លោកនាយករដ្ឋមន្ត្រី ហ៊ុន សែន បានប្រាប់ទៅមេបញ្ជាការកងរាជអាវុធហត្ថលើផ្ទៃប្រទេស លោក សៅ សុខា ឱ្យប្រមូលឈើដែលបង្ក្រាបបានពីបទល្មើស មកធ្វើជាក្តារមឈូសសម្រាប់ដាក់សពអ្នកស្លាប់ដោយសារជំងឺកូវីដ-១៩ ដើម្បីបូជាសពបានសមរម្យតាមបែបប្រពៃណីសាសនា។
លោកនាយករដ្ឋមន្ត្រី ហ៊ុន សែន លើកឡើងបែបនេះនៅក្នុងកិច្ចប្រជុំពិសេសមួយតាមប្រព័ន្ធវីដេអូជាមួយគណៈកម្មការជាតិប្រយុទ្ធប្រឆាំងនឹងជំងឺកូវីដ-១៩ ដើម្បីពិភាក្សានិងដោះស្រាយបញ្ហាជំងឺផ្លូវដង្ហើមមួយនេះ នៅថ្ងៃទី១ ខែកក្កដាឆ្នាំ២០២១។
ក្នុងកិច្ចប្រជុំនេះ លោក ហ៊ុន សែន បានឱ្យដឹងថា គណៈកម្មការគ្រប់គ្រងនិងចាត់ចែងសាកសពអ្នកជំងឺកូវីដ-១៩ កំពុងខ្វះក្តារមឈូសសម្រាប់ដាក់សព។ លោកបានជំរុញទៅគណៈកម្មការមួយនេះឱ្យពិភាក្សាជាមួយក្រសួងបរិស្ថាន ក្រសួងកសិកម្ម និងលោក សៅ សុខា ដែលជាប្រធានគណៈកម្មការជាតិទប់ស្កាត់និងបង្ក្រាបបទល្មើសធនធានធម្មជាតិ ដើម្បីយកឈើដែលបង្ក្រាបបានពីបទល្មើសកន្លងមក ទៅធ្វើជាក្តារមឈូសសម្រាប់ដាក់សាកសពយកទៅបូជាឱ្យសមរម្យ។
លោកបន្ថែមថា៖ «ឯកឧត្តម សៅ សុខា ដែលជាប្រធានគណៈកម្មការជាតិទប់ស្កាត់និងបង្ក្រាបបទល្មើសធនធានធម្មជាតិ មើលៗឈើនៅណាខ្លះ ហើយបើនីតិវិធីផ្លូវច្បាប់ ជំរុញការរឹបអូសឱ្យរហ័ស។ វាមិនមែនសុទ្ធតែត្រូវការក្តារមឈូសឆ្លាក់គ្រប់សពនោះទេ។ តែយ៉ាងណា កុំឱ្យយកទៅកប់សូម្បីតែក្តារមឈូសក៏គ្មាន យកទៅដុតសូម្បីតែក្តារមឈូសក៏គ្មាន យើងមិនគប្បីធ្វើបែបនេះចំពោះពលរដ្ឋយើងទេ»។
លោកនាយករដ្ឋមន្ត្រី ហ៊ុន សែន ក៏បញ្ជាទៅអភិបាលរាជធានី-ខេត្ត និងក្រសួងសេដ្ឋកិច្ចនិងហិរញ្ញវត្ថុ ឱ្យបញ្ចេញថវិកាទិញក្តារមឈូសយកទុកសម្រាប់ដាក់សាកសពអ្នកដែលស្លាប់ដោយសារជំងឺកូវីដ-១៩ផងដែរ។
អ្នកនាំពាក្យកងរាជអាវុធហត្ថលើផ្ទៃប្រទេស និងជាអ្នកនាំពាក្យគណៈកម្មការជាតិទប់ស្កាត់និងបង្ក្រាបបទល្មើសធនធានធម្មជាតិ លោក អេង ហ៊ី មិនទាន់អាចបញ្ជាក់បានពីទំហំឈើដែលបង្ក្រាបបាននៅឡើយទេ ដោយលោកថា សមត្ថកិច្ចកំពុងធ្វើការបូកសរុបនៅឡើយ។ លោកថា ឈើដែលបង្ក្រាបបាននោះ មានគ្រប់ខេត្តគោលដៅ។
លោកបន្ថែមថា៖ «យើងនឹងអនុវត្តទៅតាមបទបញ្ជា។ ឥលូវគេកំពុងបូកសរុប វាមាននៅតាម[បណ្ដាខេត្ត]បន្តិចៗទេ»។
ប្រធានកម្មវិធីផ្នែកស្រាវជ្រាវ និងតស៊ូមតិ នៃសមាគមបណ្ដាញយុវជនកម្ពុជា លោក ហេង គឹមហុង មានប្រសាសន៍ថា លោកមិនជំទាស់ចំពោះការយកឈើដែលប្រមូលបានពីបទល្មើសទៅធ្វើក្តារមឈូសសម្រាប់ដាក់សាកសពអ្នកជំងឺកូវីដ-១៩នោះទេ។ ប៉ុន្តែលោកថា គណៈកម្មការជាតិទប់ស្កាត់និងបង្ក្រាបបទល្មើសធនធានធម្មជាតិ ត្រូវបង្ហាញទីតាំងនិងចំនួនឈើដែលបង្ក្រាបបាននោះឱ្យបានច្បាស់លាស់ ហើយប្រើប្រាស់ឈើនោះសម្រាប់ប្រយោជន៍សាធារណៈឱ្យមានតម្លាភាពផង។
លោកបន្ថែមថា៖ «គួរតែបង្ហាញជាផ្លូវការនូវចំនួនបទល្មើសនិងចំនួនឈើដែលបានរឹបអូស ជាពិសេសកំណាត់ឈើ ថាតើបានតម្កល់នៅកន្លែងណាឱ្យបានច្បាស់លាស់! ហើយប្រភេទឈើដែលត្រូវយកមកប្រើសម្រាប់ជាប្រយោជន៍សាធារណៈនេះ គួរតែយកប្រភេទឈើណាដែលប្រើប្រាស់បាននូវវិស័យធម្មតា ប៉ុន្តែចំពោះឈើប្រណិតឬឈើកម្រ គួររក្សាទុកនៅសារមន្ទីរធនធានធម្មជាតិ ដើម្បីឱ្យក្មេងជំនាន់ក្រោយបានស្គាល់»។
កាលពីឆ្នាំ២០១៩ គណៈកម្មការជាតិដើម្បីទប់ស្កាត់និងបង្រ្កាបបទល្មើសធនធានធម្មជាតិ បានចាប់និងបញ្ជូនមនុស្ស៥៩នាក់ទៅតុលាការ ពាក់ព័ន្ធការប្រព្រឹត្តបទល្មើសព្រៃឈើនៅទូទាំងប្រទេស និងបានចាប់យកឈើចម្រុះជាង៩ពាន់ម៉ែត្រគូប និងរឹបអូសមធ្យោបាយដឹកជញ្ជូនឈើ៤៩១គ្រឿង ខណៈរបាយការណ៍ថ្មីជាងនេះ មិនបានទាន់បានបង្ហាញនៅឡើយ៕
