សាច់ញាតិរបស់សពយុវតី២នាក់ដែលស្លាប់ដោយសង្ស័យពុលស្រាក្រឡុក ទទូចទៅអាជ្ញាធរជំនាញឱ្យស្រាវជ្រាវរកមូលហេតុដែលធ្វើឱ្យប្អូនស្រីគាត់ស្លាប់ ត្បិតពួកគេយល់ថា ការស្លាប់នោះស្ថិតនៅក្នុងមន្ទិលសង្ស័យជាច្រើន។
ការទទូចនេះធ្វើឡើងបន្ទាប់ពីអាជ្ញាធរមូលដ្ឋានអះអាងថា យុវតី២នាក់បងប្អូនបង្កើតបានស្លាប់កាលពីថ្ងៃទី២៨ ខែមិថុនា ឆ្នាំ២០២១ ដោយសមត្ថកិច្ចសន្និដ្ឋានថា ពួកគេផឹកស្រាក្រឡុកដែលមានសារធាតុមេតាណុលកម្រិតខ្ពស់។
តាមរយៈវីដេអូដែលផ្សព្វផ្សាយលើបណ្តាញសង្គមកាលពីថ្ងៃចន្ទ បុរសម្នាក់ដែលអះអាងក្នុងវីដេអូនោះថា ជាបងប្រុសបង្កើតរបស់យុវតីទាំង២នាក់ដែលស្លាប់នោះ លោក អ៊ុយ សុខទី បាននិយាយថា លោកមានការសោកស្តាយចំពោះការបាត់បង់ប្អូនស្រីទាំង២នាក់ជាខ្លាំង។
លោកបញ្ជាក់ថា ប្អូនរបស់គាត់ត្រូវបានបញ្ជូនទៅសង្រ្គោះនៅមន្ទីរពេទ្យឯកជនមួយក្នុងរាជធានីភ្នំពេញ ប៉ុន្តែមិនអាចជួយសង្រ្គោះពួកគាត់បាន ហើយខាងមន្ទីរពេទ្យបញ្ជាក់ថា ការស្លាប់នេះបណ្តាលមកពីករណីពុលស្រា ខណៈមិត្តភក្តិប្អូនរបស់លោកពីរនាក់ទៀតក៏កំពុងសម្រាកនៅមន្ទីរពេទ្យ ដោយមានអាការស្រដៀងគ្នានេះ។
យ៉ាងនេះក្តី លោកនៅតែទទូចទៅអាជ្ញាធរឱ្យស្រាវជ្រាវករណីនេះឱ្យបានហ្មត់ចត់ ដើម្បីបង្ហាញការពិតលើរឿងនេះ ត្បិតការស្លាប់ប្អូនទាំងពីររបស់លោកដោយថាពុលស្រានេះ គ្រួសារមិនអាចទទួលយកបានឡើយ។
លោកបន្តថា៖ «ខ្ញុំសំណូមពរ ចង់ដឹងថាប្អូនខ្ញុំមានមូលហេតុអ្វី ពីព្រោះស្រស់ៗពេក ចង់ឱ្យសមត្ថកិច្ចស្រាវជ្រាវម្ដងទៀត»។
នាយប៉ុស្តិ៍នគរបាលសង្កាត់ឃ្មួញ លោក ញាណ នន ប្រាប់ វីអូឌី នៅថ្ងៃពុធនេះថា កាលពីថ្ងៃទី២៨ ខែមិថុនានេះ យុវតីពីរនាក់ឈ្មោះ អ៊ុយ ស្រីម៉ៅ អាយុ២១ឆ្នាំ និងឈ្មោះ អ៊ុយ ស្រីដា អាយុ១៩ឆ្នាំ ជាបងប្អូនបង្កើត ធ្លាប់ធ្វើការនៅក្នុងភោជនីយដ្ឋានមួយកន្លែង ស្ថិតនៅក្នុងសង្កាត់ព្រែកព្នៅ បានផឹកស្រាក្រឡុកដែលមានសារធាតុមេតាណុលខ្ពស់បណ្តាលឱ្យពុលស្លាប់។
នាយប៉ុស្តិ៍រូបនោះបញ្ជាក់ថា យុវតីទាំង២នាក់នោះបានពុលស្លាប់ បន្ទាប់ពីបញ្ជូនទៅព្យាបាលនៅមន្ទីរពេទ្យឯកជនមួយក្នុងរាជធានីភ្នំពេញ។ ក្រោយពីស្លាប់ សមត្ថកិច្ចជំនាញបានធ្វើកោសលវិច័យរួច សមត្ថកិច្ចបានប្រគល់សពឱ្យគ្រួសារយកទៅធ្វើបុណ្យតាមប្រពៃណី។
ទាក់ទងនឹងការស្រាវជ្រាវឬធ្វើកោសលវិច័យលើសាកសពម្តងទៀតតាមការស្នើសុំរបស់គ្រួសារសពនោះ លោក ញាណ នន សុំមិនធ្វើការបកស្រាយជុំវិញករណីនេះឡើយ។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង សង្កេតឃើញថា ប្រជាពលរដ្ឋពុលស្រាស្លាប់ជាបន្តបន្ទាប់ ធ្វើឱ្យប៉ះពាល់ដល់ជនរងគ្រោះនិងសាច់ញាតិពួកគេ ខណៈវិធានការរបស់អាជ្ញាធរមិនទាន់បានល្អប្រសើរនៅឡើយ។
ករណីនេះ លោកជំរុញទៅរដ្ឋាភិបាលពន្លឿនអនុម័តច្បាប់គ្រប់គ្រងគ្រឿងស្រវឹង ទើបទប់ស្កាត់បញ្ហាប្រឈមទាំងនោះ មានប្រសិទ្ធភាព។
លោកជំរុញដូច្នេះថា៖ «រដ្ឋាភិបាលត្រូវតែមានច្បាប់ស្តីពីការគ្រប់គ្រងផលិតផលគ្រឿងស្រវឹង ដោយមានការដាក់ទោសទៅដល់អ្នកដែលបំពានច្បាប់ជាដើម ដើម្បីត្រួតពិនិត្យស្រាដែលអាចនឹងប្រើប្រាស់លើសជាតិមេតាណុលដែលធ្វើឱ្យពុល ឱ្យស្លាប់ ត្រូវគិតគូរពីបញ្ហាហ្នឹង! បើមិនអ៊ីចឹងទេ វាបង្កើតឱ្យមានការឈឺចាប់ដល់ប្រជាពលរដ្ឋជាហូរហែ»។
កាលពីថ្ងៃទី២០ ខែឧសភា ឆ្នាំ២០២១នេះ ក្រសួងសុខាភិបាលបានចេញសេចក្តីប្រកាសព័ត៌មានស្តីពីករណីស្លាប់បណ្តាលមកពីការពុលស្រានៅស្រុកល្វាឯម ខេត្តកណ្តាលថា ករណីស្លាប់ពលរដ្ឋចំនួន១២នាក់ នៅភូមិចំនួន២ បណ្តាលមកពីពលរដ្ឋទាំងនោះពិសាស្រា-ស និងស្រាថ្នាំ ដែលមានសារជាតិមេតាណុលខ្ពស់ ខណៈម្ចាស់ទីតាំងផលិតស្រាត្រូវឃាត់ខ្លួននិងបញ្ជូនទៅតុលាការផងដែរ។
ជាមួយគ្នានោះ ក្រសួងសុខាភិបាលបានអំពាវនាវដល់ពលរដ្ឋឱ្យបញ្ឈប់ការពិសាស្រា-សឬស្រាថ្នាំដែលផលិតគ្មានបច្ចេកទេសត្រឹមត្រូវជាបន្ទាន់ ដើម្បីបញ្ចៀសគ្រោះថ្នាក់ដល់សុខភាពឬរហូតបាត់បង់ជីវិតបន្តទៀត។
ដោយឡែក កាលពីខែវិច្ឆិកា ឆ្នាំ២០២០ ពលរដ្ឋនៅខេត្តកំពង់ឆ្នាំង ជិត១០នាក់បានស្លាប់ និងជាង១០០នាក់បានធ្លាក់ខ្លួនឈឺ ហើយត្រូវព្យាបាលនៅមន្ទីរពេទ្យ ដោយសារពុលស្រា-សដូចគ្នានេះផងដែរ។
ហេតុការណ៍ពុលស្រាមួយទៀតបានកើតឡើងកាលពីចន្លោះថ្ងៃទី០៧ ដល់ថ្ងៃទី១៣ ខែមិថុនា ឆ្នាំ២០២០ កន្លងទៅ នៅខេត្តបន្ទាយមានជ័យ បណ្តាលឱ្យមនុស្សចំនួន៧នាក់បានស្លាប់ និងជិត៤០នាក់ទៀតត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ក្រោយពីពួកគេបានទទួលទានស្រាថ្នាំយីហោម៉ាក «តាំងគួយ»៕
