធនធានធម្មជាតិតែប៉ុណ្ណោះ មិនមានបំណងប្រព្រឹត្តអំពើល្មើសនិងធ្វើឱ្យប៉ះពាល់ដល់អង្គព្រះមហាក្សត្រនោះទេ។
លោកមានប្រសាសន៍ថា៖ «ទាក់ទងការចោទប្រកាន់នេះ ទាក់ទងនឹងរួមគំនិតក្បត់ និងប្រមាថព្រះមហាក្សត្រ ជាបទល្មើសមួយមានលក្ខណៈទ្រង់ទ្រាយធំ ធ្ងន់ធ្ងរ មិនទាន់ទទួលយកបានទេ។ យើងឃើញសកម្មភាពនិងកម្លាំងរបស់ពួកគាត់ពីរទៅបីនាក់នេះ ខ្ញុំគិតថា មិនអាចមានអំណាច ឬឥទ្ធិពល ឬមានបញ្ជាធ្វើអ្វីបានទេ ប៉ុន្តែគាត់គ្រាន់តែជាការចូលរួមធ្វើការងារសង្គម ដើម្បីផលប្រយោជន៍សង្គមតែប៉ុណ្ណោះ»។
វីអូឌី មិនអាចសុំការបំភ្លឺពីអ្នកនាំពាក្យក្រសួងយុត្តិធម៌ លោក ជិន ម៉ាលីន និងលោក គឹម សន្តិភាព បានទេនៅថ្ងៃនេះ។
មន្ត្រីស៊ើបអង្កេតជាន់ខ្ពស់នៅសមាគមអាដហុក លោក សឹឹង សែនករុណា សង្កេតឃើញថា ការចាប់ឃុំខ្លួននិងចោទប្រកាន់សកម្មជនការពារបរិស្ថានទាំងនោះហាក់ផ្ទុយនឹងអំពើដែលពួកគេប្រព្រឹត្ត។ លោកចាត់ទុកការចោទប្រកាន់របស់តុលាការថាជារឿងបំបាក់ស្មារតីអ្នកការពារធនធានធម្មជាតិ ខណៈកម្ពុជាកំពុងរងការបំផ្លិចបំផ្លាញបរិស្ថាននិងធនធានធម្មជាតិពីសំណាក់ជនខិលខូចមួយចំនួន ជាពិសេសអ្នកមានលុយនិងមានអំណាចជាដើម។
លោកមានប្រសាសន៍ថា៖ «វាជាការបំបាក់ទឹកចិត្តនិងស្មារតីរបស់សកម្មជនដែលហ៊ានចេញមុខការពារបរិស្ថាននិងការពារធនធានធម្មជាតិ។ ចំណុចទាំងអស់នេះ យើងដឹងស្រាប់ហើយ ធនធានយុវជនដែលហ៊ានលះបង់ធ្វើកិច្ចការងារដើម្បីប្រទេសជាតិ ដើម្បិសង្គមជាតិ យើងឃើញថា នៅកម្ពុជាយើងកំពុងតែមានភាពខ្សត់ខ្សោយ ហើយយើងឃើញហើយ ក្នុងខណៈយុវជនជាច្រើនទៀត ដែលភាគច្រើនមានភាពអាត្មានិយមច្រើនជាងការគិតគូរស្រុកទេសនិងសង្គមជាតិ»។
មន្ត្រីគម្រោងតស៊ូមតិនៃគម្រោងអ្នកការពារព្រៃឈើ នៃសមាគមបណ្តាញយុវជនកម្ពុជា លោក សាន់ ម៉ាឡា យល់ឃើញថា ការចាប់ខ្លួននិងចោទប្រកាន់លើក្រុមយុវជនបរិស្ថានកាន់តែច្រើនថែមទៀតនារយៈពេលចុងក្រោយនេះ បង្ហាញថា ជាសារគំរាមកំហែងដល់អ្នកការពារបរិស្ថាននៅកម្ពុជា ពីព្រោះអ្នកមានអំណាចមួយចំនួនខ្លាចពួកគេនិយាយរិះគន់ពីចំណុចខ្វះខាតនិងអំពើពុករលួយជាដើម។
ទោះជាបែបនេះក្តី លោក សាន់ ម៉ាឡា ប្រកាន់ជំហរតស៊ូមតិនិងចូលរួមការពារធនធានធម្មជាតិនៅកម្ពុជា ដោយមិនខ្លាចការគំរាមកំហែងចាប់ឃុំខ្លួនដាក់ពន្ធនាគារនោះទេ ដោយសារពួកគេធ្វើការងារបម្រើប្រយោជន៍ជាតិជាធំ។
ជាក់ស្តែង កាលពីថ្ងៃទី៥ ខែឧសភា ឆ្នាំ២០២១ យុវជនមាតាធម្មជាតិ ៣នាក់ រួមមាន លោក ថុន រដ្ឋា កញ្ញា ឡុង គន្ធា និងកញ្ញា ភួន កែវរស្មី ត្រូវបានសាលាដំបូងរាជធានីភ្នំពេញ សម្រេចផ្តន្ទាទោសចន្លោះពី១៨ខែ ទៅ២០ខែ និងពិន័យជាប្រាក់ម្នាក់ៗចំនួន៤លានរៀល ក្រោមបទចោទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ។
ចំណែកសកម្មជនមាតាធម្មជាតិ២នាក់ផ្សេងទៀត គឺលោក Alejandro Gonzalez-Davidson និងកញ្ញា ជា គន្ធីន ក៏ត្រូវបានកាត់ទោសដោយកំបាំងមុខនៅពេលនោះផងដែរ។
ដើមចមដែលនាំឱ្យមានការចាប់ខ្លួនអ្នកទាំង៣នាក់ ក្រោយពេលសមាជិករបស់ពួកគេម្នាក់ប្រកាសធ្វើយុទ្ធនាការដើរថ្មើរជើងពីរមណីយដ្ឋានវត្តភ្នំ ទៅកាន់ផ្ទះលោកនាយករដ្ឋមន្ត្រី ហ៊ុន សែន ក្បែរវិមានឯករាជ្យ ដើម្បីស្វែងរកកិច្ចអន្តរាគមន៍ឱ្យបញ្ឈប់ការចាក់ដីលុបបឹងទំនប់កប់ស្រូវ ឬបឹងតាមោក ដោយសារបឹងនេះជាបឹងធម្មជាតិធំជាងគេ និងនៅសេសសល់ចុងក្រោយគេនៅរាជធានីភ្នំពេញ ខណៈបឹងនេះកំពុងរងការចាក់ដីលុបក្រោមគម្រោងអភិវឌ្ឍន៍៕
អត្ថបទទាក់ទង
បទវិភាគ៖ តើការចាប់ខ្លួនសកម្មជនបរិស្ថានជាបន្តបន្ទាប់ ចំណេញឬខាតសម្រាប់ជាតិ?
កាលពីថ្ងៃទី៥ ខែឧសភា ឆ្នាំ២០២១ យុវជនមាតាធម្មជាតិ ៣នាក់ រួមមាន លោក ថុន រដ្ឋា កញ្ញា ឡុង គន្ធា និងកញ្ញា ភួន កែវរស្មី ត្រូវបានសាលាដំបូងរាជធានីភ្នំពេញ សម្រេចផ្តន្ទាទោសចន្លោះពី១៨ខែ ទៅ២០ខែ និងពិន័យជាប្រាក់ម្នាក់ៗចំនួន៤លានរៀល ក្រោមបទចោទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ។