ប្រជាពលរដ្ឋមួយចំនួននៅស្រុកចិត្របុរី ខេត្តក្រចេះ ចោទក្រុមហ៊ុនឯកជនមួយថា បានរំលោភយកដីធ្លីនិងបានប្តឹងពួកគេទៅតុលាការថែមទៀត ក្រោយពួកគេនាំគ្នាតវ៉ាប្រឆាំង។
កាលពីម្សិលមិញ ពលរដ្ឋរាប់រយនាក់នៅភូមិកសាង ឃុំចង្ក្រង់ ស្រុកចិត្របុរី បាននាំគ្នាតវ៉ានិងរារាំងគ្រឿងចក្ររបស់ក្រុមហ៊ុនមួយមិនឱ្យឈូសឆាយដីរបស់ពួកគាត់។
ជនជាតិដើមភាគតិចពូនង លោក ស្រឿង សាយ ប្រាប់ វីអូឌី នៅថ្ងៃអង្គារនេះថា ដីប្រហែល៨ ០០០ហិកតារបស់ជនជាតិដើមភាគតិចពូនង និងពលរដ្ឋខ្មែរ ជាង៦០០គ្រួសារ ស្ថិតក្នុងភូមិកសាង ឃុំចង្ក្រង់ ស្រុកចិត្របុរី មានជម្លោះជាមួយក្រុមហ៊ុនឯកជនមួយឈ្មោះ «មីកាស្តា» តាំងពីឆ្នាំ២០២០ រហូតមកដល់បច្ចុប្បន្ន។
លោក ស្រឿង សាយ បានឱ្យដឹងថា ក្នុងចំណោមពលរដ្ឋជាង៦០០គ្រួសារនោះ គឺមានជនដើមភាគតិចប្រហែលជាង៦០ភាគរយ ហើយថា ក្រុមហ៊ុនបានដាក់គ្រឿងចក្រឈូសឆាយរំលោភយកដីជនជាតិដើមភាគតិច ដូចជា ដីអាស្រ័យផលជាក់ស្តែង ចម្ការវិលជុំ ដីសម្រាប់កប់សព ដីអារក្ស និងដីផ្សេងទៀត។ លោកថា ក្រុមហ៊ុន«មីកាស្តា»ឈូសឆាយដីរបស់ជនជាតិដើមភាគតិច ធ្វើជាដីឡូត៍សម្រាប់លក់។
លោកបន្ថែមថា៖ «ក្រុមហ៊ុនបានរំលោភបំពានទៅលើដីធ្លីរបស់ជនជាតិដើមភាគតិចយើង ដោយគាត់បានវាយព្រៃ កាយផ្នូរ ហើយកន្លែងប្រាសាទចាស់ និងចម្ការវិលជុំរបស់ពួកយើង។ នៅពេលដែលយើងចូលទៅធ្វើអីនៅក្នុងចម្ការចាស់របស់ពួកយើងហ្នឹង គឺក្រុមហ៊ុនប្រើសន្តិសុខដោយមានអាវុធបាញ់គំរាមកំហែងមកប្រជាពលរដ្ឋយើង និងរឹបអូសយកម៉ូតូ។ អ៊ីចឹងហើយបានជាពួកយើងនៅតវ៉ាដេញក្រុមហ៊ុននោះចេញពីកន្លែងយើង»។
ជនជាតិដើមភាគតិចពូនងម្នាក់ទៀត លោក ឆាល ឡុង និយាយថា ជុំវិញជម្លោះដីធ្លីនេះ ខាងក្រុមហ៊ុនបានប្រើសន្តិសុខដោយប្រើប្រាស់កាំភ្លើងបាញ់គំរាមកំហែងប្រជាពលរដ្ឋមិនឱ្យតវ៉ានិងចូលទៅអាស្រ័យផលលើដីរបស់ខ្លួន ហើយប្តឹងពលរដ្ឋទៅតុលាការថែមទៀត។
លោកឱ្យដឹងទៀតថា រហូតមកដល់ពេលនេះ មានពលរដ្ឋម្នាក់ហើយបានជាប់ពន្ធនាគារ ខណៈរូបលោកនិងពលរដ្ឋម្នាក់ទៀតកំពុងជាប់បណ្តឹងនៅតុលាការ។
លោកបន្ថែមថា៖ «កាលពីប្រាំងមិញ [កាលពីរដូវប្រាំងឆ្នាំមុន] នេះ ក្រុមហ៊ុនបានប្តឹងពលរដ្ឋខ្ញុំដាក់គុកម្នាក់ ដោយសារគាត់សកម្មតវ៉ាពេក ហើយក្រុមហ៊ុនបានប្រើសន្តិសុខបាញ់គំរាមកំហែងប្រជាពលរដ្ឋថែមទៀត»។
លោក ទូច ដែលអះអាងថាជាតំណាងក្រុមហ៊ុន បានច្រានចោលចំពោះការចោទប្រកាន់របស់ពលរដ្ឋ ដែលថា ក្រុមហ៊ុនរំលោភយកដីរបស់ពួកគេ។ លោកអះអាងថា ក្រុមហ៊ុន«មីកាស្តា»ទទួលបានសិទ្ធិវិនិយោគលើដីទំហំ៨ ០០០ហិកតានៅតំបន់នោះពីរដ្ឋាភិបាល ដើម្បីអភិវឌ្ឍដាំដំណាំកសិឧស្សាហកម្មនិងចិញ្ចឹមសត្វ។
តំណាងក្រុមហ៊ុនរូបនេះបានទទួលស្គាល់ថា ក្រោមគម្រោងអភិវឌ្ឍន៍របស់ក្រុមហ៊ុននេះ គឺបានប៉ះពាល់ដីពលរដ្ឋមួយចំនួនមែន ប៉ុន្តែក្រុមហ៊ុនបានកាត់ឆ្វៀលជូនពលរដ្ឋអស់ហើយ ក្នុងនោះមានទាំងពលរដ្ឋខ្មែរ ជនជាតិដើមភាគតិច និងពលរដ្ឋខ្មែរឥស្លាម ជាដើម។
លោក ទូច បានចោទក្រុមពលរដ្ឋដែលកំពុងតវ៉ាសព្វថ្ងៃថា ជាក្រុមប្រឆាំងនិងជាអ្នកញុះញង់ឱ្យប្រជាពលរដ្ឋចូលទៅយកដីរបស់ក្រុមហ៊ុន ហើយថា ក្រុមហ៊ុនពុំដែលប្រើសន្តិសុខឱ្យបាញ់គំរាមកំហែងពលរដ្ឋដូចការចោទប្រកាន់ឡើយ។
លោកបន្ថែមថា៖ «អ្នកវិនិយោគ គេមកវិនិយោគ មានការអនុញ្ញាតពីរដ្ឋាភិបាល មាន ស.ជ.ណ ត្រឹមត្រូវ! ហើយឯងដើរមកក្រឡុកក្រឆាគេពេញហ្នឹងអ៊ីចឹង ដីកប់ខ្មោចដូនអីណា គេឈូសឆាយតាមច្បាប់ តាមផែនការមេគេ គេឈូសធ្វើផ្លូវ ហើយឥលូវមកនាំវាស់ដីក្រុមហ៊ុនចែកគ្នាអ៊ីចឹង មានច្បាប់ទម្លាប់មកពីណា! បើឱ្យក្រុមហ៊ុនទៅយកដីពួកនេះ គឺគ្មានទេ ចាំតាមដានមើលទៅ»។
ពាក់ព័ន្ឋករណីនេះ អភិបាលខេត្តក្រចេះ លោក វ៉ា ថន មានប្រសាសន៍ថា ដីកំពុងមានជម្លោះនោះជាដីរបស់ក្រុមហ៊ុនទទួលបានសិទ្ធិវិនិយោគពីរដ្ឋាភិបាលស្របតាមច្បាប់។ លោកថា ពលរដ្ឋដែលជម្លោះនិងតវ៉ានោះបានចូលទៅយកដីក្រុមហ៊ុនតាមការញុះញង់របស់មេខ្យល់ ដើម្បីយកដីលក់។
អភិបាលខេត្តរូបនេះបានព្រមានចាត់វិធានការផ្លូវច្បាប់ចំពោះមេខ្យល់ ដែលលោកថា បានញុះញង់ឱ្យប្រជាពលរដ្ឋចូលទៅចាប់យកដីរបស់ក្រុមហ៊ុនដោយខុសច្បាប់។
លោកបន្ថែមថា៖ «ចំពោះមេខ្យល់ យើងនឹងចាត់វិធានការវាតាមច្បាប់ ចំពោះប្រជាជនយើងនឹងទៅសួរនាំពួកគាត់ បើពួកគាត់ខ្វះដី យើងនឹងដោះស្រាយឱ្យតាមរយៈដីសម្បទានសង្គមកិច្ច ជូនទៅ កុំឱ្យតែគាត់ទៅធ្វើសេរី ឱ្យតែគាត់ខ្វះដីពិតមែន ខ្លាចតែគាត់ទៅចាប់យកលក់ឱ្យគេតើ»៕
