សាលាដំបូងខេត្តមណ្ឌលគិរី បានសម្រេចឃុំខ្លួនមន្ត្រីយោធានិងនគរបាលចំនួន៩នាក់ជាបណ្តោះអាសន្ននៅពន្ធនាគារខេត្ត ពាក់ព័ន្ធការសមគំនិតគ្នាជាមួយឈ្មួញ ដើម្បីនាំឈើខុសច្បាប់ចេញទៅប្រទេសវៀតណាម។
ក្នុងដីកាបង្គាប់ឱ្យឃុំខ្លួនចុះថ្ងៃទី២៦ ខែមិថុនា ឆ្នាំ២០២១ ដែល វីអូឌី ទើបទទួលបាននៅថ្ងៃអង្គារនេះ ឱ្យដឹងថា ចៅក្រមស៊ើបសួរនៃសាលាដំបូងខេត្តមណ្ឌលគិរី លោក ឈឺន មករា សម្រេចឱ្យឃុំខ្លួនបណ្តោះអាសន្នមន្ត្រីយោធា៦នាក់និងនគរបាល៣នាក់នៅពន្ធនាគារខេត្តមណ្ឌលគិរី។
ដីកាបញ្ជាក់ថា មន្ត្រីយោធា៥នាក់ រួមមាន មេបញ្ជាការកងអនុសេនាធំការពារព្រំដែនលេខ២ លោក អ៊ុក ណាខៃ, មេបញ្ជាការរងកងអនុសេនាធំការពារព្រំដែនលេខ២ ឈរជើងនៅអូរហ៊ុច លោក ឡឹក ញែក, លោក ផន សុផល និងលោក អ៊ាង ចាន់ឌី ព្រមទាំងមេបញ្ជាការកងអនុសេនាតូចការពារព្រំដែនលេខ២ ឈរជើងនៅអូរហ៊ុច វ៉ាន់ ចន្ធារី។
ដោយឡែក មន្ត្រីនគរបាល៣រូបផ្សេងទៀត រួមមាន លោក ព្រំ វណ្ណៈ លោក ផាត សុឡេង នាយរងប៉ុស្តិ៍អូរហ៊ុចនគរបាលការពារព្រំដែន និងលោក លាង ភារ័ត្ន ជានាយប៉ុស្តិ៍នគរបាលការពារព្រំដែនអូរហ៊ុច។ ក្នុងដីកាដដែលបញ្ជាក់ថា ពួកគេទាំង៨នាក់ត្រូវបានចោទចំនួន៣បទចោទ។
បទចោទទី១ «រួមគំនិតក្នុងអំពើនាំចេញផលអនុផលព្រៃឈើដែលគ្មានអាជ្ញាបណ្ណ» តាមមាត្រា២៧ នៃក្រមព្រហ្មទណ្ឌ និងមាត្រា៨៩ នៃច្បាប់ស្តីពីព្រៃឈើ និងបទចោទទី២ «ការធ្វើសកម្មភាពទាំងឡាយណា ដើម្បីធ្វើអន្តរាគមន៍ផ្តល់ការអនុញ្ញាតដោយផ្ទាល់និងប្រយោលជួយដល់អាជីវកម្មព្រៃឈើ» តាមមាត្រា១០០ នៃច្បាប់ស្តីពីព្រៃឈើ និងបទចោទមួយទៀត «ជួយសម្រួលក្នុងការចូលមកព្រះរាជាណាចក្រកម្ពុជាដោយលបលាក់» តាមមាត្រា២៩ នៃច្បាប់ស្តីពីអន្តោប្រវេសន៍ ខណៈមន្ត្រីយោធាម្នាក់ទៀត លោក ឌួង ចាន់វីរៈ ដាក់ឱ្យស្ថិតក្រោមការពិនិត្យពីបទ «ចាត់វិធានការសំដៅរារាំងការអនុវត្តច្បាប់និងមានស្ថានទម្ងន់ទោស»។
អ្នកនាំពាក្យកងរាជអាវុធហត្ថលើផ្ទៃប្រទេស និងជាអ្នកនាំពាក្យគណៈកម្មការជាតិទប់ស្កាត់និងបង្ក្រាបបទល្មើសធនធានធម្មជាតិ លោក អេង ហ៊ី សុំមិនបកស្រាយបន្ថែមពាក់ព័ន្ធករណីនេះទេ ដោយលោកថា គណៈកម្មការកំពុងស៊ើបអង្កេតរកអ្នកពាក់ព័ន្ធផ្សេងទៀត។
លោកបន្ថែមថា៖ «សូមចូលមើលក្នុងផេកកងរាជអាវុធហត្ថលើផ្ទៃប្រទេសបន្ត គឺមានតែប៉ុណ្ណឹងទេ! ព្រោះពាក់ព័ន្ធការស៊ើបអង្កេត គេកំពុងធ្វើបន្ត។ ខ្ញុំមិនអាចឆ្លើយបានទេ»។
កងរាជអាវុធហត្ថលើផ្ទៃប្រទេស បានចុះផ្សាយលើហ្វេសប៊ុករបស់ខ្លួនកាលពីថ្ងៃទី២៥ និងថ្ងៃទី២៦ ខែមិថុនា ថា គណៈកម្មការជាតិ ដើម្បីទប់ស្កាត់និងបង្រ្កាបបទល្មើសធនធានធម្មជាតិ តាមបន្ទាត់ព្រំដែន (អូរហ៊ុច) ស្ថិតក្នុងភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី បានឃាត់ខ្លួនមន្ត្រីយោធានិងនគរបាលជាបន្តបន្ទាប់ ពាក់ព័ន្ធបទល្មើសព្រៃឈើនៅតំបន់នោះ។
ប្រភពដដែលឱ្យដឹងថា អ្នកដែលត្រូវបានឃាត់ខ្លួននោះ បានសមគំនិតគប់គិតគ្នាជាមួយជនជាតិវៀតណាម ដោយបើកផ្លូវឱ្យចូលមកកាប់ឈើក្នុងតំបន់អូរហ៊ុច ដើម្បីដឹកជញ្ជូនយកទៅប្រទេសវៀតណាម ហើយក្នុងប្រតិបត្តិការចុះបង្ក្រាបបទល្មើសនេះដែរ សមត្ថកិច្ចបានដកហូតវត្ថុតាងជាឈើមូលប្រភេទស្រឡៅចំនួន២៥២កំណាត់ ត្រាក់ទ័រ២គ្រឿង ម៉ូតូ២គ្រឿង និងរណារយន្ត១គ្រឿង។
មន្រ្តីពង្រឹងសិទ្ធិអំណាចសហគមន៍ នៃសមាគមការពារសិទ្ធិមនុស្សអាដហុក លោក ប៉ែន ប៊ុណ្ណារ៍ បានសាទរចំពោះចំណាត់ការស្ថាប័នពាក់ព័ន្ធនិងតុលាការ ទៅលើមន្ត្រីយោធានិងនគរបាលដែលពាក់ព័ន្ធបទល្មើសព្រៃឈើនេះ។
ប៉ុន្តែលោកស្នើគណៈកម្មការជាតិ ដើម្បីទប់ស្កាត់និងបង្រ្កាបបទល្មើសធនធានធម្មជាតិ និងតុលាការខេត្តមណ្ឌលគិរី ត្រូវសើរើសំណុំរឿងចាស់ៗ និងស្រាវជ្រាវចាប់អ្នកពាក់ព័ន្ធផ្សេងទៀតមកដាក់ទោស ជាពិសេសមន្ត្រីជាន់ខ្ពស់មានអំណាច ឧកញ៉ា និងឈ្មួញឈើដែលមានឥទ្ធិពល ជាដើម។
លោកបន្ថែមថា៖ «យើងមើលទៅ វាឃើញថា ជាគំរូល្អហើយ! ប៉ុន្តែធ្វើបានតែលើមន្ត្រីតូចតាច ចំពោះមន្ត្រីជាន់ខ្ពស់ ឧកញ៉ា និងឈ្មួញដែលមានឥទ្ធិពលមួយចំនួននោះ មិនត្រូវបានធ្វើអ្វីទាំងអស់។ ហើយកន្លងមក យើងមើលឃើញថា មិនមែនមានតែមន្ត្រីធំៗនិងឧកញ៉ាទេ សូម្បីតែមន្ត្រីតុលាការខេត្តមណ្ឌលគិរីហ្នឹង ក៏ជាប់ពាក់ព័ន្ធនឹងបទល្មើសព្រៃឈើនេះដែរ។ អ៊ីចឹងយើងទាំងអស់គ្នា សុំឱ្យតុលាការចាត់វិធានការទៅលើសំណុំរឿងចាស់ៗហ្នឹង ដោយនាំខ្លួនអ្នកដែលពាក់ព័ន្ធមកដាក់ទោសឱ្យខានតែបាន ពីព្រោះបទឧក្រិដ្ឋហ្នឹងធំជាងបទឧក្រិដ្ឋដែលកើតពេលនេះទៀត»។
កាលពីឆ្នាំ២០១៩ គណៈកម្មការជាតិ ដើម្បីទប់ស្កាត់និងបង្រ្កាបបទល្មើសធនធានធម្មជាតិ បានចាប់និងបញ្ជូនមនុស្ស៥៩នាក់ទៅតុលាការ ពាក់ព័ន្ធការប្រព្រឹត្តបទល្មើសព្រៃឈើនៅទូទាំងប្រទេស ក្នុងនោះគឺមានឧកញ៉ា២នាក់ ដូចជា ឧកញ៉ា ស៊ឹង សំអុល និងឧកញ៉ា គង់ ក្រឹង ផងដែរ៕