ក្រុមប្រជាពលរដ្ឋអះអាងថា ព្រៃរាប់រយហិកតានៅតំបន់ការពារមួយ ស្ថិតក្នុងស្រុកបទុមសាគរ ខេត្តកោះកុង បានរងនូវការកាប់បំផ្លាញយកដីធ្វើជាកម្មសិទ្ធិ ដោយពុំមានការទប់ស្កាត់ពីអាជ្ញាធរពាក់ព័ន្ធឡើយ។
ពលរដ្ឋម្នាក់រស់នៅភូមិប្រលាន ឃុំកណ្តោល ស្រុកបទុមសាគរ លោក សុខ សម្បត្តិ ប្រាប់ វីអូឌី នៅថ្ងៃចន្ទនេះថា ព្រៃឈើប្រហែល៥០០ហិកតា នៅតំបន់ប្រើប្រាស់ច្រើនយ៉ាងដងពែង ស្ថិតនៅភូមិប្រលាន ឃុំកណ្តោល ស្រុកបទុមសាគរ រងការកាប់បំផ្លាញនិងទន្ទ្រានយកធ្វើកម្មសិទ្ធិយ៉ាងអនាធិបតេយ្យ។
លោកបន្តថា សកម្មភាពជនខិលខូចរុករានដីព្រៃក្នុងតំបន់ការពារនេះ បានកើតតាំងពីដើមឆ្នាំ២០២១រហូតមកដល់បច្ចុប្បន្ន ដោយពុំមានអាជ្ញាធរណាចុះទប់ស្កាត់និងមានវិធានការច្បាប់តឹងរ៉ឹងចំពោះជនល្មើសឡើយ។
លោកបន្ថែមថា៖ «ដីហ្នឹង បើយើងពិនិត្យមើលទៅ គឺកាប់រាប់រយហិកតា ព្រោះវាធំណាស់! អ្នកដែលគេកាប់មុនហ្នឹង ខ្ញុំអត់ដឹងថា គេមកពីខាងណាទេ។ គេបានកាប់ទ្រង់ទ្រាយធំ គេប្រើកម្មករកាប់ ហើយអាជ្ញាធរនិងមន្ត្រីបរិស្ថានដែលមានទីស្នាក់ការនៅជិតហ្នឹង ក៏គេថាអត់ដឹងថាអ្នកណាកាប់ដែរ»។
ពលរដ្ឋនៅភូមិប្រលាន ឃុំកណ្ដោលម្នាក់ទៀតដែលសុំមិនបញ្ចេញឈ្មោះដោយបារម្ភពីសុវត្ថិភាព និយាយថា អ្នកដែលប្រព្រឹត្តបទល្មើសព្រៃឈើក្នុងតំបន់ប្រើប្រាស់ច្រើនយ៉ាងនោះ ភាគច្រើនជាអ្នកមានលុយមានអំណាច ខណៈប្រជាពលរដ្ឋក្រីក្រមានតិចតួចប៉ុណ្ណោះ។ ពលរដ្ឋរូបនេះបានដាក់ការសង្ស័យថា បញ្ហានេះអាចមានជាប់ពាក់ព័ន្ធនឹងអំពើពុករលួយនិងការគប់គិតគ្នារវាងអាជ្ញាធរពាក់ព័ន្ធនៅតំបន់នោះនិងជនល្មើស។
លោកបន្ថែមថា៖ «ព្រៃហ្នឹងគេកាប់ប្រហែលពី៣០០ទៅ៥០០ហិកតា ដីហ្នឹងធំណាស់។ គេចូលពីក្នុងចេញមកក្រៅវិញ។ អ្នកមានលុយមានអំណាចកាប់ច្រើន ហើយបរិស្ថានដែលប្រចាំការនៅឆ្ងាយពីទីនោះប្រហែល១០០ម៉ែត្រ ក៏គេនៅតែកាប់បាន។ យើងមិនដឹងថា គេកាប់បានដោយរបៀបណាទេ»។
មេឃុំកណ្តោល លោក ឆឹង ង៉ែ ទទួលស្គាល់ថា ពិតជាមានការកាប់រានព្រៃនៅតំបន់ការពារដែលជាតំបន់ប្រើប្រាស់ច្រើនយ៉ាងដងពែនមែន ប៉ុន្តែលោកថា ការកាប់ទន្ទ្រាននោះមានប្រហែលតែ២ទៅ៣ហិកតាប៉ុណ្ណោះ។
មេឃុំរូបនេះបន្តថា ក្រោយទទួលបានព័ត៌មាន រូបលោកនិងអាជ្ញាធរពាក់ព័ន្ធបានចុះទៅហាមឃាត់ប្រជាពលរដ្ឋឱ្យបញ្ឈប់សកម្មភាពកាប់និងរុករានព្រៃនោះទៀតហើយ។ លោកថា អាជ្ញាធរមូលដ្ឋាននឹងដាក់សំណើទៅថ្នាក់លើ ដើម្បីសុំដីសម្បទានសង្គមកិច្ចចែកជូនពលរដ្ឋទាំងនោះ។
លោកបន្ថែមថា៖ «ម្សិលមិញនេះ ខ្ញុំបានចុះទៅហាមគាត់ ហើយថាដីនេះស្ថិតក្នុងប្លុកទឹកប្រៃ និងដីជាដីបម្រុងទុកសម្រាប់ចេញឱ្យបងប្អូន ហើយក៏ជាដីស្ថិតក្នុងតំបន់ការពារទៀត។ បងប្អូនកុំទៅកាប់រានទៀត យើងធ្វើអ៊ីចឹង វាមិនទំនងទេ។ ម្សិលមិញនេះ គ្នាគាត់មកកាប់ប្រហែល៥០ទៅ៦០នាក់»។
មន្ត្រីបរិស្ថានប្រចាំនៅតំបន់ប្រើប្រាស់ច្រើនយ៉ាងដងពែង លោក ស៊ិន ប៊ុនថា មានប្រសាសន៍ថា មានករណីកាប់និងរុករានដីព្រៃនៅជាប់តំបន់ការពារដងពែនមែន ប៉ុន្តែលោកមិនអាចបញ្ជាក់ថា ការកាប់នោះចូលក្នុងតំបន់ការពារឬនៅក្រៅតំបន់ការពារនោះឡើយ ដោយរង់ចាំមន្ត្រីជំនាញវាស់វែងសិន។
មន្ត្រីរូបនេះបន្តថា ក្រោយវាស់វែងរួច បើរកឃើញថាមានការកាប់ចូលក្នុងតំបន់ការពារមែននោះ មន្ទីរបរិស្ថានខេត្តនឹងកសាងសំណុំរឿងបញ្ជូនទៅតុលាការ។
លោកបន្ថែមថា៖ «ចាំខ្ញុំដំឡើងផែនទីសិន តើវាស្ថិតនៅក្នុងតំបន់អភិរក្សឬតំបន់កាត់ឆ្វៀលទុកចែកប្រជាជន។ បើសិនការកាប់នោះស្ថិតក្នុងតំបន់អភិរក្ស ខ្ញុំនឹងកសាងសំណុំរឿងដាក់ជូនតុលាការ»។
មន្រ្តីសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកោះកុង លោក ហ៊ួរ អ៊ីន ធ្លាប់មានប្រសាសន៍ថា នៅខេត្តកោះកុងមានករណីចាក់ដីរំលោភចូលឆ្នេរសមុទ្រ ការទន្ទ្រានយកដីព្រៃកោងកាងនិងព្រៃតំបន់ការពារផ្សេងទៀតស្ទើរតែគ្រប់កន្លែង។ លោកថា សកម្មភាពល្មើសទាំងនោះមិនត្រូវបានអាជ្ញាធរចាត់វិធានការច្បាប់តឹងរ៉ឹងទៅលើជនល្មើសទេ ដែលធ្វើឱ្យបញ្ហានេះបន្តកើតមានឥតឈប់ឈរ។
លោក ហ៊ួរ អ៊ីន បារម្ភពីការបាត់បង់យ៉ាងឆាប់រហ័សនូវទ្រព្យសម្បត្តិសាធារណៈរបស់រដ្ឋទាំងនេះ ប្រសិនបើអាជ្ញាធរពាក់ព័ន្ធបណ្តែតបណ្តោយនិងមិនចាត់វិធានការឱ្យបានតឹងរ៉ឹងនោះ៕
