លោកនាយករដ្ឋមន្ត្រី ហ៊ុន សែន បានដាក់ចេញនូវអនុសាសន៍៦ចំណុចបន្ថែមទៀត ដើម្បីទប់ស្កាត់បទល្មើសគ្រឿងញៀន ខណៈអង្គការសហប្រជាជាតិរកឃើញថា កម្ពុជាជាគោលដៅនៃក្រុមឧក្រិដ្ឋជនគ្រឿងញៀនផលិតនិងចែកចាយ។
តាមរយៈសារលិខិតនៅក្នុងឱកាសប្រារព្ធទិវាអន្តរជាតិប្រយុទ្ធប្រឆាំងគ្រឿងញៀន នាថ្ងៃទី២៦ ខែមិថុនា ឆ្នាំ២០២១ ឱ្យដឹងថា វិធានការដើម្បីលើកកម្ពស់ប្រសិទ្ធភាពបន្ថែមទៀតលើការងារប្រយុទ្ធប្រឆាំងគ្រឿងញៀននោះ រួមមាន អាជ្ញាធរជាតិប្រយុទ្ធប្រឆាំងគ្រឿងញៀន និងគណៈបញ្ជាការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ ព្រមទាំងក្រសួងនិងស្ថាប័នពាក់ព័ន្ធនានា ត្រូវបន្តយកចិត្តទុកដាក់ម្ចាស់ការប្រកបដោយការទទួលខុសត្រូវខ្ពស់ អនុវត្តឱ្យកាន់តែមានប្រសិទ្ធភាពទៅតាមតួនាទីនិងភារកិច្ចរបស់ខ្លួន នូវផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៦ដែលរាជរដ្ឋាភិបាលបានដាក់ចេញកន្លងមក។
មួយវិញទៀត គណៈកម្មការនេះត្រូវបន្តផ្សព្វផ្សាយ អប់រំ និងជំរុញទៅក្រសួងស្ថាប័នពាក់ព័ន្ធ ហើយគណៈកម្មាធិការត្រួតពិនិត្យគ្រឿងញៀនរាជធានី-ខេត្ត ត្រូវធ្វើការអប់រំផ្សព្វផ្សាយអំពីគ្រោះថ្នាក់នៃគ្រឿងញៀនឱ្យស្រុះដៃគ្នា ជាពិសេសតាមរយៈប្រព័ន្ធផ្សព្វផ្សាយនិងបណ្តាញសង្គម រួមទាំងនៅតាមគ្រឹះស្ថានអប់រំសិក្សាគ្រប់កម្រិត ជាដើម។
លិខិតដដែលថា អាជ្ញាធរដែលទទួលខុសត្រូវក្នុងការបង្ការ ទប់ស្កាត់ បង្ក្រាបគ្រឿងញៀន ត្រូវដោះស្រាយនូវរាល់បញ្ហាកើតឡើង ដោយប្រកាន់ឱ្យបានខ្ជាប់ខ្ជួននិងអនុវត្តឱ្យមានប្រសិទ្ធភាព ដោយដាក់ចេញពាក្យស្លោក «៣កុំ ១រាយការណ៍»។
លិខិតថា៖ «ទី១ កុំពាក់ព័ន្ធ គឺកុំជួញដូរ កុំចែកចាយ កុំធ្វើខ្នងបង្អែក កុំគប់គិត និងកុំប្រើប្រាស់គ្រឿងញៀន និងទី២ កុំអន្តរាគមន៍ គឺកុំរារាំងការអនុវត្តច្បាប់ចំពោះឧក្រិដ្ឋជនគ្រឿងញៀន ទោះបីជាក្រុមគ្រួសារ សាច់ញាតិ ឬមិត្តភក្តិក៏ដោយ និងទី៣ កុំលើកលែង គឺកុំបន្ធូរបន្ថយការអនុវត្តច្បាប់ចំពោះឧក្រិដ្ឋជនគ្រឿងញៀន សមត្ថកិច្ចពាក់ព័ន្ធទាំងអស់ត្រូវអនុវត្តច្បាប់ដោយម៉ឺងម៉ាត់និងស្មោះត្រង់វិជ្ជាជីវៈរបស់ខ្លួន ហើយជនគ្រប់រូបត្រូវគោរពនិងអនុវត្តច្បាប់»។
មួយវិញទៀត រដ្ឋាភិបាលបានណែនាំដល់អាជ្ញាធរ ត្រូវបន្តបំផុសឱ្យមាតាបិតា អាណាព្យាបាល យកចិត្តទុកដាក់និងចូលរួមឱ្យកាន់តែសកម្មបន្ថែមទៀតក្នុងការអប់រំកូនចៅកុំឱ្យមានការពាក់ព័ន្ធនឹងបញ្ហាគ្រឿងញៀន ឬអប់រំ ណែនាំ និងលើកទឹកចិត្តកូនចៅដែលពាក់ព័ន្ធឬញៀនគ្រឿងញៀនឱ្យបញ្ឈប់និងទៅទទួលយកការព្យាបាលនិងស្តារនីតិសម្បទាឱ្យបានទាន់ពេលវេលា។
ក្រៅពីនេះ ក្រសួងស្ថាប័នពាក់ព័ន្ធទាំងអស់ត្រូវបន្តយកចិត្តទុកដាក់ក្នុងការពង្រឹងនិងពង្រីកបន្ថែមនូវកិច្ចសហប្រតិបត្តិការអន្តរជាតិ ទាំងក្នុងក្របខណ្ឌទ្វេភាគី ពហុភាគី តំបន់ និងជាសកល ដើម្បីទប់ស្កាត់ការចរាចរជួញដូរគ្រឿងញៀនខុសច្បាប់ ឱ្យកាន់តែមានប្រសិទ្ធភាពខ្ពស់។
អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀននៃក្រសួងមហាផ្ទៃ លោក មាស វិរិទ្ធ មានប្រសាសន៍ថា កត្តាដែលមិនទាន់អាចទប់ស្កាត់គ្រឿងញៀនបាន ដោយសារក្រុមឧក្រិដ្ឋជនគ្រឿងញៀនបានផ្លាស់ប្ដូរពីរបៀបជួញដូរ ផលិត និងការដាំដុះ ពីរយៈពេលយូរមករយៈពេលខ្លី។
លោកថា៖ «និន្នាការពិភពលោកមានការប្រែប្រួល ទាំងស្ថានភាពនយោបាយ សេដ្ឋកិច្ច ជម្លោះទឹកដីជាតិសាសន៍ និងបញ្ហាផ្ទៃក្នុងរបស់ប្រទេសនីមួយៗ ធ្វើឱ្យយន្តការត្រួតពិនិត្យគ្រឿងញៀនមានភាពឆកល្វែង។ ទន្ទឹមនោះ ក្រុមឧក្រិដ្ឋជនគ្រឿងញៀនផ្លាស់ប្ដូរក្នុងការផលិត ក្នុងការដាំដុះគ្រឿងញៀនដែលប្រើរយៈពេលយូរ មកធ្វើការផលិតចេញគ្រឿងញៀនចេញពីសារធាតុគីមីផ្សំ ហើយចំណុចនេះ វាបង្កលក្ខណៈងាយស្រួលឱ្យក្រុមឧក្រិដ្ឋជនដោយមិនប្រើប្រាស់ពេលវេលាច្រើន»។
អង្គការសហប្រជាជាតិបានចេញរបាយការណ៍កាលពីថ្ងៃទី១០ ខែមិថុនា ឆ្នាំ២០២១ ឱ្យដឹងថា កម្ពុជាគឺជាគោលដៅនៃក្រុមឧក្រិដ្ឋជនគ្រឿងញៀនប្រើប្រាស់សម្រាប់ចរាចរគ្រឿងញៀន ផលិត និងចែកចាយ បើទោះបីជាមានការឆ្លងរីករាលដាលនៃជំងឺកូវីដ-១៩ក្តី ប៉ុន្តែការចរាចរគ្រឿងញៀន ផលិត និងចែកចាយ មិនមានការថយចុះឡើយ។
របាយការណ៍របស់នាយកដ្ឋានប្រឆាំងគ្រឿងញៀននៃក្រសួងមហាផ្ទៃ ឱ្យដឹងថា ក្នុងឆ្នាំ២០២០ សមត្ថកិច្ចជំនាញបង្ក្រាបបទល្មើសគ្រឿងញៀនជាង១ម៉ឺនករណី ក្នុងនោះបានចាប់ខ្លួនមនុស្សជាង២ម៉ឺននាក់ ដែលចំនួននេះបានកើនឡើង១៩% បើប្រៀបធៀបនឹងរយៈពេលដូចគ្នាកាលពីឆ្នាំ២០១៩៕
