ប្រធានក្រុមអ្នកនាំពាក្យរដ្ឋាភិបាល អះអាងថា រដ្ឋាភិបាលមិនចាប់អារម្មណ៍ទៅនឹងសម្ដីរបស់លោក សម រង្ស៊ី ដែលបានថ្លែងប្រមាថអង្គព្រះមហាក្សត្រនោះឡើយ ខណៈប្រធានអតីតបក្សប្រឆាំងរូបនេះជាទណ្ឌិតរួចទៅហើយ។
លោក ផៃ ស៊ីផាន ប្រធានក្រុមអ្នកនាំពាក្យរបស់រដ្ឋាភិបាល មានប្រសាសន៍នៅថ្ងៃសុក្រនេះថា មកដល់ពេលនេះ សារនយោបាយរបស់លោក សម រង្ស៊ី លែងមានតម្លៃអ្វីទៀតហើយ សម្រាប់រដ្ឋាភិបាលយកទៅពិចារណាក្នុងការដាក់បន្ទុកបន្ថែម។ លោកបន្តថា ការសម្រេចប្តឹងឬមិនប្តឹងនោះជាដែនសមត្ថកិច្ចរបស់តុលាការឬនគរបាលយុត្តិធម៌ជាអ្នកដើរតួក្នុងរឿងនេះ ខណៈរដ្ឋាភិបាលបានចាត់ទុកបុគ្គលរូបនោះជាទណ្ឌិតរួចទៅហើយ។
លោកបន្តថា៖ «យើងអត់ពិចារណាអីទេចំពោះ សម រង្ស៊ី! គេជាជនជាប់ទោសរួចទៅហើយ យើងអត់ចាប់អារម្មណ៍អីរឿងហ្នឹងផង។ រឿងប្តឹងផ្តល់ ទៅសួរខាងនគរបាលនិងក្រសួងយុត្តិធម៌ទៅ»។
កាលពីថ្ងៃទី២២ ខែមិថុនា ឆ្នាំ២០២១ លោក សម រង្ស៊ី បានលើកឡើងនៅលើបណ្តាញសង្គមហ្វេសប៊ុករបស់លោកថា ព្រះមហាក្សត្រសព្វថ្ងៃ ព្រះអង្គមិនដែលការពារប្រយោជន៍សម្រាប់ប្រជាពលរដ្ឋរបស់ទ្រង់ទេ ផ្ទុយទៅវិញ បានបើកផ្លូវឱ្យលោកនាយករដ្ឋមន្រ្តី ហ៊ុន សែន ចាប់និងចោទប្រកាន់យុវជនការពារបរិស្ថានជាដើម។ លោក សម រង្ស៊ី បន្តថា កម្ពុជាត្រូវចំណាយថវិការដ្ឋជាច្រើនសម្រាប់ស្ថាប័នព្រះមហាក្សត្រ ប៉ុន្តែប្រជាពលរដ្ឋមិនអាចទីពឹងលើព្រះអង្គបានពេលជួបវិបត្តិ។
ពាក់ព័ន្ធនឹងករណីនេះ អ្នកនាំពាក្យក្រសួងយុត្តិធម៌ លោក ជិន ម៉ាលីន បញ្ជាក់ថា តំណាងអយ្យការអមសាលាដំបូងរាជធានីភ្នំពេញ នឹងពិនិត្យលទ្ធភាពក្នុងការប្តឹងបន្ថែមទៀត ប្រឆាំងប្រធានស្តីទីអតីតគណបក្សសង្រ្គោះជាតិ រឿងប្រមាថព្រះមហាក្សត្រនេះ។
វីអូឌី មិនអាចស្នើសុំការបំភ្លឺបន្ថែមពីលោក ជិន ម៉ាលីន អ្នកនាំពាក្យសាលាដំបូងរាជធានីភ្នំពេញ និងលោក ប្លង់ សុផល មន្ត្រីព្រះបរមរាជវាំង បានទេ នៅថ្ងៃសុក្រនេះ។
បើទោះជាបែបណា នេះមិនមែនជារឿងថ្មីឡើយសម្រាប់លោក សម រង្ស៊ី។ អតីតមេបក្សជំទាស់រូបនេះធ្លាប់ត្រូវបានតុលាការសម្រេចផ្តន្ទាទោសសរុបជិត៥០ឆ្នាំ ក្នុងរយៈពេល២០ឆ្នាំកន្លងទៅនេះ ពាក់ព័ន្ធនឹងបទចោទជុំវិញការប្រមាថនិងតិះដៀលអង្គព្រះមហាក្សត្រជាហូរហែ និងបទល្មើសដទៃទៀត។
សាស្រ្តាចារ្យផ្នែកវិទ្យាសាស្រ្តនយោបាយ លោក ឯម សុវណ្ណរ៉ា កត់សម្គាល់ឃើញថា ការរិះគន់អង្គព្រះមហាក្សត្រពីសំណាក់មេដឹកនាំអតីតបក្សប្រឆាំងរូបនេះ ពិតជាបានធ្វើឱ្យប៉ះពាល់ដល់ប្រជាប្រិយភាពរបស់គណបក្សមួយនេះ។ យ៉ាងណា លោក ឯម សុវណ្ណរ៉ា អះអាងថា ចំពោះប្រជាប្រិយភាពរបស់អង្គព្រះមហាក្សត្រក៏មានការថយចុះដែរ ព្រោះតែទ្រង់មិនមានព្រះរាជសិទ្ធិដូចព្រះមហាក្សត្រមុនៗ ដោយសារតែរដ្ឋធម្មនុញ្ញបានកំណត់ការគ្រងរាជ្យ តែមិនកាន់អំណាច។
លោកបន្តថា៖ «ឧត្តមភាពនិងប្រជាប្រិយភាពរបស់ព្រះមហាក្សត្រក៏ស្រុតចុះខ្លាំងដែរ នៅក្នុងបរិបទរយៈពេលប៉ុន្មានឆ្នាំចុងក្រោយនេះ ដោយសារតួនាទីនិងព្រះរាជសកម្មភាព។ ហើយមួយទៀត ប្រជាពលរដ្ឋលែងដូចពីអតីតកាល ដែលជឿជាក់ឬក៏ផ្តល់ការគាំទ្រដើរតាមព្រះមហាក្សត្រទាំងស្រុង»។
ទាក់ទិនរឿងនេះ កាលពីខែមករា ឆ្នាំ២០២១ លោក សម រង្ស៊ី បានបង្ហោះវីដេអូនៅលើបណ្តាញសង្គមហ្វេសស៊ុករបស់លោក ដោយទាមទារឱ្យកែប្រែរដ្ឋធម្មនុញ្ញត្រង់ចំណុចស្តីពីព្រះរាជតួនាទីព្រះមហាក្សត្រ។ ការស្នើសុំនេះ ដោយលោក សម រង្ស៉ី យល់ឃើញថា ព្រះមហាក្សត្របច្ចុប្បន្នទ្រង់មិនបានបំពេញតាមព្រះរាជតួនាទីរបស់ព្រះអង្គដូចមានចែងក្នុងរដ្ឋធម្មនុញ្ញដែលជាច្បាប់កំពូលរបស់ជាតិ៕