ក្រសួងសុខាភិបាលសម្រេចឱ្យវិស័យឯកជនប្រើប្រាស់ឧបករណ៍តេស្តរហ័សចាប់ពីពេលនេះទៅ ដើម្បីចូលរួមទប់ស្តាត់ជំងឺកូវីដ-១៩ ខណៈជំងឺនេះនៅតែបន្តឆ្លងទៅកាន់មនុស្សរាប់រយនាក់ក្នុងមួយថ្ងៃៗនៅឡើយ។
តាមសេចក្តីសម្រេច ចុះថ្ងៃទី៧ ខែកក្កដា ឆ្នាំ២០២១ ក្រសួងសុខាភិបាលបានលើកឡើងថា គ្រឹះស្ថានសុខាភិបាលឯកជន ស្ថាប័នរដ្ឋមិនមែនសុខាភិបាល អាជ្ញាធរច្រកទ្វារព្រំដែន ក្រុមហ៊ុនឯកជន រោងចក្រ សហគ្រាស និងទីកន្លែងអាជីវកម្មផ្សេងទៀត រួមទាំងបុគ្គលឯកជន អាចប្រើតេស្តរហ័សដើម្បីរកអង់ទីហ្សែនកូវីដ-១៩បាន ចាប់ពីថ្ងៃចុះហត្ថលេខានេះទៅ។
សេចក្តីសម្រេចដែលមានហត្ថលេខារដ្ឋមន្ត្រីក្រសួងសុខាភិបាល លោក ម៉ម ប៊ុនហេង នោះ បានបញ្ជាក់ថា ការអនុញ្ញាតនេះ ដើម្បីឱ្យវិស័យទាំងនោះបានរួមចំណែកនៅក្នុងការបង្ការ ទប់ស្កាត់ និងគ្រប់គ្រងការឆ្លងរាលដាលនៃជំងឺកូវីដ-១៩ ឱ្យកាន់តែមានប្រសិទ្ធភាពថែមទៀត។
កាលពីសប្តាហ៍មុន លោកនាយករដ្ឋមន្ត្រី ហ៊ុន សែន បានដាក់ចេញវិធានការមួយចំនួន ក្នុងនោះមានទាំងចេញបញ្ជាឱ្យវិស័យឯកជនអាចប្រើប្រាស់តេស្តរហ័សនេះបាន ដើម្បីរួមចំណែកក្នុងការទប់ស្កាត់រលកចម្លងឱ្យបានទាន់ពេល និងក៏ជាការកាត់បន្ថយបន្ទុកវិស័យសុខាភិបាលរបស់រដ្ឋផងដែរ។
ក្រៅពីនេះ លោកថា ការឆ្លងក្នុងសហគមន៍ពាក់ព័ន្ធព្រឹត្តិការណ៍២០កុម្ភៈ វាបានដើរដល់ចំណុចគួរឱ្យព្រួយបារម្ភ និងថាមេរោគបំប្លែងថ្មី (Delta) មានប្រភពពីប្រទេសឥណ្ឌា ដែលក្រសួងបានរកឃើញជាបន្តបន្ទាប់នាប៉ុន្មានសប្តាហ៍ចុងក្រោយនេះ អាចនឹងបង្កសោកនាដកម្មនៅកម្ពុជា បើអាជ្ញាធរពាក់ព័ន្ធទប់ស្កាត់មិនបាន។
ព្រឹត្តិការណ៍សហគមន៍២០កុម្ភៈ ប៉ុន្មានសប្តាហ៍ចុងក្រោយនេះ អត្រាអ្នកឆ្លងក្នុងមួយថ្ងៃៗមានជិត១ ០០០នាក់ ឬលើសពីនេះ ចំណែកអត្រាអ្នកស្លាប់វិញក៏មានចំនួនកើនឡើងដែរ។
គិតត្រឹមថ្ងៃទី០៧ ខែកក្កដា ឆ្នាំ២០២១ ក្រសួងសុខាភិបាលប្រកាសឱ្យដឹងថា មានអ្នកឆ្លងជំងឺកូវីដ-១៩ សរុបជិត៦ម៉ឺននាក់ (៥៧ ១០៣នាក់) អ្នកស្លាប់កើនដល់៧៩៨នាក់ ព្យាបាលជាសះស្បើយជិត៥ម៉ឺននាក់ (៤៨ ៩៧៤នាក់)៕