មន្ត្រីជាន់ខ្ពស់ក្រសួងយុត្តិធម៌ ឱ្យដឹងថា តំណាងអយ្យការអមសាលាដំបូងរាជធានីភ្នំពេញ កំពុងពិនិត្យវិធានការផ្លូវច្បាប់ទៅលើមេដឹកនាំអតីតគណបក្សប្រឆាំង លោក សម រង្ស៊ី ដែលបានរិះគន់និងប្រមាថអង្គព្រះមហាក្សត្រ។
ការលើកឡើងនេះ ធ្វើឡើងបន្ទាប់ពីលោក សម រង្ស៊ី ប្រធានស្តីទីអតីតគណបក្សសង្គ្រោះជាតិ កាលពីថ្ងៃទី២២ ខែមិថុនា បានប្រមាថធ្ងន់ៗទៅលើអង្គព្រះមហាក្សត្រ។
នៅលើបណ្តាញសង្គមហ្វេសប៊ុកផ្ទាល់ខ្លួនរបស់លោក សម រង្ស៊ី បានលើកឡើងថា ព្រះមហាក្សត្រសព្វថ្ងៃ ព្រះអង្គមិនដែលការពារប្រយោជន៍សម្រាប់ប្រជាពលរដ្ឋរបស់ទ្រង់ទេ ផ្ទុយទៅវិញ បានបើកផ្លូវឱ្យលោកនាយករដ្ឋមន្រ្តី ហ៊ុន សែន ចាប់និងចោទប្រកាន់យុវជនការពារបរិស្ថានជាដើម។ លោក សម រង្ស៊ី បន្តថា កម្ពុជាត្រូវចំណាយថវិការដ្ឋជាច្រើន សម្រាប់ស្ថាប័នព្រះមហាក្សត្រ ប៉ុន្តែប្រជាពលរដ្ឋមិនអាចទីពឹងលើព្រះអង្គបានពេលជួបវិបត្តិ។
ឆ្លើយតបរឿងនេះ រដ្ឋលេខាធិការ និងជាអ្នកនាំពាក្យក្រសួងយុត្តិធម៌ លោក ជិន ម៉ាលីន មានប្រសាសន៍ថា នេះជាទម្លាប់របស់លោក សម រង្ស៊ី ទៅហើយ ដែលតែងមាក់ងាយអង្គព្រះមហាក្សត្រជាហូរហែកន្លងមក ហើយថា នេះជារបៀបដែលលោក សម រង្ស៊ី តែងប្រើប្រាស់សម្រាប់ធ្វើជាទុនក្នុងឆាកជីវិតនយោបាយរបស់លោក។
អ្នកនាំពាក្យរូបនេះបន្តថា សកម្មភាពរបស់អតីតប្រធានស្តីទីបក្សប្រឆាំងនេះ មិនមែនត្រឹមតែជាខ្មែរទេដែលមិនហ៊ានដើរតាម សូម្បីបរទេសក៏ខ្លាចដែរ ព្រោះតែសកម្មភាពឆ្គាំឆ្គងនេះ។
បើតាមលោក ជិន ម៉ាលីន តុលាការនឹងពិនិត្យលទ្ធភាពក្នុងការចោទប្រកាន់បន្ថែមទៀត ប្រឆាំងនឹងអតីតប្រធានស្តីទីអតីតបក្សប្រឆាំងរូបនេះ។
លោកបន្តថា៖ «ជាគោលការណ៍ច្បាប់ ការប្រមាថអង្គព្រះមហាក្សត្រនេះ គឺជាបទល្មើសព្រហ្មទណ្ឌដែលមានបញ្ញត្តិនៅក្នុងក្រមព្រហ្មទណ្ឌ។ អ៊ីចឹងទេ! ស្ថានប័នអយ្យការគឺព្រះរាជអាជ្ញា គឺគាត់ផ្តើមនូវបណ្តឹងអាជ្ញាបាន ធ្វើការចោទប្រកាន់ទណ្ឌិត សម រង្ស៊ី ដូចដែលធ្លាប់ធ្វើកន្លងមកបាន»។
គិតមកដល់ពេលនេះ លោក សម រង្ស៊ី ត្រូវបានតុលាការផ្តន្ទាទោសសរុបជិត៥០ឆ្នាំហើយ ក្នុងរយៈពេលប្រមាណ២០ឆ្នាំមកនេះ។ អតីតមេបក្សប្រឆាំងដ៏ធំជាងគេនៅកម្ពុជារូបនេះ ធ្លាប់លើកឡើងថា កំហុសរបស់លោកគឺព្រោះតែជួយការពារជនរងគ្រោះរាប់លាននាក់ដែលមិនមានសំឡេងប្រឆាំងនឹងភាពអយុត្តិធម៌។
នាយកខុទ្ទកាល័យព្រះបរមរាជវាំង លោក អ៊ុំ ដារាវុធ មានប្រសាសន៍ថា ខាងព្រះបរមរាជវាំងនៅមិនទាន់ដឹងថានឹងត្រូវអនុវត្តបែបណានៅឡើយទេ ចំពោះសកម្មភាពរបស់លោក សម រង្ស៊ី នៅពេលនេះ។
យ៉ាងណា លោកថា៖ «ដូចដឹងស្រាប់ហើយ រឿងព័ត៌មានទាល់ទទួលបានគ្រប់ជ្រុងជ្រោយ បានយើងអាចបញ្ជាក់បាន! យើងមិនចេះតែនិយាយបានទេ តើប្រមាថយ៉ាងម៉េច ធ្ងន់ធ្ងរយ៉ាងម៉េច ជាដើម»។
ប្រធានវិទ្យាស្ថានប្រជាធិបតេយ្យកម្ពុជា លោក ប៉ា ចន្ទរឿន យល់ឃើញថា សកម្មភាពដដែលរបស់លោក សម រង្ស៊ី អាចនឹងធ្វើឱ្យលោកពិបាកវិលចូលក្នុងឆាកនយោបាយវិញណាស់។ លោកបន្តថា ការធ្វើនយោបាយនៅកម្ពុជា អ្នកនយោបាយខ្លះព្យាយាមធ្វើយ៉ាងណាឱ្យគូវិវាទឈឺចាប់និងអាម៉ាស់ជាជាងជួយផ្តល់ដំណោះស្រាយ។
លោកបន្តថា៖ «យុទ្ធសាស្រ្តឬក៏យុទ្ធវិធីដែលបែបដុតឱ្យខ្លោចរោលឱ្យឆៅ វាមិននាំឱ្យខ្មែរយើងចំណេញអីទេ។ ប្រវត្តិសាស្រ្តបានបង្ហាញហើយថា កាលណាខ្មែរប្រើយុទ្ធសាស្រ្តដុតឱ្យខ្លោចរោលឱ្យឆៅហើយ នឹងធ្វើឱ្យស្រុកទេសហ្នឹងត្រូវឆេះខ្លោចហើយ សាកសពគរដូចភ្នំ តួយ៉ាងដូចសម័យ ប៉ុល ពល»។
រដ្ឋលេខាធិការ និងជាអ្នកនាំពាក្យក្រសួងយុត្តិធម៌ លោក ជិន ម៉ាលីន បញ្ជាក់ថា កន្លងមក កម្ពុជាបានព្យាយាមចាប់ខ្លួនលោក សម រង្ស៊ី យកមកផ្តន្ទាទោសតាមច្បាប់ ប៉ុន្តែការធ្វើបត្យាប័នអតីតមេបក្សប្រឆាំងនេះមានភាពលំបាក។ លំបាកត្រង់ថា រដ្ឋជាបរទេសគឺមិនងាយផ្តល់កិច្ចសហការក្នុងការផ្តល់បត្យាប័នទៅតាមការស្នើសុំរបស់កម្ពុជា។
បើទោះជាបែបណា លោក សម រង្ស៊ី ធ្លាប់ប្រកាសពីការធ្វើមាតុភូមិនិវត្តន៍ចូលមកកម្ពុជាចំនួន២ដងរួចមកហើយ តែមិនបានសម្រេច ខណៈរដ្ឋាភិបាលកម្ពុជាបានបិទជើងហោះហើរនិងបិទព្រំដែនជាដើម។
រដ្ឋធម្មនុញ្ញមាត្រា៧ ក្នុងកថាខណ្ឌទី៣ ចែងថា អង្គព្រះមហាក្សត្រមិនអាចនរណារំលោភបំពានបានឡើយ។ ដោយឡែក មាត្រា៤៣៧ (ស្ទួន) នៃក្រមព្រហ្មទណ្ឌវិញ បានកំណត់ថា ការប្រមាថព្រះមហាក្សត្រ តាមរូបភាពទាំងកាយវិការ សម្ដី និងគំនូរជាដើម ត្រូវផ្តន្ទាទោសដាក់ពន្ធនាគារពី១ឆ្នាំ ទៅ៥ឆ្នាំ និងពិន័យជាប្រាក់ពី២លាន ទៅ១០លានរៀល៕
