កម្ពុជាជ្រើសរើសយកទីក្រុងបាត់ដំបងចូលជាបេក្ខភាពសមាជិកបណ្តាញទីក្រុងដែលមានភាពច្នៃប្រតិដ្ឋរបស់អង្គការយូណេស្កូក្នុង «ប្រភេទទីក្រុងដែលមានភាពច្នៃប្រតិដ្ឋលើផ្នែកម្ហូបអាហារ» ដើម្បីចែករំលែកនិងផ្សព្វផ្សាយលើឆាកអន្តរជាតិ។
ភ្នាក់ងារសារព័ត៌មានកម្ពុជា AKP បានស្រង់សម្តីរបស់រដ្ឋមន្ត្រីក្រសួងទេសចរណ៍ លោក ថោង ខុន កាលពីថ្ងៃទី២៦ ខែមិថុនា ឆ្នាំ២០២១ ឱ្យដឹងថា ដើមចមដែលនាំឱ្យកម្ពុជាសម្រេចជ្រើសរើសយកទីក្រុងបាត់ដំបង់ចូលជាសមាជិកបណ្តាញទីក្រុងនេះ លើផ្នែក «ទីក្រុងដែលមានភាពច្នៃប្រតិដ្ឋលើផ្នែកម្ហូបអាហារ» ដោយសារខេត្តបាត់ដំបងសម្បូរទៅដោយម្ហូបអាហារជាច្រើនប្រភេទនិងច្រើនទម្រង់ដែលត្រូវបានរៀបចំនិងកែច្នៃ ដើម្បីចែករំលែកនិងផ្សព្វផ្សាយលើឆាកអន្តរជាតិ។
រដ្ឋមន្ត្រីរូបនោះបញ្ជាក់ថា ការចូលជាសមាជិកបណ្តាញនេះ នឹងអនុញ្ញាតឱ្យកម្ពុជាមានសិទ្ធិប្រើប្រាស់និមិត្តសញ្ញា (Logo) របស់បណ្តាញ សម្រាប់ផ្សព្វផ្សាយសក្តានុពលនិងភាពពិសេសៗរបស់ទីក្រុងខ្លួនទៅកាន់ទីក្រុងនានាជាសមាជិកបណ្តាញ និងក្នុងក្របខណ្ឌរបស់អង្គការយូណេស្កូ ក្នុងការលើកស្ទួយនូវវប្បធម៌ សក្តានុពលទេសចរណ៍ទីក្រុង និងមុខមាត់របស់ទីក្រុងជ័យលាភី ក៏ដូចជាប្រទេសជាតិទាំងមូល ពិសេសការតម្រង់ឆ្ពោះទៅរកការផ្សព្វផ្សាយទេសចរណ៍ម្ហូបអាហារ (Gastronomy Tourism) ដែលជានិន្នាការថ្មីរបស់ពិភពលោក។
គួររំឭកថា បណ្តាញទីក្រុងដែលមានភាពច្នៃប្រតិដ្ឋរបស់អង្គការយូណេស្កូ ត្រូវបានបង្កើតឡើងកាលពីឆ្នាំ២០០៤ ក្នុងគោលបំណងលើកកម្ពស់កិច្ចសហប្រតិបត្តិការក្នុងចំណោមទីក្រុងមានភាពច្នៃប្រតិដ្ឋលើសមាសភាពសំខាន់ៗមួយចំនួន ដែលជាកត្តាគន្លឹះសម្រាប់ការអភិវឌ្ឍទីក្រុងប្រកបដោយចីរភាព។
បច្ចុប្បន្ន បណ្តាញនេះមានទីក្រុងចំនួន២៤៦នៅជុំវិញពិភពលោក ដែលចែកចេញជា៧ប្រភេទ រួមមាន ទី១ ទីក្រុងដែលមានភាពច្នៃប្រតិដ្ឋលើផ្នែកសិប្បកម្ម និងសិល្បៈប្រជាប្រិយ ទី២ ទីក្រុងដែលមានភាពច្នៃប្រតិដ្ឋលើផ្នែកសិល្បៈនៃការផ្សព្វផ្សាយ ទី៣ ទីក្រុងដែលមានភាពច្នៃប្រតិដ្ឋលើផ្នែកខ្សែភាពយន្ត ទី៤ ទីក្រុងដែលមានភាពច្នៃប្រតិដ្ឋលើផ្នែករចនាបទនិងការតុបតែង ហើយទី៥ ទីក្រុងដែលមានភាពច្នៃប្រតិដ្ឋលើផ្នែកម្ហូបអាហារ ទី៦ ទីក្រុងដែលមានភាពច្នៃប្រតិដ្ឋលើផ្នែកអក្សរសាស្ត្រ និងទី៧ ជាទីក្រុងដែលមានភាពច្នៃប្រតិដ្ឋលើផ្នែកតន្ត្រី។
ចំណែកនៅតំបន់អាស៊ាន មានទីក្រុងចំនួន៦ ក្នុងប្រទេសចំនួន៤ដែលជាសមាជិកក្នុងបណ្តាញទីក្រុងរបស់អង្គការយូណេស្កូនេះ រួមមាន ប្រទេសថៃ មានទីក្រុងភូកេត និងទីក្រុងឈាងម៉ៃ, ប្រទេសឥណ្ឌូណេស៊ី មានទីក្រុងបានឌុង និងទីក្រុងផេកាឡុងហ្កាន, ប្រទេសសិង្ហបុរី មានទីក្រុងសិង្ហបុរី និងប្រទេសហ្វីលីពីន មានទីក្រុងបាកជីអូ៕