អាជ្ញាធរខេត្តកំពត បានសម្រេចឱ្យផ្អាកអាជីវកម្មផលិតស្រាសមួយកន្លែងនៅស្រុកកំពង់ត្រាច ក្រោយរកឃើញថា គ្មានច្បាប់អនុញ្ញាត បង្កឱ្យអ្នកទទួលទាន១១នាក់ស្លាប់ និង១២នាក់ទៀតកំពុងជួយសង្គ្រោះនៅមន្ទីរពេទ្យ។
តាមរយៈលិខិតចុះថ្ងៃទី៥ ខែកក្កដា ឆ្នាំ២០២១ អាជ្ញាធរខេត្តកំពត បានជូនដំណឹងទៅអាជ្ញាធរស្រុកកំពង់ត្រាច ពីការសម្រេចឱ្យផ្អាកការធ្វើអាជីវកម្មផលិតស្រា-សមួយកន្លែងនៅក្នុងមូលដ្ឋាននេះ។
រដ្ឋបាលខេត្តបញ្ជាក់ថា មូលហេតុនៃការផ្អាកនេះ ដោយសារការធ្វើអាជីវកម្មនោះ «គ្មានច្បាប់អនុញ្ញាតពីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ក្នុងភូមិសាស្ត្រទូទាំងខេត្តកំពត»។
រដ្ឋបាលខេត្តបានគូសបញ្ជាក់ថា កន្លងមក ទីតាំងផលិតស្រានេះបានលក់និងចែកចាយស្រាក្លែងក្លាយ ឬមិនធ្វើតាមបច្ចេកទេសត្រឹមត្រូវមួយចំនួន និងបានបង្កគ្រោះថ្នាក់ដល់អាយុជីវិតពលរដ្ឋជាបន្តបន្ទាប់។ យ៉ាងណា អាជ្ញាធរខេត្តកំពត មិនបានប្រាប់ពីចំនួនអ្នករងគ្រោះទេ។
ស្នងការនគរបាលខេត្តកំពត លោក ម៉ៅ ច័ន្ទមធុរិទ្ធ ឱ្យដឹងថា គិតត្រឹមថ្ងៃចន្ទ អ្នកដែលទទួលទានស្រានេះចំនួន១១នាក់បានស្លាប់ និង១២នាក់កំពុងបញ្ជូនទៅសម្រាកព្យាបាលនៅមន្ទីរពេទ្យ។ ចំណែកម្ចាស់អាជីវកម្មវិញ លោកថា បានរត់គេចខ្លួន ហើយថា ពេលនេះ កម្លាំងជំនាញកំពុងតែតាមរក ដើម្បីនាំខ្លួនមកទទួលខុសត្រូវចំពោះមុខច្បាប់។
លោកថា៖ «អ្នកព្យាបាល១២នាក់ ព្យាបាលនៅកំពង់ត្រាច៦នាក់ នៅដំណាក់ចង្អើរ ខេត្តកែប៦នាក់ [សុខភាពគាត់យ៉ាងម៉េចដែរឥលូវ?] គាត់បានធូរស្រាលហើយ»។
កាលពីខែឧសភា ឆ្នាំ២០២១ ម្ចាស់សិប្បកម្មផលិតស្រា-ស ចំនួន២នាក់ នៅស្រុកកំពង់ត្រាចនេះ ត្រូវបានសមត្ថកិច្ចចាប់ខ្លួនបញ្ជូនទៅតុលាការ ក្រោយពីអាជ្ញាធររកឃើញអ្នកទទួលទានស្រា១០នាក់បានស្លាប់ និង៣០នាក់ទៀតត្រូវបញ្ជូនទៅព្យាបាលនៅមន្ទីរពេទ្យ ដោយសារពុលស្រា-សរបស់សិប្បកម្មនេះ ក្នុងកម្មវិធីបុណ្យសពមួយកន្លែង ស្ថិតនៅភូមិធ្នង់ ឃុំឫស្សីស្រុកខាងកើត ស្រុកកំពង់ត្រាច ខេត្តកំពត។
ករណីនេះ ក្រសួងសុខាភិបាលរកឃើញស្រាដែលបានផលិតនោះមានសារធាតុមេតាណុល (Methanol) លើសកម្រិត ដែលធ្វើឱ្យអ្នកទទួលទានស្លាប់។
ប៉ុន្មានឆ្នាំចុងក្រោយនេះ ករណីពុលស្រាសឬពុលស្រាថ្នាំបានសម្លាប់ពលរដ្ឋជាបន្តបន្ទាប់នៅខេត្តក្រចេះ កណ្តាល ពោធិ៍សាត់ កំពង់ឆ្នាំង និងបន្ទាយមានជ័យ ជាដើម។
អ្នកនាំពាក្យក្រសួងសុខាភិបាល លោកស្រីវេជ្ជបណ្ឌិត ឱ វណ្ណឌីន មានប្រសាសន៍ថា ការយកជាតិមេតាណុលទៅលាយ ដើម្បីផលិតស្រា ជាគ្រោះថ្នាក់ដល់សុខភាពអ្នកទទួលទាន។
អ្នកជំនាញសុខាភិបាលរូបនេះបានគូសបញ្ជាក់ថា ដើម្បីកាត់បន្ថយការស្លាប់នៅក្នុងសហគមន៍ វាជាការចូលរួមទាំងអស់គ្នា ដែលអ្នកផលិតស្រាត្រូវធ្វើតាមបច្ចេកទេស គិតពីសុខភាពសាធារណៈ ពលរដ្ឋត្រូវចេះពិនិត្យផលិតផលគ្មានគ្រោះថ្នាក់ កាត់បន្ថយការប្រើប្រាស់គ្រឿងស្រវឹងឱ្យបានច្រើនបំផុត។
លោកស្រីថា៖ «តាមបច្ចេកទេសសុខាភិបាល មិនត្រូវយកមេតាណុលមកលាយស្រាដើម្បីបរិភោគទេ អាហ្នឹងគឺដាច់ខាតហើយ! អ៊ីចឹងសូមឱ្យបញ្ឈប់ជាបន្ទាន់ ដែលវាធ្វើឱ្យប៉ះពាល់សុខភាពរហូតដល់បាត់បង់ជីវិតនេះ។ អ៊ីចឹងវាជាការសំខាន់ណាស់ វាអត់មានអីថាយើងធ្វើមិនបានទេ គឺអាចធ្វើបាន! ទី១ អ្នកផលិតកុំយកមេតាណុលយកមកលាយ អាហ្នឹងចាំបាច់ហើយ»។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី មើលឃើញថា ការពុលស្រាបានសម្លាប់មនុស្សជាច្រើននាក់នាប៉ុន្មានឆ្នាំចុងក្រោយនេះ ដែលលោកចាត់ទុកថា ជាហានិភ័យដល់សុខភាពសាធារណៈ បើស្ថាប័នពាក់ព័ន្ធមិនពិនិត្យលើការបង្កើតច្បាប់គ្រប់គ្រងឡើងវិញ ដើម្បីទប់ស្កាត់ឱ្យមានប្រសិទ្ធភាពទេនោះ ខណៈការផលិតស្រា-សនៅតាមមូលដ្ឋាន បានងាកចេញពីការផលិតបែបប្រពៃណីទៅហើយនោះ។
លោកថា៖ «ស្រាក្តី ស្រាបៀរក្តី នៅតាមមូលដ្ឋានហ្នឹង! យើងគួរតែមានច្បាប់ជាតិមួយ ដើម្បីគ្រប់គ្រងការលក់គ្រឿងស្រវឹងជាទូទៅតែម្តង ដោយសារបញ្ហានេះជាហានិភ័យសាធារណៈ។ យើងគួរតែរៀបចំជាប្រព័ន្ធតែម្តងក្នុងការគ្រប់គ្រងរឿងហ្នឹង កុំឱ្យមានបញ្ហាមួយ យើងទៅដោះមួយ […] ព្រោះរឿងហ្នឹងធ្វើឱ្យមនុស្សស្លាប់ច្រើន ខ្ញុំគិតថា យើងគួរតែមានច្បាប់ជាក់លាក់ ហើយច្បាប់ហ្នឹងត្រូវដាក់បន្ទុកឱ្យអ្នកពាក់ព័ន្ធទទួលខុសត្រូវ»។
តាមសេចក្តីព្រាងច្បាប់ស្តីការការត្រួតពិនិត្យផលិតផលគ្រឿងស្រវឹង ចុះថ្ងៃទី២៥ ខែឧសភា ឆ្នាំ២០១៥ បានចែងពីគោលបំណងការពារសុខភាពសាធារណៈ បរិស្ថាន និងកាត់បន្ថយផលប៉ះពាល់លើសេដ្ឋកិច្ចនិងសង្គម។ មាត្រា៥នៃសេចក្តីព្រាងច្បាប់នេះ ចែងថា ក្រសួងសុខាភិបាលជាស្ថាប័នបង្គោលជាតិ មានសមត្ថកិច្ចក្នុងការអនុវត្តបទប្បញ្ញត្តិនៃច្បាប់នេះ។
សេចក្តីព្រាងច្បាប់ដែលមាន១១ជំពូក និង៣៩មាត្រានេះ ក៏បានហាមលក់ឱ្យជនដែលមានអាយុក្រោម២១ឆ្នាំ ស្ត្រីមានផ្ទៃពោះ ហាមលក់ឱ្យជនដែលមានអាការស្រវឹង ហាមលក់គ្រឿងស្រវឹងគ្រប់ប្រភេទចាប់ពីម៉ោង១២យប់ ដល់ម៉ោង៦ភ្លឺ លើកលែងតែទីតាំងមួយចំនួនដែលកំណត់ដោយអនុក្រឹត្យ។
ប៉ុន្តែបើតាមរដ្ឋមន្ត្រីក្រសួងសុខាភិបាល លោក ម៉ម ប៊ុនហេង អំឡុងកិច្ចប្រជុំជាមួយឧត្តមក្រុមប្រឹក្សាពិគ្រោះ និងផ្តល់យោយល់ កាលពីថ្ងៃទី១៩ ខែមិថុនា ឆ្នាំ២០១៩ បានបញ្ជាក់ថា សេចក្តីព្រាងនេះបានដាក់បញ្ចូលទៅក្នុងសេចក្តីព្រាងច្បាប់ ស្តីពីការគ្រប់គ្រងចំណីអាហារ តាមការស្នើឡើងពីក្រសួងពាណិជ្ជកម្មហើយ៕
អត្ថបទទាក់ទង
បទវិភាគ៖ តើកម្ពុជាត្រូវមានយន្តការបែបណាខ្លះ ដើម្បីទប់ស្កាត់ករណីពុលស្រា?
ករណីពុលចំណីអាហារ ពិសេសពុលស្រា-សឬស្រាថ្នាំ បានកើតឡើងនៅកម្ពុជាម្តងហើយម្តងទៀត បង្កឱ្យមានពលរដ្ឋរងគ្រោះរហូតដល់ស្លាប់បាត់បង់ជីវិតជាច្រើននាក់។