ពលករខ្មែរដែលកំពុងស្នាក់នៅនិងធ្វើការក្នុងប្រទេសថៃមួយចំនួនបានដាក់ញត្តិទៅរដ្ឋសភាថៃ ដើម្បីស្នើសុំឱ្យរដ្ឋាភិបាលនៃប្រទេសនេះជួយអន្តរាគមន៍ដោះស្រាយបញ្ហាឯកសារផ្លូវច្បាប់ ការស្នាក់នៅ ធ្វើការ និងការព្យាបាលអ្នកដែលឆ្លងជំងឺកូវីដ-១៩ឱ្យបានសមរម្យដូចពលរដ្ឋថៃ។
ប្រធានមូលនិធិពលករខ្មែរប្រចាំប្រទេសថៃ បានប្រាប់ វីអូឌី ឱ្យដឹងតាមទូរសព្ទពីប្រទេសថៃ នៅថ្ងៃទី១ ខែកក្កដា ក្នុងលក្ខខណ្ឌសុំមិនបញ្ចេញឈ្មោះថា តំណាងពលករខ្មែរប្រមាណ២០នាក់បានយកញត្តិទៅដាក់នៅរដ្ឋសភាថៃ ក្នុងទីក្រុងបាងកក ដើម្បីស្នើសុំអន្តរាគមន៍ពីរដ្ឋាភិបាលថៃលើបញ្ហាប្រឈមរបស់ពលករខ្មែរចំនួន៥ចំណុច។
ប្រភពដដែលបន្តថា បញ្ហាទាំងនោះរួមមាន ផ្តល់ភាពស្របច្បាប់ដល់ពលករខ្មែរតាមរយៈការចុះឈ្មោះស្នើសុំបណ្ណស៊ីជម្ពូជាលើកទី២ បញ្ឈប់ការចាប់អ្នកដែលពុំមានឯកសារស្នាក់នៅនិងធ្វើការស្របច្បាប់គ្រប់គ្រាន់ ផ្តល់ស្បៀងអាហារដល់ពលករខ្មែរដែលជាប់នៅតំបន់បិទខ្ទប់ឱ្យបានគ្រប់គ្រាន់ និងព្យាបាលអ្នកដែលឆ្លងជំងឺកូវីដ-១៩ឱ្យដូចជាពលរដ្ឋថៃ។
ប្រធានមូលនិធិរូបនោះនិយាយថា៖ «យើងក៏បានដាក់ស្នើទៅខាងរដ្ឋមន្រ្តីនៅមន្ទីរការងារ ហើយនិងដាក់ទៅខាងរដ្ឋសភាថៃ អ៊ីចឹងក៏មានការចេញមកទទួលញត្តិរបស់ពួកយើងអំពីគណៈរដ្ឋមន្ត្រី ក៏ដូចជាតំណាងសមាជិកសភាដែលទទួលបន្ទុកផ្នែកការងារហ្នឹង ហើយបញ្ជាក់ថា ពួកគាត់នឹងយកអ្វីដែលជាទុក្ខលំបាករបស់ពួកយើង ជាសំណើហ្នឹងទៅពិភាក្សានៅសភា ហើយនឹងរកដំណោះស្រាយ»។
ពលករខ្មែរម្នាក់ដែលបានចូលរួមដាក់ញត្តិដែរនោះ ប្រាប់ក្នុងលក្ខខណ្ឌមិនបញ្ចេញឈ្មោះដែរថា មូលហេតុដែលគាត់ចូលរួមជាមួយមន្រ្តីមូលនិធិពលករខ្មែរប្រចាំប្រទេសថៃ ដោយសាររូបលោកមើលឃើញពីទុក្ខលំបាករបស់ពលរដ្ឋខ្មែរកំពុងរស់នៅនិងធ្វើការនៅក្នុងប្រទេសនេះ។
លោកថា ពលករខ្មែរមួយចំនួនកំពុងជួបការលំបាកផ្នែកជីវភាព នៅពេលអាជ្ញាធរបិទខ្ទប់តំបន់ដែលពួកគេស្នាក់នៅ ហើយមានអ្នកខ្លះឆ្លងជំងឺកូវីដ-១៩ តែមិនត្រូវបានអាជ្ញាធរសុខាភិបាលថៃយកចិត្តទុកដាក់ព្យាបាលនោះទេ។
ប្រភពដដែលនិយាយថា៖ «បងប្អូនមួយចំនួនឮពាក្យថា ថៃមិនយកចិត្តទុកដាក់ក្នុងការព្យាបាលកូវីដ-១៩ ចំពោះពលករខ្មែរ និងស្របពេលពលករខ្មែររងទុក្ខលំបាកបន្ថែមទៀតនៅពេលអាជ្ញាធរថៃបិទខ្ទប់រយៈពេល១ខែ។ ដូច្នេះ ពួកគាត់ក៏សម្រេចចិត្តទៅដាក់ញត្តិ ដើម្បីសុំអន្តរាគមន៍ពីសភាថៃ»។
មន្ត្រីកម្មវិធីការពារសិទ្ធិពលករចំណាកស្រុក នៃអង្គការសង់ត្រាល់ លោក ឌី ថេហូយ៉ា គាំទ្រចំពោះការដាក់ញត្តិរបស់តំណាងពលករខ្មែរនៅក្នុងប្រទេសថៃ។ លោកលើកឡើងថា សកម្មភាពនេះបង្ហាញពីការប្រើប្រាស់សិទ្ធិបញ្ចេញសំឡេងទាមទារ ដើម្បីឱ្យរដ្ឋាភិបាលម្ចាស់ប្រទេសដឹងឮនិងធ្វើការដោះស្រាយ ខណៈកន្លងមក លោកមើលឃើញថា បញ្ហាទាំងនេះហាក់កំពុងត្រូវបានមើលរំលង។
មន្រ្តីឃ្លាំមើលសិទ្ធិពលកររូបនេះបន្ថែមថា ពលករខ្មែរបានជួបឧបសគ្គនិងបញ្ហាជាច្រើនក្នុងការរស់នៅនិងធ្វើការក្នុងប្រទេសក្បែរខាងមួយនេះ តាំងពីមុនវិបត្តិកូវីដ-១៩មកម៉្លេះ។ លោកបន្តថា ស្ថានភាពរីករាលដាលនៃជំងឺផ្លូវដង្ហើមថ្មីដែលវិវត្តកាន់តែធ្ងន់ធ្ងរពេលនេះ កំពុងធ្វើឱ្យពួកគេមួយចំនួន ពិសេសអ្នកគ្មានការងារធ្វើនិងបានឆ្លងជំងឺកូវីដ-១៩ ធ្លាក់ក្នុងស្ថានភាពកាន់តែធ្ងន់ធ្ងរ។
លោក ឌីថេ ហូយ៉ា និយាយថា៖ «សកម្មភាពលករខ្មែរនេះ តិចឬច្រើនបានបង្ហាញអំពីសុខទុក្ខនិងតម្រូវការរបស់ពួកគាត់ ឱ្យទាំងរដ្ឋាភិបាលថៃនិងកម្ពុជាបានដឹង ហើយរដ្ឋាភិបាលកម្ពុជាគួរសហការជាមួយរដ្ឋាភិបាលថៃ ដើម្បីឆ្លើយតបចំពោះបញ្ហានេះ»។
ទាក់ទងបញ្ហាប្រឈមរបស់ពលករខ្មែរនៅក្នុងប្រទេសថៃដោយសារបញ្ហាជំងឺកូវីដ-១៩នេះ អ្នកនាំពាក្យក្រសួងការបរទេសកម្ពុជា លោក កុយ គួង បានប្រាប់ វីអូឌី តាមសារ Telegram កាលពីថ្ងៃទី២៨ ខែមិថុនា សប្តាហ៍មុនថា ក្រសួងនិងស្ថានកុងស៊ុលកម្ពុជាប្រចាំនៅប្រទេសថៃ កំពុងត្រៀមខ្លួនជួយដោះស្រាយបញ្ហាលំបាករបស់ពលរដ្ឋខ្មែរជានិច្ច។
បើតាមមន្រ្តីអ្នកនាំពាក្យរូបនេះ ពលករខ្មែរប្រមាណ១លាននាក់កំពុងស្នាក់នៅនិងធ្វើការនៅក្នុងប្រទេសថៃ ខណៈរបាយការណ៍ពីអង្គការសង់ត្រាល់ថា ពលករខ្មែរដែលចំណាកស្រុកទៅធ្វើការនៅក្នុងប្រទេសនេះទាំងស្របច្បាប់និងមិនស្របច្បាប់ គឺមានប្រមាណ១លាន៦សែននាក់៕