មន្ត្រីរដ្ឋាភិបាលអះអាងថា កម្ពុជានឹងមានច្បាប់ថ្មីមួយដើម្បីលើកទឹកចិត្តអ្នកវិនិយោគទាំងជនជាតិខ្មែរនិងបរទេស ដោយផ្តល់ជម្រើស២យ៉ាង ក្នុងនោះមានទាំងផ្តល់ជម្រើសលើកលែងពន្ធលើប្រាក់ចំណូលរហូតដល់៩ឆ្នាំ។
ប្រធានក្រុមអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន បានឱ្យដឹងនៅលើទំព័រហ្វេសប៊ុករបស់លោកថា កិច្ចប្រជុំពេញអង្គគណៈរដ្ឋមន្រ្តី ក្រោមអធិបតីភាពនាយករដ្ឋមន្រ្តី នាថ្ងៃសុក្រនេះ បានពិភាក្សាលើសេចក្តីព្រាងច្បាប់ស្តីពីការវិនិយោគ។
លោកបន្តថា គោលបំណងនៃសេចក្តីព្រាងច្បាប់នេះ បង្កើតនូវក្របខណ្ឌគតិយុត្តិដែលបើកចំហ មានតម្លាភាព អាចប៉ាន់ប្រមាណទុកជាមុនបាន ប្រកបដោយភាពអំណោយផលសម្រាប់ការវិនិយោគ ដើម្បីទាក់ទាញនិងលើកកម្ពស់ការវិនិយោគដោយបុគ្គលសញ្ជាតិខ្មែរឬបរទេស ប្រកបដោយគុណភាព ប្រសិទ្ធភាព និងប្រសិទ្ធផល សំដៅអភិវឌ្ឍសង្គម- សេដ្ឋកិច្ចនៅក្នុងព្រះរាជាណាចក្រកម្ពុជា។
លោកបានគូសបញ្ជាក់ថា ចំពោះការលើកទឹកចិត្តដល់អ្នកវិនិយោគដែលរដ្ឋាភិបាលនឹងផ្តល់ជូននោះ រួមមាន៖ «ផ្តោតសំខាន់ទៅលើការលើកលែងពន្ធលើប្រាក់ចំណូល សម្រាប់រយៈពេលចាប់ពី៣ឆ្នាំ រហូតដល់៩ឆ្នាំ ទៅតាមវិស័យនិងសកម្មភាពវិនិយោគ គិតចាប់ពីពេលដែលទទួលបានប្រាក់ចំណូលលើកដំបូងនិងការលើកទឹកចិត្តផ្សេងទៀត និងជម្រើសទី២ គឺផ្តោតសំខាន់ទៅលើការទទួលបានសិទ្ធិកាត់កងចំណាយមូលធន តាមរយៈការរម្លស់ពិសេស និងសិទ្ធិកាត់កងរហូតដល់២០០ភាគរយលើចំណាយសំខាន់ៗផ្សេងទៀត សម្រាប់រយៈពេលរហូតដល់៩ឆ្នាំ»។
លោក ផៃ ស៊ីផាន បន្តទៀតថា ក្រៅពីនោះ រដ្ឋាភិបាលក៏មានការលើកទឹកចិត្តបន្ថែមដទៃទៀត ដូចជា ការលើកលែងពន្ធគយ អាករពិសេស និងអាករលើតម្លៃបន្ថែម ទៅលើសម្ភារសាងសង់បរិក្ខារសំណង់ សម្ភារបរិក្ខារផលិតកម្ម និងធាតុចូលផលិតកម្មរបស់ខ្លួនទៅតាមប្រភេទគម្រោងវិនិយោគនីមួយៗ។
ប្រធានមជ្ឈមណ្ឌលសម័ន្ធភាពការងារ និងសិទ្ធិមនុស្ស (សង់ត្រាល់) លោក មឿន តុលា យល់ថា ការធ្វើច្បាប់ដើម្បីទាក់ទាញអ្នកវិនិយោគជារឿងល្អ ប៉ុន្តែជម្រើសថ្មីនេះនឹងមិនជោគជ័យច្រើនទេ បើរដ្ឋាភិបាលមិនធ្វើឱ្យប្រសើរឡើងវិញពីការលើកកម្ពស់សិទ្ធិមនុស្សនិងប្រជាធិបតេយ្យនោះ ខណៈសហភាពអឺរុបបានធ្វើច្បាប់ដាក់លក្ខខណ្ឌមិនឱ្យក្រុមពួកគេទៅរកស៊ីឬបណ្តាក់ទុននៅក្នុងប្រទេសដែលមានការរំលោភសិទ្ធិមនុស្សរួចទៅហើយនោះ។
លោកថា៖ «បើសិនជាកម្ពុជាយើងនៅតែមានឈ្មោះនៅក្នុងរបាយការណ៍នៃការរំលោភសិទ្ធិមនុស្ស រំលោភគោលការណ៍ប្រជាធិបតេយ្យ សិទ្ធិការងារអីជាដើមហ្នឹង អាហ្នឹងក៏ជាហានិភ័យសម្រាប់អ្នកវិនិយោគស្ទាក់ស្ទើរក្នុងការមកវិនិយោគដែរ»។
លោកបានគូសបញ្ជាក់ថា ប្រទេសចិនមិនមែនជាប្រភពទីផ្សារធំសម្រាប់កម្ពុជានាំទំនិញទៅលក់ទេ តែជាប្រទេសមហាអំណាចប្រកួតទីផ្សារជាមួយកម្ពុជា។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណរ៉ា យល់ថា ច្បាប់ថ្មីនេះអាចទាក់ទាញបានតែអ្នកវិនិយោគនៅក្នុងស្រុកដែលមានស្រាប់ប៉ុណ្ណោះ។ លោកផ្តល់ជាយោបល់ថា ដើម្បីទាក់ទាញអ្នកវិនិយោគធំៗដែលអាចបោះទុនរយៈពេលយូរអង្វែងបាន លុះណាតែកម្ពុជាធ្វើកំណែទម្រង់ឱ្យចេញផុតពីប្រទេសឃ្លាំមើលការលាងលុយ និងស្តារទំនាក់ទំនងការទូតជាមួយបណ្តាប្រទេសលោកសេរី មានទាំងសហភាពអឺរ៉ុប និងសហរដ្ឋអាមេរិក ជាដើម។
លោកថា៖ «កាលណាបើយើងអត់បានបង្កើតប្រព័ន្ធតុលាការពាណិជ្ជកម្ម តុលាការរដ្ឋបាល ឬតុលាការការងារទេ ធ្វើឱ្យអ្នកវិនិយោគពិបាកនឹងទាក់ទាញ និងចាប់អារម្មណ៍មកវិនិយោគនៅកម្ពុជាដែរ ដោយសារតែត្រូវជំពាក់ជំពិនជាមួយតុលាការនៅកម្ពុជា ហើយប្រព័ន្ធយុត្តិធម៌នៅកម្ពុជាមិនទាន់បានកសាងជំនឿទុកចិត្តទៅដល់គ្រប់សមភាគីបានទេ»។
យ៉ាងណា រដ្ឋាភិបាលអះអាងថា នៅក្នុងស្ថានភាពវិបត្តិនៃជំងឺកូវីដ-១៩ដែលកំពុងញាំញីពិភពលោក រួមទាំងកម្ពុជាផង សេចក្តីព្រាងច្បាប់ស្តីពីវិនិយោគនេះពិតជាមានសារៈសំខាន់ខ្លាំងណាស់សម្រាប់ប្រទេសកម្ពុជា ដោយសារសេចក្តីព្រាងច្បាប់នេះនឹងធ្វើឱ្យកម្ពុជាកាន់តែមានភាពទាក់ទាញចំពោះការវិនិយោគផ្ទាល់ពីបរទេសនិងការវិនិយោគក្នុងស្រុក៕