អ្នកជំងឺកូវីដ-១៩ ចំនួន៣៦នាក់បន្ថែមទៀត បានស្លាប់កាលពីថ្ងៃម្សិលមិញ ដែលធ្វើឱ្យចំនួនអ្នកស្លាប់ដោយសារជំងឺនេះ កើនឡើងដល់ជិត៧០០នាក់ ខណៈចំនួនអ្នកឆ្លងថ្មីក៏មិនថយចុះនោះឡើយ។
យោងតាមសេចក្ដីប្រកាសព័ត៌មានរបស់ក្រសួងសុខាភិបាលចេញផ្សាយនៅថ្ងៃទី០៣ ខែកក្កដា ឆ្នាំ២០២១ ឱ្យដឹងថា អ្នកជំងឺកូវីដ-១៩ សរុប ៣៦ នាក់ បានស្លាប់កាលពីម្សិលមិញ ខណៈអ្នកឆ្លងថ្មីមានចំនួន ៩៤៨ នាក់ និងជាសះស្បើយមានចំនួន ៦១៥ នាក់។ សរុបរយៈពេល ៤ ថ្ងៃ អ្នកជំងឺកូវីដ-១៩ ចំនួន ១២១ នាក់បានស្លាប់ ដែលចំនួននេះ ខ្ពស់មិនធ្លាប់មានចាប់តាំងពីផ្ទុះព្រឹត្តិការណ៍សហគមន៍ ២០ កុម្ភៈ មក។
កាលពីពេលថ្មីៗ មន្ត្រីជាន់ខ្ពស់ក្រសួងសុខាភិបាលលោកស្រី ឱ វណ្ណឌីន បានលើកឡើងថា កម្ពុជាបច្ចុប្បន្នបានដើរដល់បន្ទាត់ក្រហមហើយ ក្រោយពីកន្លែងសង្គ្រោះបន្ទាន់ កន្លែងព្យាបាលអ្នកជំងឺកូវីដ-១៩ កម្រិតធ្ងន់បានពេញសឹងគ្រប់កន្លែងទាំងអស់ ខណៈចំនួនអ្នកឆ្លងថ្មី ក៏បានកើនឡើងជារៀងរាល់ថ្ងៃ។
កាលពីថ្ងៃទី០១ ខែកក្កដា ឆ្នាំ២០២១ លោកនាយករដ្ឋមន្ត្រី ហ៊ុន សែន បានបញ្ជាទៅអភិបាលរាជធានី-ខេត្ត និងក្រសួងសេដ្ឋកិច្ចនិងហិរញ្ញវត្ថុ ឱ្យបញ្ចេញថវិកាដើម្បីទិញក្តារមឈូសយកទុកសម្រាប់ដាក់សាកសពអ្នកដែលស្លាប់ដោយសារជំងឺកូវីដ-១៩។ លើសពីនេះទៅទៀត លោកនាយករដ្ឋមន្ត្រីក៏បានប្រាប់ទៅមេបញ្ជាការកងរាជអាវុធហត្ថលើផ្ទៃប្រទេស លោក សៅ សុខា ឱ្យប្រមូលឈើដែលបង្ក្រាបបានពីបទល្មើសព្រៃឈើ យកមកធ្វើជាក្តារមឈូស សម្រាប់ដាក់សពអ្នកស្លាប់ដោយសារជំងឺកូវីដ-១៩ ផងដែរ។
បើតាមរបាយការណ៍ក្រសួងសុខាភិបាលឱ្យដឹងថា គិតត្រឹមថ្ងៃទី០៣ ខែកក្កដា ឆ្នាំ២០២១ កម្ពុជារកឃើញអ្នកឆ្លងជំងឺកូវីដ-១៩ សរុប ៥៣, ២៩៨ នាក់ ក្នុងនោះ ករណីនាំចូលពីក្រៅប្រទេស សរុប ២៩១៦ ខណៈអ្នកជាសះស្បើយ ៤៦,១២៣ នាក់ និង អ្នកស្លាប់ ចំនួន ៦៩៦ នាក់៕
