មន្ត្រីជាន់ខ្ពស់ក្រសួងមហាផ្ទៃ ឱ្យដឹងថា ប្រធានពន្ធនាគារខេត្តសៀមរាប ត្រូវបានរកឃើញវិជ្ជមានជំងឺកូវីដ-១៩ ក្រោយពីគាត់ត្រឡប់មកពីចូលរួមបុណ្យសពបងប្អូននៅខេត្តបន្ទាយមានជ័យ តែមិនមានការចម្លងដល់អ្នកជាប់ឃុំទេ។
អ្នកនាំពាក្យនៃអគ្គនាយកដ្ឋានពន្ធនាគារក្រសួងមហាផ្ទៃ លោក នុត សវនា ឱ្យដឹងនៅថ្ងៃអង្គារនេះថា ការរកឃើញករណីវិជ្ជមានកូវីដ-១៩ លើលោក ភាន ឆវ័ន្ត ប្រធានពន្ធនាគារខេត្តសៀមរាប ក្រោយពីគាត់សុំច្បាប់ទៅចូលរួមបុណ្យសពម្តាយមីងនៅខេត្តបន្ទាយមានជ័យ។ លោកបន្តថា បច្ចុប្បន្ន មន្ត្រីរូបនេះកំពុងសម្រាកព្យាបាលនៅមន្ទីរសុខាភិបាលខេត្តសៀមរាប។
លោកថា៖ «ដោយឡែក មន្ត្រីពាក់ព័ន្ធមានតែមន្ត្រីរដ្ឋបាលទេ។ មន្ត្រីរដ្ឋបាល យើងបញ្ជូនពួកគាត់ទៅយកសំណាកអស់ហើយ លទ្ធផលអវិជ្ជមាន។ ហើយពេលនេះ ពួកគាត់កំពុងធ្វើចត្តាឡីស័កដែរនៅក្នុងបន្ទាយ»។
លោក ភាន ឆវ័ន្ត ត្រូវបានរដ្ឋបាលខេត្តសៀមរាប ប្រកាសថា រកឃើញវិជ្ជមានជំងឺកូវីដ-១៩ នៅថ្ងៃទី៣ ខែកក្កដា ឆ្នាំ២០២១ ជាមួយអ្នកវិជ្ជមានចំនួន៤៩នាក់ផ្សេងទៀត។
បើតាមរបាយការណ៍របស់អធិការដ្ឋាននគរបាលស្រុកអង្គរធំ ដែល វីអូឌី ទទួលបាននៅថ្ងៃនេះ មន្ត្រីនគរបាលជាន់ខ្ពស់មួយរូបនៅអធិការដ្ឋាននគរបាលស្រុកនេះ គឺលោក សោម វិដេត ក៏ត្រូវបានរកឃើញវិជ្ជមានកូវីដ-១៩នេះដែរ នៅថ្ងៃទី៤ ខែកក្កដា ក្រោយពីគាត់បានជួបប្រធានពន្ធនាគាររូបនេះកាលពីថ្ងៃទី២៦ ខែមិថុនាមក។
បើតាមរបាយការណ៍ដដែល លោក សោម វិដេត មុនតេស្តឃើញវិជ្ជមាន គឺលោកបានទៅបំពេញការងារក្នុងអង្គភាពរបស់ខ្លួន និងចូលរួមកិច្ចប្រជុំពង្រឹងការងារសន្តិសុខ លុះដល់ថ្ងៃទី២៩ ខែមិថុនា បានទៅសម្រាកនៅផ្ទះ ស្ថិតនៅភូមិខ្នា សង្កាត់ជ្រាវ ខេត្តសៀមរាប ហើយថ្ងៃទី៣០ ខែមិថុនា បានសុំច្បាប់ ដោយសារមានអាការមិនស្រួលខ្លួន។ លុះដល់ថ្ងៃទី១ ខែកក្កដា បានដាក់ខ្លួននៅដាច់ដោយឡែកពីគ្រួសារ បន្ទាប់មករកឃើញវិជ្ជមាននៅថ្ងៃទី៤ ខែកក្កដា ឆ្នាំ២០២១ ក្រោយពីទៅធ្វើតេស្តសំណាកនៅសាលាគរុកោសល្យខេត្តសៀមរាប៕