មន្រ្តីអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) បានចុះបង្ក្រាបអាល់កុលក្លែងក្លាយ ឬមេតាណុល ជាង៧ ០០០លីត្រ ស្ថិតនៅសង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ កាលពីថ្ងៃទី២៤ ខែមិថុនា ឆ្នាំ២០២១។
ទំព័រហ្វេសប៊ុករបស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ នៃក្រសួងពាណិជ្ជកម្ម បានលើកឡើងថា ក្នុងអំឡុងពេលចុះបង្ក្រាបនោះ មន្រ្តីជំនាញបានដកយកគំរូផលិតផលអាល់កុលក្លែងក្លាយឬមេតាណុល ទៅធ្វើការវិភាគភ្លាមៗ ដោយរថយន្តពិសោធន៍ចល័តរបស់អគ្គនាយកដ្ឋាន។ ក្រោយការវិភាគ បានរកឃើញផលិតផលចំនួន១២១កាន និង៨០០ដប ស្មើនឹង៤ ០៣០លីត្រ គឺជាសារធាតុមេតាណុល និងផលិតផលចំនួន១០៤កាន ស្មើនឹង៣ ១២០លីត្រ មានល្បាយសារធាតុមេតាណុល។
អគ្គនាយកដ្ឋាននេះបន្តថា វត្ថុតាងដែលបានរឹបអូសក្នុងការបង្ក្រាបនេះ ត្រូវបានរក្សាទុកដោយហ៊ុមព័ទ្ធ ឃ្លុំបេ និងបិទសៀល ជាបណ្តោះអាសន្ននៅនឹងកន្លែង ដើម្បីរង់ចាំអនុវត្តនីតិវិធីបន្ត។
វីអូឌី មិនអាចសុំការបញ្ជាក់បន្ថែមពីលោក ផាន អូន ប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកដ្ឋាន ក.ប.ប បានទេ នៅថ្ងៃសុក្រនេះ។
អ្នកនាំពាក្យក្រសួងពាណិជ្ជកម្ម លោក ស៊ាង ថៃ បានឱ្យដឹងតាមរយៈប្រព័ន្ធតេឡេក្រាមថា ចាប់តាំងពីកម្ពុជាទទួលរងនូវវិបត្តិជំងឺកូវីដ-១៩ នៅដើមឆ្នាំ២០២០ រហូតដល់បច្ចុប្បន្ននេះ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ នៃក្រសួងពាណិជ្ជកម្ម បានចុះឃ្លាំមើលនិងពិនិត្យទំនិញយុទ្ធសាស្ត្រ ក៏ដូចជាទំនិញបម្រើវិស័យសុខាភិបាល រួមមាន អាល់កុល ជែលលាងដៃ ម៉ាស និងឧបករណ៍ឬសម្ភារផ្សេងទៀត។
លោកបន្តថា ក្នុងរយៈពេល៥ខែ ឆ្នាំ២០២១នេះ អគ្គនាយកដ្ឋានមួយនេះបានរឹបអូសនិងបំផ្លាញចោលនូវមេតាណុលដែលបន្លំថាជាអាល់កុលបានចំនួន១០៦តោន បង្គារចាក់ចាហួយចូលចំនួន២០តោន និងរឹបអូសនូវសម្ភារក្លែងក្លាយឬគ្មានគុណភាពតាមស្តង់ដារបានជាង៣០០តោនផងដែរ។
លោក ស៊ាង ថៃ អះអាងថា អាជ្ញាធរនៅតែបន្តពិនិត្យទំនិញសេវា និងបានកំណត់ច្បាស់លាស់ក្នុងការបង្ក្រាបនូវរាល់ការធ្វើចរាចរណ៍ ការស្តុកទុក និងការលក់ដូរនូវទំនិញក្លែងក្លាយឬគ្មានគុណភាពបន្ថែមទៀត។
ទោះជាបែបនេះក្តី កាលពីថ្ងៃទី១២ ខែមីនា ឆ្នាំ២០១៩ ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក ស ខេង បានរិះគន់ការបង្ក្រាបផលិតផលក្លែងក្លាយកន្លងមក ដោយថា ពួកគេបង្ក្រាបបានតែទំនិញ ប៉ុន្តែមិនឃើញមានការចាប់ខ្លួនអ្នកទទួលខុសត្រូវយកមកផ្ដន្ទាទោសឡើយ។ លោកបន្តថា ការចាប់ទំនិញក្លែងក្លាយបានហើយយកទៅកម្ទេចចោល ដោយមិនមានចាត់វិធានការលើជនដែលប្រព្រឹត្តល្មើស គឺមិនអាចបញ្ឈប់ការចរាចរទំនិញក្លែងក្លាយនិងខូចគុណភាពទាំងនោះនៅលើទីផ្សារបានទេ៕
