មន្រ្តីនាំពាក្យគណបក្សគ្រប់គ្រងអំណាច បានហៅការរិះគន់របស់អតីតប្រធានស្តីទីគណបក្សប្រឆាំងមកលើស្ថាប័នព្រះមហាក្សត្រ និងតែងចោទប្រកាន់រដ្ឋាភិបាលថាជាអ្នកនៅពីក្រោយព្រះរាជា ថាជាមនុស្សអស់ផ្លូវដើរនិងតែលតោលក្នុងជីវិតនយោបាយនៅនាទីចុងក្រោយរបស់លោក។
លោក សុខ ឥសាន ជាសមាជិកព្រឹទ្ធសភា និងជាមន្រ្តីនាំពាក្យគណបក្សប្រជាជនកម្ពុជា ឱ្យដឹងថា រដ្ឋាភិបាលបានសម្រេចចិត្តមិនប្តឹងផ្តល់អ្វីប្រឆាំងលោក សម រង្ស៊ី ទៀតឡើយ ទោះលោក សម រង្ស៊ី និយាយធ្ងន់ឬស្រាលចំពោះអង្គព្រះមហាក្សត្រ។
លោកបន្តថា ការសម្រេចនេះមិនមែនជាការយោគយល់ឬខ្លាចរអាទេ ប៉ុន្តែដោយសារមើលឃើញថា អតីតមេបក្សជំទាស់រូបនេះមានវ័យកាន់តែចាស់ណាស់ទៅហើយ និងអាចនិយាយបានថា ទុកនាទីចុងក្រោយរបស់លោកដែលនៅសល់ពេលតិចតួចក្នុងការឡាំប៉ានៅលើទឹកដីនៃប្រទេសបារាំងទៅចុះ។
លោកបន្តថា៖ «អត់មានអីត្រូវឆ្ងល់ទេអារឿងហ្នឹង ព្រោះមនុស្សនេះមានដីកាចាប់ខ្លួនរួចទៅហើយ ឱ្យតែឃើញមុខ! ឥលូវនេះ នៅពួនស្រុកបារាំង ដោយសារដីកាមិនមានវិសាលភាពរហូតដល់ស្រុកបារាំង ហើយទៅចាប់នៅស្រុកបារាំង វាពិបាក។ អ៊ីចឹងទេ ទុកឱ្យនៅហ្នឹងទៅ ព្រោះមនុស្សហ្នឹងឥលូវនេះអាយុ៧៣[ឬ]៧៤ឆ្នាំហើយ ជិតដល់ម៉ោងហើយ»។
ការថ្លែងដូច្នេះរបស់លោក សុខ ឥសាន ធ្វើឡើងបន្ទាប់ពីអតីតប្រធានស្តីទីគណបក្សសង្រ្គោះជាតិ លោក សម រង្ស៊ី កាលពីថ្ងៃទី៥ ខែកក្កដា បានថ្លែងជាថ្មីទៀតថា លោកនាយករដ្ឋមន្រ្តី ហ៊ុន សែន មិនបានគោរពព្រះមហាក្សត្រដូចអ្វីដែលលោកអះអាងប្រាប់សាធារណជននោះទេ។ សារសំឡេងបែបជាការចោទសួរ ដែលត្រូវបានលោក សម រង្ស៊ី បង្ហោះនៅលើបណ្តាញសង្គមហ្វេសប៊ុករបស់លោក បញ្ជាក់ថា ព្រះអង្គមិនមានព្រះរាជសិទ្ធិអ្វីសូម្បីបន្តិច គឺទ្រង់សម្រេចព្រះរាជកិច្ចទៅតាមការចង់បានរបស់លោក ហ៊ុន សែន ប៉ុណ្ណោះ។
នេះមិនមែនជារឿងថ្មីឡើយសម្រាប់លោក សម រង្ស៊ី ដែលតែងចោទប្រកាន់រដ្ឋាភិបាលដឹកនាំដោយគណបក្សប្រជាជនកម្ពុជា ថាបានប្រើប្រាស់ឥទ្ធិពលគ្របដណ្តប់ទៅលើស្ថាប័នព្រះមហាក្សត្រ។ ដោយសារតែការប្រើវោហារសាស្រ្តនេះ លោក សម រង្ស៊ី ត្រូវជាប់បណ្តឹងនៅតុលាការជិត៥០សំណុំរឿងមកហើយ។
លោក សុខ ឥសាន លើកឡើងថា បើគិតពីទោសរបស់លោក សម រង្ស៊ី នេះ មិនក្រោម១០០ឆ្នាំទេ ទាំងមុននិងបច្ចុប្បន្នដែលត្រូវបានតុលាការផ្តន្ទាទោសដាក់ពន្ធនាគារ។
នៅថ្ងៃពុធនេះដែរ ព្រះអង្គម្ចាស់ស៊ីសុវត្ថិ ធម្មិកោ អតីតមន្រ្តីជាន់ខ្ពស់គណបក្សសង្រ្គោះជាតិ បានបញ្ចេញសារនយោបាយនៅលើទំព័រហ្វេសប៊ុករបស់ទ្រង់ថា ប្រសិនបើគណបក្សប្រជាជនកម្ពុជាមិនខ្លាចចាញ់ការបោះឆ្នោតទេ គួរណាស់តែមានដំណោះស្រាយផ្នែកនយោបាយជាយូរមកហើយ។
ចំណែកសាស្រ្តាចារ្យផ្នែកវិទ្យាសាស្រ្តនយោបាយ លោក ឯម សុវណ្ណរ៉ា ថ្លែងថា លោកមិនអាចកាត់អត្ថន័យយល់និងខ្លឹមសារពិតដែលលោក សម រង្ស៊ី រិះគន់ទៅលើអង្គព្រះមហាក្សត្រនេះទេ។ តែយ៉ាងណា លោកថា ជីវិតនយោបាយរបស់ លោក សម រង្ស៊ី នេះ មិនអាចត្រូវបញ្ចប់ត្រឹមការថ្លែងប៉ុន្មានម៉ាត់របស់អ្នកនយោបាយបានឡើយ ព្រោះស្ថានភាពនយោបាយមានការប្រែប្រួលនៅនាទីចុងក្រោយជានិច្ច។
លោកថា៖ «យើងមើលស្មានអត់ដឹងទេ! ជាទូទៅ យើងតែងសង្កេតឃើញនយោបាយតែងកើតឡើងផ្សេងៗ កើតឡើងរហូត។ អ៊ីចឹង ខ្ញុំគិតថា ថ្វីត្បិតលោក សម រង្ស៊ី អត្ថាធិប្បាយវាយប្រហារទៅអង្គព្រះមហាក្សត្រច្រើន ប៉ុន្តែខ្ញុំគិតថា អ្នកនយោបាយកម្ពុជាព្រមព្រៀងគ្នា ព្រោះជារឿងនយោបាយ»។
លោក ឯម សុវណ្ណរ៉ា យល់ឃើញថា ការសម្លាប់ជីវិតនយោបាយរបស់គណបក្សប្រឆាំងនៅមុនការបោះឆ្នោតជាតិមកដល់ក្នុងឆ្នាំ២០១៨នោះ មានរូបភាពមិនខុសគ្នាពីការបង្ក្រាបទៅលើគណបក្សរាជានិយម ហ្វ៊ុនស៊ិនប៉ិច តាមរយៈព្រឹត្តិការណ៍បង្ហូរឈាមនៅមុនឆ្នាំ១៩៩៨នោះទេ។
បើតាមលោក ឯម សុវណ្ណរ៉ា ភាពខុសគ្នានៃព្រឹត្តិការណ៍ទាំងពីរនេះនៅត្រង់ថា មួយធ្វើដោយស្របច្បាប់តាមរយៈអំណាចសាលដីកាតុលាការកំពូល និងមួយទៀតប្រើប្រាស់ហិង្សាក្នុងការបញ្ចប់ជីវិតនយោបាយរបស់ដៃគូប្រកួតប្រជែង។
យុទ្ធសាស្រ្តទាំងពីរនេះ លោកថា ប្រហែលគណបក្សកាន់អំណាចមើលឃើញរួចជាស្រេចទៅហើយពីលទ្ធភាពមិនអាចទៅរួចក្នុងការដណ្តើមកៅអីតាមរយៈសន្លឹកឆ្នោត និងម៉្យាងទៀតព្រួយបារម្ភការចាញ់ឆ្នោត និងដើម្បីការពារអំណាចរបស់ខ្លួនបន្តទៅទៀតផង។
លោក ឯម សុវណ្ណរ៉ា បន្ថែមទៀតថា ប្រសិនបើនៅពេលនោះ គណបក្សសង្រ្គោះជាតិ មិនត្រូវបានរំលាយទេ ប្រហែលជាបក្សប្រឆាំងនេះអាចនឹងឈានទៅដណ្តើមអាសនៈនៅក្នុងការបោះឆ្នោតជាតិឆ្នាំ២០១៨ ក៏ថាបាន។ តាមរយៈការបោះឆ្នោតឃុំ-សង្កាត់ ឆ្នាំ២០១៧ បក្សប្រឆាំងទទួលបានក្រុមប្រឹក្សាឃុំ-សង្កាត់ចំនួន៥ ០០៧អាសនៈ និងមេឃុំចៅ-សង្កាត់ចំនួន៤៩៧នាក់៕
