សមត្ថកិច្ចរាជធានីភ្នំពេញ បានសន្និដ្ឋានជាដំបូងថា អគ្គិភ័យដែលបណ្តាលឱ្យមនុស្សយ៉ាងហោចណាស់៤នាក់ស្លាប់បាត់បង់ជីវិត និងរបួសស្រាលម្នាក់ គឺបង្កឡើងដោយសារឆ្លងចរន្តអគ្គិសនី ប៉ុន្តែសមត្ថកិច្ចនឹងស្រាវជ្រាវបន្ថែមទៀតលើករណីនេះ។
អធិការខណ្ឌដូនពេញ លោក ទៀង ច័ន្ទសារ ប្រាប់ វីអូឌី នៅថ្ងៃអង្គារនេះថា បើតាមព័ត៌មានបឋម កាលពីម៉ោង៤ទៀបភ្លឺ ថ្ងៃទី២៩ ខែមិថុនា ឆ្នាំ២០២១នេះ អគ្គិភ័យមួយបានកើតឡើងទៅលើផ្ទះលក់សាច់ប៉ាត់តេមួយកន្លែងដែលមានទំហំ៨ម៉ែត្រគុណ២២ម៉ែត្រ ស្ថិតនៅសង្កាត់បឹងរាំង ខណ្ឌដូនពេញ រាជធានីភ្នំពេញ បានបណ្ដាលឱ្យមនុស្សស្លាប់៤នាក់ និងរបួសស្រាលម្នាក់ ព្រមទាំងបំផ្លាញទ្រព្យសម្បត្តិជាច្រើនថែមទៀត។
លោកមានប្រសាសន៍ថា៖ «ជាការសន្និដ្ឋានបឋម ចំពោះមុខ សមត្ថកិច្ចយើងពាក់ព័ន្ធទាំងអស់កំពុងសហការគ្នាធ្វើការស្រាវជ្រាវបន្ថែម យើងមើលទៅវាផ្តើមចេញពីការឆ្លងចរន្តអគ្គិសនី»។
អធិការរូបនេះបញ្ជាក់ថា មនុស្សដែលស្លាប់នោះ រួមមាន ទី១ ឈ្មោះ សម្បត្តិ បញ្ញា អាយុ១៨ឆ្នាំ, ទី២ ឈ្មោះ ផុន ដាវី អាយុ១៩ឆ្នាំ, ទី៣ ឈ្មោះ ផុន ដាវីត អាយុ១៨ឆ្នាំ និងទី៤ ឈ្មោះ លី អាយុ១៨ឆ្នាំ ដែលពួកគេសុទ្ធតែជាកម្មករបម្រើការងារក្នុងហាងលក់សាច់ប៉ាត់តេមួយនេះ។
លោក ទៀង ច័ន្ទសារ បន្ថែមថា អំឡុងពេលចុះប្រតិបត្តិការពន្លត់អគ្គិភ័យនោះ សមត្ថកិច្ចប្រើប្រាស់រថយន្ដការិយាល័យបង្ការនិងពន្លត់អគ្គិភ័យចំនួន៣៨គ្រឿង ប្រើប្រាស់ទឹកអស់៣៨ឡាន និងរថយន្តជំនួយមួយគ្រឿង ទើបពន្លត់បានទាំងស្រុងនៅព្រឹកថ្ងៃទី២៩ ខែមិថុនា ឆ្នាំ២០២១នេះ។
របាយការណ៍របស់នាយកដ្ឋានបង្ការ និងពន្លត់អគ្គិភ័យរបស់ក្រសួងមហាផ្ទៃ បានឱ្យដឹងថា កាលពីឆ្នាំ២០២០ មានអគ្គិភ័យកើតឡើងចំនួន៩៣៧ករណី បណ្តាលឱ្យមនុស្សចំនួន២៤នាក់ស្លាប់ និងរបួសចំនួន៣៦នាក់។ ចំនួននេះមានការកើនឡើងចំនួន២២០ករណី បើប្រៀបធៀបទៅនឹងឆ្នាំ២០១៩៕
