មន្ត្រីជាន់ខ្ពស់ក្រសួងសុខាភិបាល ឱ្យដឹងថា អ្នកជំងឺកូវីដ-១៩ម្នាក់ដែលបានយកកាំបិតចាក់ខ្លួនឯងអំឡុងពេលព្យាបាលជំងឺនោះ ដោយសារតែគាត់មានបញ្ហានៅក្នុងគ្រួសារ។
ក្នុងវីដេអូឃ្លីបមួយមានរយៈពេល៩វិនាទី ដែលចែកចាយលើបណ្ដាញសង្គមហ្វេសប៊ុក ឱ្យដឹងថា បុរសម្នាក់ដែលកំពុងសម្រាកព្យាបាលជំងឺកូវីដ-១៩ នៅមណ្ឌលព្យាបាលជំងឺស្តាតអូឡាំពិក បានយកកាំបិតចាក់លើខ្លួនឯង។ ជាមួយគ្នានេះ មានសំឡេងមួយបានលើកឡើងថា ការធ្វើអត្តឃាតរបស់បុរសរូបនោះ ដោយសារអស់សង្ឃឹមចំពោះជំងឺដែលកាន់តែធ្ងន់ធ្ងរ ស្របពេលឃើញអ្នកជំងឺកូវីដ-១៩ដែលស្នាក់នៅក្បែរគ្នានោះស្លាប់ជាបន្តបន្ទាប់។
តែយ៉ាងណា រដ្ឋលេខាធិការ និងជាអ្នកនាំពាក្យក្រសួងសុខាភិបាល លោកស្រី ឱ វណ្ណឌីន ប្រាប់ វីអូឌី នៅថ្ងៃពុធនេះថា បុរសម្នាក់ដែលយកកាំបិតចាក់ខ្លួនឯង អំឡុងពេលព្យាបាលជំងឺកូវីដ-១៩នោះ ដោយសារគាត់មានទំនាស់នៅក្នុងគ្រួសាររបស់គាត់។
លោកស្រីបន្តថា ក្នុងបរិបទនៃការឆ្លងជំងឺកូវីដ-១៩នេះ អ្នកជំងឺអាចមានបញ្ហាផ្លូវចិត្ត បើសិនជាមិនមានក្រុមគ្រួសារនិងមនុស្សជុំវិញខ្លួនលើកទឹកចិត្តនៅពេលដែលពួកគាត់កំពុងសម្រាកព្យាបាលជំងឺ បន្ថែមលើការផ្ដល់ប្រឹក្សាយោបល់ពីក្រុមគ្រូពេទ្យផងដែរ។
លោកស្រីថា៖ «យើងបានរៀបចំជាការប្រឹក្សា អប់រំអីអ៊ីចឹង ដើម្បីឱ្យអ្នកជំងឺគាត់ចេះប្រើប្រាស់អារម្មណ៍របស់គាត់អីហ្នឹងទៅ ឱ្យមានការគាំទ្រពីក្រុមគ្រួសារអ៊ីចឹង កុំឱ្យនៅតែលតោលតែឯង។ អាហ្នឹងមិនយូរមិនឆាប់ ផ្លូវចិត្តហើយ។ អ៊ីចឹងបានគេឧស្សាហ៍ឱ្យតេទាក់ទងបងប្អូនហ្នឹង ថ្វីត្បិតទៅមើលមិនកើតអីមែន តែតេទាក់ទងទៅ គាំទ្រទៅ នាំគាត់ជជែកគ្នាលេង ដើម្បីឱ្យអ្នកជំងឺមានភាពកក់ក្ដៅ។ យើងមានគ្រូពេទ្យផ្លូវចិត្តតើ»។
នៅពេលសួរពីស្ថានភាពអ្នកជំងឺដែលយកកាំបិតចាក់ខ្លួនឯងថាមានគ្រោះថ្នាក់ដល់អាយុជីវិតឬអត់នោះ លោកស្រី ឱ វណ្ណឌីន សុំមិនធ្វើអត្ថាធិប្បាយឡើយ ដោយរុញឱ្យទៅសួរអ្នកកាន់ការងារនោះផ្ទាល់ ខណៈអគ្គនាយកបច្ចេកទេសនៃក្រសួងសុខាភិបាល លោក ហុក គឹមចេង សុំមិនធ្វើអត្ថាធិប្បាយទេ ដោយថា ជាប់រវល់ប្រជុំ។
វីអូឌី មិនទាន់អាចស្វែងរកប្រភពពីក្រុមគ្រួសារអ្នកជំងឺកូវីដ-១៩ដែលចាក់ខ្លួនឯងនោះ ដើម្បីសុំបំភ្លឺពាក់ព័ន្ធនឹងរឿងនេះបាននៅឡើយទេ នៅថ្ងៃទី៧ ខែកក្កដា។
ចំណែកអ្នកជំងឺកូវីដ-១៩ម្នាក់ លោក សំ វេហា លើកឡើងថា នៅពេលដែលរូបគាត់ដឹងថាមានឆ្លងជំងឺនេះភ្លាម ធ្វើឱ្យគាត់មានការព្រួយបារម្ភជាខ្លាំង ទាំងបញ្ហាជីវភាពគ្រួសារនិងខ្លាចមានការរើសអើង។
លោកបន្តថា៖ «បើគ្មានការលើកទឹកចិត្តពីគ្រួសារ ខ្ញុំគិតថាឯកោដែរ! យើងឆ្លងជំងឺហ្នឹងហើយ គេមិនយកចិត្តទុកដាក់យើង គឺយើងឯកោដែរ ប៉ុន្តែក្រុមគ្រួសារគាត់បានជួយផ្ដល់យោបល់ឱ្យយើងច្រើន គាត់ឱ្យយើងប្រឹងលេបថ្នាំ ថែរក្សាសុខភាពខ្លួនឯងឱ្យល្អ ដើម្បីឆាប់ជាអ៊ីចឹង»។
ករណីនេះ ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង ជំរុញឱ្យក្រុមគ្រូពេទ្យយកចិត្តទុកដាក់បន្ថែមទៀតលើអ្នកជំងឺកូវីដ-១៩ ដោយថា ករណីនេះអាចនឹងធ្វើឱ្យប៉ះពាល់ដល់ប្រព័ន្ធសុខាភិបាលផងដែរ។
លោកថា៖ «ស្ថិតក្នុងស្ថានភាពលំបាកយ៉ាងណានេះ [អ្នកណា]ក៏ចង់រស់ដែរ! អ៊ីចឹងបញ្ហានេះ អាចជាការយកចិត្តទុកដាក់លើគាត់មិនបានគ្រប់គ្រាន់ ហើយគ្មានការយកចិត្តទុកដាក់ពីគ្រួសារផងដែរ។ ករណីនេះ ជាករណីតែមួយក៏ដោយ ប៉ុន្តែវាប៉ះពាល់ខ្លាំង វាមានទំហំប៉ះពាល់របស់វា ហើយវាអាចជះឥទ្ធិពលដល់ប្រព័ន្ធសុខាភិបាល។ អ៊ីចឹងធ្វើយ៉ាងណាគួរតែពិនិត្យឡើងវិញ គួរតែកែតម្រូវយ៉ាងម៉េច»។
បើតាមក្រសួងសុខាភិបាល គិតត្រឹមថ្ងៃទី០៧ ខែកក្កដា ឆ្នាំ២០២១នេះ កម្ពុជារកឃើញអ្នកឆ្លងជំងឺកូវីដ-១៩ សរុបចំនួន៥៧ ១០៣នាក់ ក្នុងនោះ អ្នកជំងឺព្យាបាលជាសះស្បើយសរុបចំនួន៤៨ ៩៧៤នាក់ អ្នកស្លាប់សរុប៧៩៨នាក់ និងករណីនាំចូលពីក្រៅប្រទេសសរុប៣ ៧៦០នាក់៕
