ក្រសួងសុខាភិបាលកម្ពុជា រកឃើញមានការកើនឡើងនូវការឆ្លងវីរុសកូវីដ-១៩ប្រភេទបំប្លែងថ្មីទៅលើពលករខ្មែរត្រឡប់មកពីប្រទេសថៃ ស្របពេលអាជ្ញាធរថៃបិទខ្ទប់មណ្ឌលស្នាក់នៅពលករសំណង់ទូទាំងក្រុងបាងកក និងខេត្តជុំវិញ រយៈពេលមួយខែ។
ក្នុងសេចក្តីជូនដំណឹងមួយចុះថ្ងៃទី២៨ ខែមិថុនា ឆ្នាំ២០២១ រដ្ឋមន្រ្តីក្រសួងសុខាភិបាល លោក ម៉ម ប៊ុនហេង ថ្លែងថា ក្រសួងបានរកឃើញករណីផ្ទុះជំងឺកូវីដ-១៩ ឈ្មោះ «ដែលតា (Delta)» ជាច្រើនករណី លើពលករចំណាកស្រុកត្រឡប់មកពីប្រទេសថៃ។ លោកបន្តថា វីរុសបំប្លែងខ្លួនថ្មីនេះមានភាពសាហាវជាងវីរុសបំប្លែងខ្លួនមុនៗចំនួន១៥ដង។
លោក ម៉ម ប៊ុនហេង បានលើកឡើងបន្តនៅក្នុងសេចក្តីជូនដំណឹងនោះថា៖ «ទន្ទឹមនឹងនោះ យើងមិនដឹងថា វីរុសកូវីដ-១៩នេះមានអត្តចរិតបែបណានិងនៅកន្លែងណាដែររហូតដល់បច្ចុប្បន្ននេះ ហើយក៏មិនអាចដឹងដែរថាតើបុគ្គលដែលបានឆ្លងវីរុសនេះបានប៉ះពាល់អ្វីខ្លះដែលមានវត្តមានវីរុសនេះ ហើយបុគ្គលដែលកើតជំងឺកូវីដ-១៩នេះក៏ប្រហែលមិនដឹងខ្លួនថាឆ្លងផង»។
ករណីនេះ ក្រសួងបានអំពាវនាវដល់សាធារណជនទាំងអស់ត្រូវអនុវត្តវិធានការ «៣កុំ ៣ការពារ» ដើម្បីរួមចំណែកកាត់ផ្តាច់ខ្សែចម្លងជំងឺកូវីដ-១៩ និងការចម្លងវីរុសពីមនុស្សម្នាក់ទៅមនុស្សម្នាក់ ជាពិសេសត្រូវចូលរួមការពារការចម្លងវីរុសបំប្លែងថ្មីនៅកម្ពុជា។
មន្រ្តីគម្រោងនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) ប្រចាំប្រទេសថៃ លោក លឹង សុផុន ឱ្យដឹងថា អាជ្ញាធរថៃបានចាប់អនុវត្តវិធានបិទខ្ទប់កន្លែងស្នាក់នៅរបស់កម្មករសំណង់បរទេសដែលភាគច្រើនជាពលករខ្មែរ ទូទាំងក្រុងបាងកក ដែលមានប្រមាណ៤០០ទីតាំង និងនៅខេត្តជាប់ទីក្រុងមួយនេះចំនួន៤ទៀត រយៈពេល១ខែ រាប់ចាប់ពីថ្ងៃចន្ទនេះ បន្ទាប់ពីប្រកាសឱ្យដឹងជាមុន នៅថ្ងៃទី២៥ ខែមិថុនា។ លោកបន្ថែមថា រដ្ឋាភិបាលថៃក៏គ្រោងនឹងបិទខ្ទប់ខេត្តចំនួន១០ផងដែរ។
ប្រភពដដែលបន្តថា សេចក្តីសម្រេចនេះធ្វើឡើងបន្ទាប់ពីតួលេខករណីឆ្លងថ្មីក្នុងសហគមន៍កើនឡើងដល់ជាង៥ ០០០ករណីក្នុងមួយថ្ងៃ ដោយភាគច្រើនរកឃើញក្នុងសហគមន៍ពលករសំណង់ក្នុងរដ្ឋធានីដែលមានពលរដ្ឋរស់នៅជិត១០លាននាក់។
មន្រ្តីសង្គមស៊ីវិលរូបនេះថ្លែងថា ពលករខ្មែរមួយចំនួនបានសម្រេចត្រឡប់មកស្រុកកំណើតវិញ ដោយសារបារម្ភពីការបាត់បង់ការងារធ្វើនិងឆ្លងជំងឺ។
លោក សុផុន មានប្រសាសន៍ថា៖ «នៅពេលដែលពួកគាត់ត្រូវប្រឈមនឹងបញ្ហា ពួកគាត់ត្រូវការស្បៀងអាហារ ត្រូវការអីអ៊ីចឹង ថៅកែគាត់អត់បានទទួលខុសត្រូវរឿងហ្នឹង ហើយថៅកែទុកចោល ភាគច្រើននៅតាមតំបន់ពលករសំណង់នៅក្នុងទីក្រុងថេប។ ហើយ[ពលករ]ដឹងថា រដ្ឋាភិបាលថៃប្រកាសបិទអ៊ីចឹងទៀត ធ្វើឱ្យពួកគាត់ភ្ញាក់ផ្អើល ហើយព្រួយបារម្ភរឹងរឹតតែខ្លាំងតែម្តង ហើយមិនថាកន្លែងខ្ញុំ ឬកន្លែងខេត្តផ្សេងៗនោះទេ»។
បើតាមប្រភពដដែល អាជ្ញាធរថៃបានប្រកាសផ្តល់ប្រាក់ឧបត្ថម្ភចំនួន៥០ភាគរយនៃប្រាក់ខែគោលសរុប សម្រាប់ពលករណាដែលមានបណ្ណរបបសន្តិសុខ ប៉ុន្តែលោកថា ពលករខ្មែរមួយចំនួនមិនមានបណ្ណនេះនោះទេ ដោយសារលិខិតឆ្លងដែនពួកគេហួសសុពលភាព។
ពលករចំណាកស្រុកម្នាក់នៅជាយទីក្រុងបាងកក លោក ផា ម៉ារ៉ាឌី ឱ្យដឹងថា លោកកំពុងជាប់នៅកន្លែងស្នាក់នៅរយៈពេល១ខែ ដោយទទួលបានការផ្គត់ផ្គង់របបអាហារមួយថ្ងៃ៣ពេល។ លោកថា ក្រុមហ៊ុនសាងសង់សន្យាផ្តល់ប្រាក់ឧបត្ថម្ភដល់ពលករ៥០ភាគរយសម្រាប់រយៈពេលនេះ ប៉ុន្តែលោកមិនទាន់ជឿជាក់ថានឹងទទួលបានពិតមែននោះទេ។
លោកបន្ថែមថា នៅការដ្ឋានរបស់លោកមានករណីឆ្លងតិចតួច ប៉ុន្តែលោកមិនដឹងតួលេខពិតប្រាកដនោះទេ។ លោកបន្តថា រូបលោកនិងពលករខ្មែរដទៃទៀតមានប្រមាណជិត១០០នាក់សម្រេចបន្តរង់ចាំទទួលការងារធ្វើឡើងវិញ ខណៈមួយចំនួនបានត្រឡប់ទៅស្រុកកំណើតមុនមានការបិទខ្ទប់។
លោក ផា ម៉ារ៉ាឌី និយាយថា៖ «ពិបាកត្រង់ថា យើងទៅ ក៏វាត្រូវចំណាយពេលច្រើន! ហើយបើយើងនៅនេះទៅ ក៏ចាំមើលស្ថានការគេល្អ មើលទៅវាឆាប់បានការងារធ្វើវិញ ក៏វាល្អ! ហើយបើដល់ស្រុកខ្មែរ ក៏យើងមិនប្រាកដថាយើងត្រូវចំណាយពេលប៉ុន្មានខែប៉ុន្មានថ្ងៃ ដើម្បីបានការងារធ្វើ។ នៅមួយកន្លែងទៅ ព្រោះកន្លែងណាក៏ដូចកន្លែងណាដែរហ្នឹង នៅខ្មែរយើងក៏ឆ្លងច្រើនដែរហ្នឹង»។
ទាក់ទងនឹងបញ្ហាបិទខ្ទប់នៅកន្លែងស្នាក់នៅរបស់ពលករសំណង់ខ្មែរក្នុងប្រទេសថៃនេះ អ្នកនាំក្រសួងការបរទេសកម្ពុជា លោក កុយ គួង ប្រាប់ វីអូឌី តាមសារ Telegram យ៉ាងខ្លីថា ក្រសួងនិងស្ថានកុងស៊ុលខ្មែរប្រចាំនៅប្រទេសថៃ កំពុងត្រៀមខ្លួនជួយដោះស្រាយបញ្ហាលំបាករបស់ពលករខ្មែរជានិច្ច។
វីអូឌី មិនអាចទាក់ទងសុំការបញ្ជាក់បន្ថែមពីចំនួនតួលេខករណីរកឃើញវីរុសបំប្លែងខ្លួនថ្មី “ដែលតា” ពីអ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានទេ នៅថ្ងៃនេះ។
យ៉ាងណា ក្រសួងបានប្រកាសកាលពីថ្ងៃទី១៨ ខែមិថុនា ពីការរកឃើញករណីវីរុសបំប្លែងខ្លួនថ្មីនេះលើពលករចំណាកស្រុកត្រឡប់ពីប្រទេសថៃចំនួន៧នាក់ បន្ទាប់ពីរកឃើញវីរុសប្រភេទថ្មីដែលរកឃើញលើកដំបូងនៅប្រទេសឥណ្ឌាចំនួន៣ករណីដំបូងកាលពីដើមខែ។
តាមរបាយការណ៍ពីក្រសួងសុខាភិបាល នៅថ្ងៃទី២៨ ខែមិថុនា ឆ្នាំ២០២១ ក្នុងរយៈពេល២៤ម៉ោងចុងក្រោយ កម្ពុជារកឃើញករណីនាំចូលជំងឺកូវីដ-១៩ កើនដល់កំណត់ត្រាថ្មី១៣៥ករណី ក្នុងចំណោមតួលេខឆ្លងថ្មីសរុប៨៨៣នាក់ ដែលធ្វើឱ្យករណីនាំចូលសរុបកើនដល់២ ៣១១ករណី ក្នុងចំណោមតួលេខឆ្លងសរុបចំនួន៤៨ ៥៣២ករណី៕
