រដ្ឋបាលរាជធានីភ្នំពេញ អនុញ្ញាតឱ្យបើកដំណើរការឡើងវិញនូវផ្សារឯកជនមួយចំនួនចាប់ពីថ្ងៃស្អែកទៅ ប៉ុន្តែភ្ជាប់ជាមួយនូវលក្ខខណ្ឌមួយចំនួន ដើម្បីទប់ស្កាត់ការឆ្លងរាលដាលធ្ងន់ធ្ងរនៃជំងឺកូវីដ-១៩ចូលទៅក្នុងសហគមន៍។
ក្នុងសេចក្តីសម្រេចមួយចុះថ្ងៃទី២៤ ខែមិថុនា ឆ្នាំ២០២១ រដ្ឋបាលរាជធានីភ្នំពេញ បានលើកឡើងថា អំឡុងពេលបើកឱ្យដំណើរការឡើងវិញនូវផ្សារឯកជន លើកលែងតែផ្សារណាដែលមានលក្ខណៈមិនរៀបរយនេះ ម្ចាស់ផ្សារឬគណៈគ្រប់គ្រងផ្សារឯកជនទាំងនោះ ត្រូវអនុវត្តនូវវិធានការរដ្ឋបាលនិងវិធានការសុខាភិបាលឱ្យបានខ្ជាប់ខ្ជួន។
រដ្ឋបាលរាជធានីភ្នំពេញ បានតម្រូវឱ្យម្ចាស់ផ្សារត្រូវកំណត់ចំនួនអតិថិជនចេញ-ចូលផ្សារឱ្យបានសមស្រប ដើម្បីរក្សាគម្លាតសុវត្ថិភាពបុគ្គល សង្គម និងចៀសវាងការប្រជ្រៀតគ្នាឬការប្រមូលផ្តុំមនុស្សច្រើនដែលជាហានិភ័យនៃការចម្លងជំងឺកូវីដ-១៩។
សេចក្តីសម្រេចដដែលបន្ថែមថា អាជីវករ សន្តិសុខ បុគ្គលិក កម្មករ អតិថិជន និងជនទាំងឡាយដែលមានវត្តមានក្នុងបរិវេណផ្សារ ត្រូវពាក់ម៉ាស់និងរក្សាគម្លាតជាចាំបាច់ ហើយក្នុងករណីពួកគេមិនអនុវត្តតាម ម្ចាស់ផ្សារឬគណៈគ្រប់គ្រងផ្សារឯកជននីមួយៗត្រូវសហការជាមួយមន្ត្រីជំនាញនិងអាជ្ញាធរពាក់ព័ន្ធ ដើម្បីអនុវត្តការផាកពិន័យជាបន្ទាន់ចំពោះបុគ្គលនោះពី២០ម៉ឺនរៀល ដល់១លានរៀល ខណៈការប្រមូលផ្តុំមនុស្សច្រើនខុសពីការណែនាំនេះ ត្រូវពិន័យប្រាក់២លានរៀលទៅតាមច្បាប់កំណត់។
ប្រភពដដែលបន្តថា ម្ចាស់ផ្សារឬគណៈគ្រប់គ្រងផ្សារឯកជននីមួយៗត្រូវចាត់ឱ្យមានអ្នកចាំវាស់កម្តៅ បាញ់ទឹកអាល់កុល ជែល និងអនុវត្តការស្កេន QR Code «ទប់ស្កាត់កូវីដ Stop Covid» នៅតាមបណ្តាច្រកចេញ-ចូលផ្សារដែលបានកំណត់ និងវិធានការផ្សេងៗទៀត។
រដ្ឋបាលរាជធានីភ្នំពេញ បានប្រគល់ភារកិច្ចនេះទៅរដ្ឋបាលខណ្ឌទាំង១៤ និងមន្ទីរពាណិជ្ជកម្មរាជធានីភ្នំពេញចុះត្រួតពិនិត្យតាមផ្សារនីមួយៗក្នុងដែនសមត្ថកិច្ចរបស់ខ្លួន ដើម្បីធានាពីការអនុវត្តវិធានការនេះឱ្យបានត្រឹមត្រូវតាមសេចក្តីសម្រេច ហើយព្រមានចាត់វិធានការរដ្ឋបាលនិងច្បាប់ចំពោះម្ចាស់ឬគណៈគ្រប់គ្រងផ្សារណាដែលមិនព្រមសហការនិងមិនអនុវត្តតាម។
អ្នកគ្រប់គ្រងផ្សារអាហារធម្មជាតិនៅរាជធានីភ្នំពេញ លោក រិច ចំរើន បានសាទរចំពោះការសម្រេចដែលមានភ្ជាប់ជាមួយលក្ខខណ្ឌនេះ ដើម្បីទប់ស្កាត់ការឆ្លងរាលដាលជំងឺកូវីដ-១៩។
អ្នកគ្រប់គ្រងរូបនេះ ឱ្យដឹងថា ក្នុងស្ថានភាពជំងឺកូវីដ-១៩កំពុងរាតត្បាតនេះ ផ្សារអាហារធម្មជាតិដែលលោកគ្រប់គ្រងសព្វថ្ងៃ បានអនុវត្តនូវវិធានការរដ្ឋបាលនិងវិធានការការពាររបស់ក្រសួងសុខាភិបាលយ៉ាងខ្ជាប់ខ្ជួន ដើម្បីចូលរួមទប់ស្កាត់ការឆ្លងរាលដាលជំងឺមួយនេះ។
លោកបន្ថែមថា៖ «ក្នុងស្ថានភាពដែលលំបាកនេះ មិនចាំបាច់ដល់ក្រសួងឬសាសាក្រុងគាត់ណែនាំយើងទេ គឺយើងបានអនុវត្តនូវវិធានការការពាររបស់សុខាភិបាលយ៉ាងខ្ជាប់ខ្ជួនរួចទៅហើយ។ ដូចករណីក្រសួងគេចេញនូវ QR Code ដើម្បីឱ្យស្កេន សឹងថាមិនចាំដល់គេប្រាប់យើងផង គឺយើងត្រូវធ្វើខ្លួនឯង យើងត្រូវអនុវត្តរួមគ្នាជាមួយក្រសួង។ បើសិនយើងអត់ធ្វើអីទៅតាមការណែនាំរបស់រដ្ឋាភិបាល វានឹងបង្កបញ្ហា។ យើងដឹងថា វាមានការប្រឈមមុខមួយចំនួន ប៉ុន្តែត្រូវតែទ្រាំ ត្រូវតែសម្របខ្លួនទៅក្នុងបរិបទថ្មី ដើម្បីសុខសុវត្ថិភាពយើងទាំងអស់គ្នា»។
ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន ក៏បានសាទរចំពោះវិធានការបង្ការទប់ស្កាត់ជំងឺកូវីដ-១៩ និងការបើកឱ្យដំណើរការឡើងវិញចំពោះផ្សារឯកជននេះ។ លោកថា ការអនុញ្ញាតឱ្យផ្សារឯកជនដំណើរឡើងវិញនេះ ជាឱកាសមួយសម្រាប់កសិករខ្មែរមានកន្លែងសម្រាប់លក់ផលិតផលកសិកម្មរបស់ពួកគេ។
លោកបន្ថែមថា៖ «រឿងដែលត្រូវគិតមួយទៀតនោះ សាលារាជធានីគួរតែលើកទឹកចិត្តឱ្យផ្សារឯកជនដែលបានបើកឡើងវិញនោះ ប្រមូលទិញផលិតផលកសិករដែលជាវិស័យកសិកម្មឱ្យបានច្រើនក្នុងការលក់ដូរ។ ជាឱកាសមួយដើម្បីផ្តល់នូវចំណូលជូនដល់ពួកគាត់ដែលកំពុងមានបញ្ហាទីផ្សារ អាចលក់ដូរនៅផ្សារឯកជនដែលបានបើកនេះ។ ហើយមួយទៀត សុំឱ្យមានការរឹតបន្តឹងការនាំចូល ការនាំបន្លែពីប្រទេសជិតខាងចូលមកកម្ពុជា ព្រោះទុកឱកាសទីផ្សារសម្រាប់កសិករខ្មែរគាត់អាចលក់បន្លែរបស់ពួកគាត់បាន»។
កាលពីថ្ងៃទី១៤ ខែមិថុនា ឆ្នាំ២០២១ រដ្ឋបាលរាជធានីភ្នំពេញ ក៏បានអនុញ្ញាតឱ្យបើកដំណើរការគ្រប់អាជីវកម្ម ការលក់ដូរជាប្រក្រតីឡើងវិញ ក្នុងក្របខណ្ឌផ្សាររដ្ឋទាំងអស់នៅរាជធានីភ្នំពេញ ក្រោយបានបិទមួយរយៈ ដើម្បីទប់ស្កាត់ការឆ្លងរាលដាលជំងឺកូវីដ-១៩៕
