អតីតប្រធានគណបក្សសង្គ្រោះជាតិ លោក កឹម សុខា បានបន្តបញ្ជាក់ជាថ្មីទៀតពីភាពស្អាតស្អំចំពោះប្រទេសជាតិនិងប្រជាពលរដ្ឋ ខណៈលោកកំពុងរងបណ្តឹងចោទប្រកាន់ពីបទ «ក្បត់ជាតិ» ដែលប្តឹងដោយរដ្ឋាភិបាល។
តាមសារនៅលើហ្វេសប៊ុកកាលពីថ្ងៃអាទិត្យ លោក កឹម សុខា បានថ្លែងអំណរគុណដល់អ្នកគាំទ្រទាំងអស់់ដែលបានជូនពរខួបកំណើតរបស់លោកគម្រប់៦៨ឈានចូល៦៩ឆ្នាំ នៅថ្ងៃទី២៧ ខែមិថុនា ឆ្នាំ២០២១។
លោកគូសបញ្ជាក់ក្នុងសារនោះទៀតថា ទឹកចិត្តនេះជាការផ្តល់យុត្តិធម៌សម្រាប់រូបលោក ទោះបីស្ថិតនៅក្នុងកាលៈទេសៈដ៏លំបាកយ៉ាងណាក៏ដោយ។
បន្ថែមពីនេះ លោកថា៖ «ជាថ្មីម្តងទៀត អ្វីដែលខ្ញុំធ្លាប់សន្យានិងខ្ញុំនៅតែហ៊ានសន្យាជាមួយជនរួមជាតិខ្មែរនោះ គឺខ្ញុំ កឹម សុខា មិនក្បត់ជាតិ មិនក្បត់ឆន្ទៈរបស់ប្រជាពលរដ្ឋ និងមិនបោះបង់ចោលមាតុភូមិកម្ពុជាជាទីស្រឡាញ់របស់យើងខ្ញុំជាដាច់ខាត»។
លោក កឹម សុខា ត្រូវបានដកសិទ្ធិធ្វើនយោបាយជាង៣ឆ្នាំមកហើយ គិតចាប់ពីថ្ងៃដែលសមត្ថកិច្ចឆ្មក់ចូលចាប់ខ្លួនកាលពីថ្ងៃទី៣ ខែកញ្ញា ឆ្នាំ២០១៧។
បច្ចុប្បន្ន អតីតមេដឹកនាំបក្សប្រឆាំងរូបនេះកំពុងស្ថិតក្រោមការត្រួតពិនិត្យរបស់តុលាការ ដែលបម្រាមនេះមិនអនុញ្ញាតឱ្យធ្វើសកម្មភាពនយោបាយ និងមិនឱ្យចេញទៅក្រៅប្រទេស តែអាចធ្វើដំណើរក្នុងប្រទេសបាន។
អតីតគណបក្សសង្គ្រោះជាតិ ដែលជាដៃគូប្រកួតដ៏មានឥទ្ធិពលជាមួយគណបក្សប្រជាជនកម្ពុជានេះ ត្រូវបានតុលាការកំពូល ប្រកាសរំលាយកាលពីថ្ងៃទី១៦ ខែវិច្ឆិកា ឆ្នាំ២០១៧ ខណៈគណបក្សនេះទទួលបានសន្លឹកឆ្នោត ៣ ០៥៦ ៨២៤សំឡេង ទល់នឹង៣ ៥៤០ ០៥៦សំឡេង ហើយក្រុមប្រឹក្សាឃុំ-សង្កាត់ចំនួន៥ ០០៧អាសនៈ ទល់នឹង៦ ៥០៣អាសនៈ គិតជាភាគរយ ៤៣,២៧% ទល់នឹង ៥៦,២០%៕