ប្រមុខរដ្ឋាភិបាលបញ្ជាក់ថា ក្រោយចុះបញ្ជីជាសម្បត្តិបេតិកភណ្ឌពិភពលោក ប្រាសាទសំបូរព្រៃគុក បានក្លាយជាតំបន់ទេសចរណ៍វប្បធម៌ប្រវត្តិសាស្រ្តដ៏ទាក់ទាញមួយ និងទទួលបានការគាំពារជាអន្តរជាតិ។
ការបញ្ជាក់នេះធ្វើឡើងចំថ្ងៃខួប៤ឆ្នាំ ដែលអង្គការយូណេស្កូ (UNESCO) បានដាក់បញ្ចូលតំបន់ប្រាសាទសំបូរព្រៃគុក ក្នុងបញ្ជីជាសម្បត្តិបេតិកភណ្ឌពិភពលោក កាលពីថ្ងៃទី៨ ខែកក្កដា ឆ្នាំ២០១៨ នៅទីក្រុងក្រាកូវ (Krakow) ប្រទេសប៉ូឡូញ។
លោកនាយករដ្ឋមន្ត្រី ហ៊ុន សែន បានសរសេរនៅលើទំព័រហ្វេសប៊ុករបស់លោកនៅថ្ងៃទី៨ ខែកក្កដា ឆ្នាំ២០២១នេះថា ការដាក់សម្បត្តិវប្បធម៌និងប្រាសាទបុរាណទាំងនេះ មិនត្រឹមតែទទួលបានការគាំពារជាអន្តរជាតិនោះទេ តែក៏បានជួយផ្សព្វផ្សាយសម្បត្តិវប្បធម៌និងប្រាសាទបុរាណរបស់ខែ្មរទៅកាន់ឆាកអន្តរជាតិផងដែរ។
លោកបន្តថា៖ «ក្រោយចុះបញ្ជីសម្បត្តិបេតិកភណ្ឌពិភពលោក ប្រាសាទសំបូរព្រៃគុក បានក្លាយជាតំបន់ទេសចរណ៍វប្បធម៌ប្រវត្តិសាស្រ្តដ៏ទាក់ទាញមួយផងដែរ។ សូមចូលរួមថែរក្សាការពារប្រាសាទបុរាណទាំងអស់នៅទូទាំងប្រទេសឱ្យបានគង់វង្ស ដើម្បីកូនចៅខ្មែរគ្រប់ៗជំនាន់»។
ប្រាសាទសំបូរព្រៃគុក មានទីតាំងស្ថិតនៅក្នុងភូមិសំបូរ ឃុំសំបូរ ស្រុកសំបូរ ខេត្តកំពង់ធំ។
បើតាមឯកសាររមណីយដ្ឋានប្រាសាទសំបូរព្រៃគុក នៃរដ្ឋបាលខេត្តកំពង់ធំ បានឱ្យដឹងថា ប្រាសាទសំបូរព្រៃគុក ភាគច្រើនកសាងឡើងដោយព្រះបាទឦសានវរ្ម័ន ដើម្បីឧទ្ទិសចំពោះព្រះសិវៈ។ ឯកសារដដែលបន្តថា ប្រាសាទទាំងនោះ សាងសង់ឡើងមានលក្ខណៈជាប្រាសាទទោល និងសង់ជាក្រុមក្នុងកំពែងតែមួយ និងប្លង់ប្រាសាទមានរាងបួនជ្រុង អមដោយគ្រឿងលម្អស្ថាបត្យកម្មមានក្បាច់ផ្តែ និងសរសេរជាពាក្យពេចន៍ ប្រអប់ទ្វារសុទ្ធសឹងធ្វើអំពីថ្មភក់ និងមានចម្លាក់លើកំបោរបាយអ ជាដើម។
ប្រភពដដែលបន្តថា គេបែងចែកក្រុមប្រាសាទទាំងនោះជាបីក្រុមធំៗខុសគ្នា ដូចជា ទី១. ក្រុមប្រាសាទខាងជើង (ក្រុមប្រាសាទសំបូរ) សាងឡើងនៅដើមស.វទី៧ (គ.ស៦១៦-៦៣៥) ដោយព្រះបាទឦសានវរ្ម័នទី១។ ទី២. ក្រុមប្រាសាទកណ្តាល ហៅថា ប្រាសាទតោ សាងឡើងក្នុងរជ្ជកាលរបស់ព្រះបាទជ័យវរ្ម័នទី២ ក្នុងស.វទី៩ និងទី៣. ក្រុមប្រាសាទខាងត្បូង ហៅថា នាគព័ន្ធ ឬយាយព័ន្ធ សាងឡើងដោយព្រះបាទឦសានវរ្ម័នទី១ ដើមស.វទី៧៕