សមត្ថកិច្ចខេត្តព្រះសីហនុ បានឃាត់ខ្លួនមនុស្ស៦នាក់យកទៅសួរនាំពាក់ព័ន្ធការធ្វើសកម្មភាពទិញលក់បណ្ណចាក់វ៉ាក់សាំងនិងទម្រង់ពាក្យស្នើសុំចុះឈ្មោះចាក់វ៉ាក់សាំងបង្ការជំងឺកូវីដ-១៩។
អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ ប្រាប់ វីអូឌី ថាគណៈបញ្ជាការឯកភាពខេត្តសហការជាមួយនគរបាលក្រុងព្រះសីហនុ នៅថ្ងៃទី២៥ ខែមិថុនា ឆ្នាំ២០២១ បានឃាត់ខ្លួនមនុស្សចំនួន៦នាក់យកទៅអធិការដ្ឋាននគរបាលក្រុងព្រះសីហនុ ដើម្បីសាកសួរនិងចាត់វិធានការតាមនីតិវិធី ពាក់ព័ន្ធការធ្វើសកម្មភាពទិញលក់បណ្ណចាក់វ៉ាក់សាំងនិងទម្រង់ពាក្យស្នើសុំចុះឈ្មោះចាក់វ៉ាក់សាំងបង្ការជំងឺកូវីដ-១៩។
លោក ឃាង ភារម្យ មិនទាន់អាចផ្តល់ព័ត៌មានលម្អិតអំពីបញ្ហានេះបាននៅឡើយទេ ដោយថា រហូតមកដល់ម៉ោង៤កន្លះល្ងាចនេះ សមត្ថកិច្ចកំពុងសាកសួរមនុស្សទាំង៦នាក់នោះនៅឡើយ។
លោកបន្ថែមថា៖ «ឥលូវនេះ វាស្ថិតនៅក្នុងនីតិវិធីនៃការសួរនាំនៅឡើយ អ៊ីចឹងយើងអត់ទាន់អាចនិយាយអីឱ្យលម្អិតនៅក្នុងរឿងហ្នឹងឱ្យបានលម្អិតបានទេ»។
បើតាមលោក ឃាង ភារម្យ ខេត្តព្រះសីហនុបានបើកយុទ្ធនាចាក់វ៉ាក់សាំងបង្ការជំងឺកូវីដ-១៩នៅទូទាំងប្រទេស កាលពីថ្ងៃទី២២ ខែមិថុនា ឆ្នាំ២០២១ ដែលមានអ្នកត្រូវចាក់វ៉ាក់សាំងប្រមាណ២០ម៉ឺននាក់។ លោកថា យុទ្ធនាការចាក់វ៉ាក់សាំងនេះពុំមានការគិតថ្លៃឡើយ។
កាលពីពេលថ្មីៗនេះ ក៏មានករណីពលរដ្ឋចំនួន៣៩នាក់ដែលទៅតេស្តរកជំងឺកូវីដ-១៩ នៅមន្ទីរពេទ្យបង្អែកស្រុកអង្គស្នួល ខេត្តកណ្តាល ត្រូវបានគ្រូពេទ្យនៅទីនោះទារប្រាក់ក្នុងម្នាក់៦០ ០០០រៀលផងដែរ ប៉ុន្តែក្រោយមានការផ្សព្វផ្សាយតាមបណ្តាញសង្គមនិងមានការអន្តរាគមន៍ពីអាជ្ញាធរ ពលរដ្ឋទាំងនោះក៏ទទួលបានថវិកានោះមកវិញ។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្ដិភាព លោក យង់ គិមអេង ចាត់ទុកករណីយកលុយពីពលរដ្ឋពេលតេស្តនិងចាក់វ៉ាក់សាំងបង្ការជំងឺកូវីដ-១៩ ថាជាការប្រព្រឹត្តអំពើពុករលួយនិងជាគំរូអាក្រក់មួយផងដែរ។ លោកស្នើទៅអាជ្ញាធរឱ្យចាត់វិធានការច្បាប់ឱ្យខានតែបាន និងត្រូវផ្តន្ទាទោសឱ្យធ្ងន់ធ្ងរផងដែរ ដើម្បីព្រមានដល់អ្នកផ្សេងទៀតកុំឱ្យអនុវត្តតាម។
លោកបន្ថែមថា៖ «ករណីមានអ្នកលក់បណ្ណចាក់វ៉ាក់សាំង មានអ្នកយកលុយធ្វើតេស្តដែលប្រព្រឹត្តអំពើពុករលួយហ្នឹង ត្រូវតែដាក់ទោសទណ្ឌឱ្យធ្ងន់ធ្ងរ ដើម្បីកុំឱ្យករណីហ្នឹងកើតឡើងតទៅទៀតដែលជាគំរូអាក្រក់។ បញ្ហាជំងឺកូវីដកំពុងបន្តរីករាលដាល ហើយមានអ្នកឆ្លៀតរកផលប្រយោជន៍ ឆ្លៀតពុករលួយពីបញ្ហាហ្នឹង គឺវានឹងជះឥទ្ធិពលអាក្រក់កាន់តែខ្លាំង ហើយវាបង្កហានិភ័យកាន់តែខ្ពស់នៅក្នុងសង្គម ហើយការចាក់វ៉ាក់សាំងនឹងមិនអាចសម្រេចបានតាមគោលដៅទេ»។
កាលពីថ្ងៃទី១៥ ខែមិថុនា ឆ្នាំ២០២១ ក្រុមមន្ត្រីសង្គមស៊ីវិលជំរុញទៅរដ្ឋាភិបាលឱ្យស្រាវជ្រាវរកមេខ្យល់និងអ្នកដែលគប់គិតគ្នាជាមួយអាជ្ញាធរទារលុយពីពលរដ្ឋ ជាថ្នូរបានចាក់វ៉ាក់សាំងការពារជំងឺកូវីដ-១៩ ខណៈការចាក់វ៉ាក់សាំងនេះគឺរដ្ឋាភិបាលពុំអនុញ្ញាតឱ្យយកលុយពីពលរដ្ឋនោះឡើយ។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន ធ្លាប់អំពាវនាវទៅប្រជាពលរដ្ឋដែលរងគ្រោះដោយសារការទារលុយពីមេខ្យល់ឬពីមន្ត្រីមូលដ្ឋាន ត្រូវរាយការណ៍មកក្រសួងសុខាភិបាលនិងអាជ្ញាធរពាក់ព័ន្ធ ដើម្បីចាត់វិធានការបន្ទាន់លើជនខិលខូចទាំងនោះ៕
