ជនជាតិដើមភាគតិចម្នាក់នៅស្រុកកោះញែក ខេត្តមណ្ឌលគិរី ត្រូវថ្នាក់លើបញ្ចប់មុខតំណែងជាអនុប្រធានភូមិ ក្រោយរូបគាត់សកម្មក្នុងការចូលរួមបង្កើតនិងការពារផលប្រយោជន៍សហគមន៍ជនជាតិដើមភាគតិចពូនង។
លោក ញាស់ ពើង ជាអនុប្រធានភូមិអន្ត្រេះ ឃុំអរបួនលើ ស្រុកកោះញែក បានប្រាប់ វីអូឌី នៅថ្ងៃពុធនេះថា រូបគាត់ត្រូវបានរដ្ឋបាលឃុំសម្រេចបញ្ចប់មុខតំណែងកាលពីថ្ងៃទី១៦ ខែមិថុនា ឆ្នាំ២០២១។ លោកបញ្ជាក់ថា ករណីអាជ្ញាធរឃុំបញ្ចប់មុខតំណែងនេះ ធ្វើឡើងក្រោយពីរូបលោកសកម្មជាមួយសហគមន៍ក្នុងការជំរុញឱ្យមានការចុះបញ្ជីដីធ្លីជាសមូហភាពសម្រាប់សហគមន៍ជនជាតិដើមភាគតិចពូនង។
លោកបន្ថែមថា៖ «ខ្ញុំយល់ថា ការដកខ្ញុំចេញពីតំណែងនេះជារឿងអយុត្តិធម៌មួយសម្រាប់ខ្ញុំ។ ខ្ញុំគ្មានធ្វើខុសអីសោះ បើខ្ញុំលួចគេ ឆក់គេ ប្លន់គេ ឬរំលោភបំពានយកដីធ្លី ឬលក់ដីរដ្ឋ ឬរំលោភយកផលប្រយោជន៍ប្រជាពលរដ្ឋសម្រាប់បម្រើផលប្រយោជន៍ខ្លួនឯង មិនថាទេ»។
បើតាមលោក ញាស់ ពើង នៅឆ្នាំ២០១៣ បានចូលបម្រើការងារជាអនុប្រធានភូមិ និងនៅឆ្នាំ២០១៥ ត្រូវបានជ្រើសរើសជាសមាជិកគណៈកម្មការសហគមន៍ជនជាតិដើមភាគតិច រហូតមកដល់បច្ចុប្បន្ននេះ។
លោក ញាស់ ពើង ឱ្យដឹងទៀតថា កន្លងមក រូបលោកនិងប្រជាសហគមន៍តែងតែជំរុញឱ្យមានការកំណត់និងចុះបញ្ជីដីធ្លីជាសមូហភាពសម្រាប់ជនជាតិដើមភាគតិចពូនង។ ហើយនៅដើមឆ្នាំ២០២១នេះ មន្ត្រីក្រសួងរៀបចំដែនដី និងអាជ្ញាធរពាក់ព័ន្ធ បានចុះវាស់វែងដីសម្រាប់ចុះបញ្ជីជាសមូហភាពជូនពួកគាត់។
លោកបន្តថា ដីធ្លីដែលពួកគាត់ទាមទារចុះបញ្ជីជាសមូហភាពសម្រាប់ជនជាតិដើមភាគតិចនោះ មាន៥ប្រភេទ រួមមាន ដីលំនៅឋានជាក់ស្តែង ដីអាស្រ័យផលជាក់ស្តែង ដីសម្រាប់កប់សព ដីអារក្ស និងដីចម្ការវិលជុំ ដែលមានទំហំជាង២ ០០០ហិកតា ស្ថិតក្រោមការគ្រប់គ្រងរបស់ជនជាតិដើមភាគតិចពូនង ៤៨គ្រួសារ។ លោកថា ចាប់តាំងពីមានការកំណត់វាស់វែងនិងជំរុញឱ្យមានការចុះបញ្ជីដីធ្លីជាសមូហភាពនេះ ថ្នាក់ដឹកនាំឃុំមួយចំនួនមិនពេញចិត្តនោះទេ ដោយសារបានប៉ះពាល់ដីធ្លីនិងផលប្រយោជន៍របស់ថ្នាក់ដឹនាំឃុំទាំងនោះ។
ពលរដ្ឋជនជាតិដើមភាគតិចរស់នៅភូមិអន្ត្រេះ អ្នកស្រី យ៉ា យ៉ាន់នី និយាយថា ក្រុបប្រឹក្សាឃុំបញ្ចប់មុខតំណែងអនុប្រធានភូមិ លោក ញាស់ ពើង នេះ គឺពុំបានបញ្ជាក់ហេតុផលច្បាស់លាស់នោះទេ។ អ្នកស្រីថា រូបគាត់និងពលរដ្ឋភាគច្រើននៅក្នុងភូមិមិនពេញចំពោះការបញ្ចប់មុខតំណែងនេះទេ។
ជនជាតិដើមភាគតិចពូនងរូបនេះ ឱ្យដឹងថា លោក ញាស់ ពើង តែងតែយកចិត្តទុកដាក់និងគិតគូរពីផលប្រយោជន៍របស់ជនជាតិដើមភាគតិចពូនង ជាពិសេសក្មេងជំនាន់ក្រោយ តាមរយៈការជំរុញឱ្យមានការចុះបញ្ជីដីធ្លីជាសមូហភាព។ អ្នកស្រីថា កន្លងមក ថ្នាក់ដឹកនាំមួយចំនួនបាននាំគ្នាលក់ដីរដ្ឋប្រហែល៩០០ហិកតាទៅឱ្យឈ្មួញ ប៉ុន្តែលោក ញាស់ ពើង មិនបានចូលរួមឡើយ ដែលធ្វើឱ្យមេឃុំនិងថ្នាក់ដឹកនាំផ្សេងទៀតមិនពេញចិត្ត។
អ្នកស្រីបន្ថែមថា៖ «ជនជាតិភាគតិចពួកខ្ញុំ បានធ្វើដល់អនុភូមិសម្រាប់គ្រប់គ្រងក្នុងភូមិ ហើយភូមិនេះពោរពេញទៅដោយជនជាតិដើមភាគតិច ហើយឥលូវគាត់ដកអនុប្រធានភូមិដែលជាជនជាតិដើមភាគតិចទៀត ហើយគ្មានការឯកភាពពីសាម៉ីខ្លួនថែមទៀត ដកយកៗ ដល់ពេលប្រជាពលរដ្ឋតវ៉ាមិនឱ្យដក គាត់ថា ពលរដ្ឋគ្មានសិទ្ធិគាំទ្រ គ្មានសិទ្ធិផ្តិតមេដៃ ទាល់តែក្រុមប្រឹក្សាឃុំបានមានសិទ្ធិ។ មិនមែនពួកយើងមិនពេញចិត្តនឹងគាត់រើសអ្នកថ្មីនោះទេ សំខាន់ការដកនេះសុំឱ្យមានហេតុផល។ យើងទាមទារឱ្យគាត់មកប្រជុំប្រាប់ហេតុផលជូនពលរដ្ឋក្នុងភូមិ តែគាត់អត់ព្រមមកទេ»។
មេឃុំអរបួនលើ លោក ហាន សុខន មានប្រសាសន៍ថា ការបញ្ចប់មុខតំណែងលោក ញាស់ ពើង ពីអនុប្រធានភូមិនេះ មិនមែនដោយសារការគុំកួនអ្វីនោះទេ។ លោកថា ការបញ្ចប់មុខតំណែងអនុប្រធានភូមិរូបនោះ គឺដើម្បីប្តូរដាក់បេក្ខភាពជាស្ត្រីវិញ ដោយសាររដ្ឋបាលឃុំអរបួនលើ ខ្វះបេក្ខភាពជាស្ត្រីសម្រាប់ធ្វើកិច្ចការងារផ្នែកស្ត្រីនិងកុមារទៅតាមការស្នើសុំរបស់ក្រសួងកិច្ចការនារី។
លោកបន្ថែមថា៖ «អ៊ីចឹងហើយយើងសុំប្តូរគាត់ ទី១! ទី២ គាត់ជាប្រធានសហគមន៍នីតិបុគ្គលផង ដល់អ៊ីចឹងគាត់ធ្វើការបម្រើសហគមន៍ ពេលយើងត្រូវការគាត់ធ្វើការងាររដ្ឋបាល គាត់មិនសូវបានចូលរួមទេ។ អ៊ីចឹងយើងសុំប្តូរសមាសភាពទៅ ហើយសមាសភាពស្ត្រីនោះ ក៏យើងយកចេញពីភូមិអន្ត្រេះដែរ មិនមែនយកពីណាមកទេ។ យើងធ្វើនេះយោងតាមការស្នើសុំរបស់ក្រសួងកិច្ចការនារី ចង់បានស្ត្រីម្នាក់នៅក្នុងភូមិ ដើម្បីជួយការងារស្ត្រីនិងកុមារទេ»។
កាលពីថ្ងៃទី២១ ខែមិថុនា ឆ្នាំ២០២១ តំណាងក្រុមគណបក្សប្រជាជនកម្ពុជា នៅឃុំអរបួនលើ បានជូនលិខិតមួយទៅមេឃុំ លោក ហាន សុខន ដោយបដិសេធចំពោះការដកតំណែងលោក ញាស់ ពើង ពីអនុប្រធានភូមិ ដោយថា តំណាងក្រុមបក្សនិងប្រជាពលរដ្ឋពេញចិត្តនឹងសកម្មភាពការងាររបស់ លោក ញាស់ ពើង ក្នុងការបម្រើប្រជាពលរដ្ឋនាពេលកន្លងមក។
លិខិតដដែលបន្តទៀតថា តំណាងក្រុមបក្សនិងប្រជាពលរដ្ឋមិនអាចទទួលយកបានទេដែលក្រុមប្រឹក្សាឃុំបញ្ឈប់លោក ញាស់ ពើង ពីតំណែង ក្រោមហេតុផលចង់បានស្ត្រីមកជំនួស ដើម្បីបំពេញការងារឱ្យមានសមភាពយេនឌ័រនោះ៕
