រដ្ឋាភិបាលបានជួលដីចំនួន៣កន្លែងដែលមានទំហំជិត១ ៦០០ហិកតា ស្ថិតនៅក្នុងស្រុកល្វាឯម និងស្រុកកៀនស្វាយ ខេត្តកណ្តាល ទៅឱ្យក្រុមហ៊ុន ឃុន សៀ ដើម្បីធ្វើការអភិវឌ្ឍរយៈពេល៥០ឆ្នាំ ក្រោមគម្រោងដីសម្បទានសេដ្ឋកិច្ច។
ក្នុងអនុក្រឹត្យចុះថ្ងៃទី១៧ ខែមករា ឆ្នាំ២០២០ រដ្ឋាភិបាលបានជួលផ្ទៃដីទំហំជាង១ ១៦១ហិកតាដែលជាដីបឹងវាលសំណាប ស្ថិតនៅឃុំព្រែកលួង ឃុំព្រែកតាកូវ ឃុំស្វាយជ្រុំ ស្ថិតនៅក្នុងស្រុកខ្សាច់កណ្ដាល ខេត្តកណ្ដាល ឱ្យទៅក្រុមហ៊ុន «ឃុន សៀ Import Export»។
ចំណែកអនុក្រឹត្យចុះថ្ងៃទី១៧ ខែធ្នូ ឆ្នាំ២០២០ ដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន បានសម្រេចជួលដីកោះមាស ទំហំជាង៣៤០ហិកតា ស្ថិតក្នុងភូមិសាស្ត្រខណ្ឌច្បារអំពៅ រាជធានីភ្នំពេញ ហើយជាប់ស្រុកល្វាឯម និងស្រុកកៀនស្វាយ ខេត្តកណ្តាល ឱ្យទៅក្រុមហ៊ុន «ឃុន សៀ Import Export» ដើម្បីធ្វើការអភិវឌ្ឍរយៈពេល៥០ឆ្នាំ ខណៈដីទំហំ៧០ហិកតាទៀតក៏ត្រូវបានរដ្ឋាភិបាលជួលឱ្យក្រុមហ៊ុននេះ សម្រាប់អភិវឌ្ឍជាតំបន់សេដ្ឋកិច្ចតាមដងទន្លេត្រើយខាងកើត ក្បែរគ្នាតំបន់អភិវឌ្ឍន៍កោះពេជ្រ។
ក្រោយពីទទួលបានដីសម្បទានទាំងនេះ ក្រុមហ៊ុន ឃុន សៀ បាននិងកំពុងធ្វើសកម្មភាពចាក់ខ្សាច់និងថ្មចូលទន្លេ ស្ថិតនៅត្រើយអរិយក្សត្រ នៃភូមិសាស្ត្រស្រុកល្វាឯម ខេត្តកណ្តាល។
វីអូឌី នៅមិនអាចសុំការបញ្ជាក់បន្ថែមពីលោក សេង ផេង តំណាងក្រុមហ៊ុន ឃុន សៀ បានទេ នៅថ្ងៃព្រហស្បតិ៍នេះ ដោយទូរសព្ទចូលជាច្រើនដងគ្មានអ្នកទទួល។
យ៉ាងណា រដ្ឋមន្ត្រីក្រសួងធនធានទឹក និងឧតុនិយម លោក លឹម គានហោ មានប្រសាសន៍ថា លោកបានទទួលព័ត៌មាន ពាក់ព័ន្ធនឹងរឿងនេះហើយ ប៉ុន្តែលោកសុំមិនធ្វើអត្ថាធិប្បាយ ដោយថា ករណីនេះមិនមែនជាសមត្ថកិច្ចរបស់លោកតែម្នាក់នោះទេ ទោះបីជាលោកមានក្តីបារម្ភចំពោះករណីចាក់ថ្មលុបចូលទន្លេនេះក៏ដោយ។
លោកថា៖ «បារម្ភវាចេះតែបារម្ភហើយ តែបារម្ភ ក៏មានអាជ្ញាធរដែនដីទីតាំងគ្រប់ជាន់ថ្នាក់ លោកបានគិតគូរ! បញ្ហាវាមិនមែនជារឿងរបស់ក្រសួងមួយឯណា របស់រាជរដ្ឋាភិបាលទាំងអស់ហ្នឹង ប្រទេសជាតិទាំងមូល។ អ៊ីចឹងអាជ្ញាធរដែនដីលោកបានគិតគូរមុនគេទាំងអស់ហ្នឹងយ៉ាងម៉េចៗនោះ»។
ប្រធានក្រុមអ្នកនាំពាក្យរាជរដ្ឋាភិបាល លោក ផៃ ស៊ីផាន មានប្រសាសន៍ថា ការជួលដីបឹងនិងដីកោះទៅឱ្យក្រុមហ៊ុនធ្វើការអភិវឌ្ឍនេះ គឺធ្វើឡើងស្របទៅតាមច្បាប់ ហើយការជួលឱ្យក្រុមហ៊ុន ឃុន សៀ នេះ រដ្ឋាភិបាលបានសិក្សាពីផលប៉ះពាល់រួចហើយដែរ។
លោកបន្តថា៖ «មុននឹងគេឱ្យ គេសិក្សាហើយពីផលប៉ះពាល់ និងទទួលផលបានប៉ុន្មាន សាច់រឿងហ្នឹងវាអ៊ីចឹង! ទិន្នន័យទទួលផលបានយ៉ាងម៉េចដែរ ហើយផលប៉ះពាល់យ៉ាងម៉េចដែរ។ ប៉ុន្តែយើងនិយាយពីផលប៉ះពាល់ វាអត់មានទេ ពីព្រោះវាតម្រូវទៅលើត្រីពងអី ពីព្រោះអាហ្នឹង វាគឺជាបឹង! ហើយយើងទុកបឹងហ្នឹងអាស្រ័យផលកសិករតូចតាចហ្នឹង តើវាបានផលច្រើនជាងសម្បទានសេដ្ឋកិច្ចឱ្យគេទេ? សម្បទានសេដ្ឋកិច្ចហ្នឹង លុយហ្នឹងវិលធ្លាក់ចូលទៅដល់កញ្ចប់ផែនការសម្រាប់ជួយទ្រទ្រង់ទៅដល់ជនងាយរងគ្រោះនិងជនក្រីក្រ»។
ប្រធានកម្មវិធីផ្នែកស្រាវជ្រាវ និងតស៊ូមតិរបស់សមាគមបណ្ដាញយុវជនកម្ពុជា លោក ហេង គឹមហុង សង្កេតឃើញថា រដ្ឋាភិបាលហាក់មានការលាក់បាំងមិនឱ្យប្រជាពលរដ្ឋដឹងព័ត៌មាន ពាក់ព័ន្ធនឹងការផ្ដល់ដីសម្បទានដល់ក្រុមហ៊ុនឯកជន ជាក់ស្ដែងដូចជាការផ្ដល់ដីសម្បទានដល់ក្រុមហ៊ុន ឃុន សៀ និងក្រុមហ៊ុនមួយចំនួនទៀតជាដើម។
លោកបង្ហាញការព្រួយបារម្ភពីការអភិវឌ្ឍដោយសងសំណង់នានាលើដងទន្លេ ដែលនាំឱ្យប៉ះពាល់ចរន្តទឹកហូរ ប៉ះពាល់ដល់មច្ឆជាតិ ខណៈរដ្ឋាភិបាលមិនបានបង្ហាញការវាយតម្លៃផលប៉ះពាល់បរិស្ថាននិងសង្គមជាសាធារណៈនោះឡើយ។
លោកថា៖ «ផ្នែកខាងក្រោមនៃទន្លេមេគង្គ ទាំងទន្លេក្រោម ទាំងទន្លេបាសាក់ហ្នឹង នៅតែបន្តមានការលុប ឬក៏ការបង្កើតកោះសិប្បនិមិត្តនៅក្នុងទន្លេធម្មជាតិ។ យើងមានការព្រួយបារម្ភ ក្រែងនៅរដូវទឹកឡើង វាអាចប៉ះពាល់ចរន្តលំហូរទឹកនៃផ្នែកខាងក្រោម ហើយយើងដឹងហើយ នៅទីក្រុងភ្នំពេញ នៅក្នុងតំបន់ទន្លេបួនមុខ។ ដូច្នេះ បើសិនជាមានប៉ះពាល់ទៅលើចរន្តទឹក តើអាចទេថាបង្កគ្រោះធម្មជាតិកើតឡើងក្នុងការជន់លិច។ ទី២ អាចប៉ះពាល់ដល់ប្រព័ន្ធអេកូឡូស៊ីដែលធ្លាប់តែមានលំនាំធ្វើចលនានៅក្នុងចរន្តនៃទន្លេមេគង្គ ទាំងប្រព័ន្ធមច្ឆជាតិ ទាំងប្រព័ន្ធទឹក និងការគ្រប់គ្រងជម្រៅទឹក»។
កាលពីខែឧសភា ឆ្នាំ២០២០ រដ្ឋមន្ត្រីក្រសួងធនធានទឹក លោក លឹម គានហោ បានចេញលិខិតមួយដោយព្រមានអំពីគ្រោះមហន្តរាយដោយសារទឹកជំនន់ ក្រោយពីក្រសួងមើលឃើញថា មានការចាក់ដីលុបនិងការសាងសង់បិទផ្លូវទឹកនានាជាបន្តបន្ទាប់។
បញ្ហានេះ លោកក៏បានជំរុញឱ្យអាជ្ញាធររាជធានី-ខេត្តទាំងអស់ត្រូវជួយទប់ស្កាត់ ដើម្បីកុំឱ្យមានការចាក់ដីលុបរំលោភ ចំណីមាត់ច្រាំងទន្លេ ស្ទឹង ព្រែក អូរ ប្រឡាយ អាងទឹក បឹងបួរ បន្តទៀត។ ប៉ុន្តែលិខិតព្រមានរបស់ក្រសួងនេះ ត្រូវបានគេមើលឃើញថា មិនមានប្រសិទ្ធភាពឡើយ ត្បិតការចាក់ដីលុបបិទផ្លូវទឹក ការរំលោភច្រាំងទន្លេ អូរ ប្រឡាយ និងបឹងធម្មជាតិនេះ នៅតែបន្តកើតមានឡើង៕