មន្ត្រីអនុរក្សនិងអ្នកជាប់ឃុំជិត២០នាក់នៅពន្ធនាគារខេត្តសៀមរាប បានឆ្លងជំងឺកូវីដ-១៩ ដែលករណីនេះ អាជ្ញាធរបានដាក់អ្នកពាក់ព័ន្ធឱ្យនៅដាច់ដោយឡែក ដើម្បីទប់ស្កាត់រលកចម្លងក្នុងពន្ធនាគារ។
អ្នកនាំពាក្យរដ្ឋបាលខេត្តសៀមរាប លោក លី សំរិទ្ធ ឱ្យដឹងនៅល្ងាចថ្ងៃទី០៦ ខែកក្កដា ថាអ្នកវិជ្ជមានកូវីដ-១៩ទាំងនោះ ត្រូវបានរកឃើញកាលពីថ្ងៃទី០៤ ខែកក្កដា ឆ្នាំ២០២១ ក្រោយពីរកឃើញថា ប្រធានពន្ធនាគារខេត្តនេះ លោក ភាន ឆវ័ន្ត វិជ្ជមានវីរុសនេះ កាលពីថ្ងៃសៅរ៍។
លោកឱ្យដឹងបន្ថែមថា អ្នកពាក់ព័ន្ធត្រូវបានដាក់ឱ្យនៅបន្ទប់ដាច់ដោយឡែកហើយ ដើម្បីតាមដានសុខភាពនិងបញ្ចៀសការឆ្លងរាលដាលទៅលើអ្នកជាប់ឃុំផ្សេងទៀត។
លោកថា៖ «មានមន្ត្រីអនុរក្ស៣នាក់ឆ្លង ហើយធ្វើតេស្តពីថ្ងៃទី៤ [កក្កដា] និងអ្នកជាប់ឃុំដូច១៥នាក់ឆ្លងដែរ ហ្នឹងហើយ! ប៉ុន្តែឥលូវដាក់ដាច់ដោយឡែកពីគ្នាហើយ»។
វីអូឌី មិនអាចសុំការបញ្ជាក់បន្ថែមពីអ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សវនា បានទេ នៅថ្ងៃនេះ។
នាយករងអង្គការឃ្លាំមើលសិទ្ធិមនុស្សលីកាដូ លោក អំ សំអាត មានប្រសាសន៍ថា ភាពចង្អៀតណែនក្នុងពន្ធនាគារជាកត្តាមួយដែលងាយឆ្លងនូវជំងឺកូវីដ-១៩។ ហើយបញ្ហានេះ ក្រុមអ្នកធ្វើការផ្នែកសិទ្ធិមនុស្សក្នុងស្រុកនិងអន្តរជាតិ ធ្លាប់បានជំរុញទៅស្ថាប័នរដ្ឋឱ្យពន្លឿនការដោះស្រាយ ប៉ុន្តែបែរជាស្ថាប័នរដ្ឋបានឆ្លើយតបមកវិញថា ពួកគេគ្រប់គ្រងស្ថានការណ៍នេះបានហើយ។
អ្នកឃ្លាំមើលសិទ្ធិមនុស្សរូបនេះរំឭកទៀតថា ស្ថាប័នរដ្ឋគួរតែដោះស្រាយភាពចង្អៀតណែនក្នុងពន្ធនាគារនេះឱ្យបានឆាប់ ដើម្បីទប់ស្កាត់កុំឱ្យមានហានិភ័យខ្ពស់ពីការវាយលុកនៃជំងឺជាសកលមួយនេះចូលក្នុងពន្ធនាគារ។
លោកថា៖ «វាអាចមានហានិភ័យខ្ពស់ចំពោះពន្ធនាគារហ្នឹង ដោយសារតែឥលូវហ្នឹងចាប់ផ្តើម[ឆ្លង]ជាបន្តបន្ទាប់ហើយ ពីពន្ធនាគារមួយទៅពន្ធនាគារមួយទៀត។ អ៊ីចឹងធ្វើម៉េចជំរុញវិធានការឬក៏មធ្យោបាយក្នុងការដោះលែង[អ្នកទោសដែលមានលក្ខខណ្ឌសមស្រប]នៅក្រៅឃុំហ្នឹង ឱ្យបានលឿន វាជាការល្អជាជាងវារីករាលដាលទៅហើយ បានយើងដោះស្រាយតាមក្រោយនោះ»។
អ្នកនាំពាក្យក្រសួងយុត្តិធម៌ លោក គឹម សន្តិភាព បានប្រាប់ វីអូឌី កាលពីថ្ងៃចន្ទថា វិធានការដោះលែងទណ្ឌិតដែលទទួលទោសជិតចប់តាមលក្ខខណ្ឌច្បាប់ ដើម្បីកាត់បន្ថយភាពចង្អៀតណែនក្នុងពន្ធនាគារ បានពិភាក្សាជាមួយក្រសួងមហាផ្ទៃចប់សព្វគ្រប់ហើយ ប៉ុន្តែនៅចាំការសម្រេចចុងក្រោយពីរដ្ឋមន្ត្រីក្រសួងយុត្តិធម៌។
គួរបញ្ជាក់ថា ជំងឺកូវីដ-១៩ បានឆ្លងទៅដល់អ្នកជាប់ឃុំមុនគេនៅពន្ធនាគារខេត្តព្រះសីហនុ កាលពីអំឡុងដើមខែឧសភា ឆ្នាំ២០២១។ បន្ទាប់មក ត្រូវបានរកឃើញឆ្លងចូលពន្ធនាគារខេត្តកណ្តាល ពន្ធនាគារព្រៃសម១និងម២ នៅរាជធានីភ្នំពេញ ពន្ធនាគារខេត្តកំពង់ស្ពឺ និងពន្ធនាគារខេត្តបន្ទាយមានជ័យ ក្នុងនោះ មានស្ត្រីម្នាក់អាយុ៦៦ឆ្នាំដែលជាអ្នកជាប់ឃុំនៅពន្ធនាគារខេត្តកំពង់ស្ពឺ បានស្លាប់ដោយសារជំងឺនេះ៕