នាយករដ្ឋមន្ត្រី រំលឹកទៅរដ្ឋបាលខេត្តនៅតាមព្រំដែន និងអនុគណៈកម្មការគ្រប់គ្រងច្រកទ្វារចេញ-ចូលប្រទេស ត្រូវពង្រឹងការធ្វើចត្តាឡីស័កចំពោះពលករ និងប្រជាពលរដ្ឋដែលឆ្លងដែនចូលកម្ពុជា ឱ្យបានម៉ត់ចត់ ដើម្បីទប់ស្កាត់ការឆ្លងរាលដាលជំងឺកូវីដ-១៩ បំប្លែងថ្មីចូលក្នុងសហគមន៍។
ការណែនាំនេះ បានធ្វើឡើងនៅក្នុងកិច្ចប្រជុំពេញអង្គគណៈរដ្ឋមន្ត្រី កាលពីថ្ងៃទី០៩ ខែកក្កដា ម្សិលមិញ។
សេចក្តីប្រកាសព័ត៌មាន របស់ទីស្តីការគណៈរដ្ឋមន្ត្រី បានស្រង់ប្រសាសន៍របស់លោកនាយករដ្ឋមន្ត្រី ហ៊ុន សែន ក្នុងកិច្ចប្រជុំនោះថា រដ្ឋាភិបាល នឹងបន្តទិញវ៉ាក់សាំងកូវីដ-១៩ និងបន្តការចាក់វ៉ាក់សាំងជូនពលរដ្ឋឱ្យបានតាមផែនការកំណត់ ព្រមទាំងពិចារណាចាក់វ៉ាក់សាំងជូនពលរដ្ឋដូសទី៣ និងក្រោមអាយុ ១៨ឆ្នាំបន្ថែមទៀត។
លោកនាយរដ្ឋមន្ត្រី បានបន្តថា៖ «រដ្ឋបាលខេត្តនៅតាមព្រំដែន និងអនុគណៈកម្មការគ្រប់គ្រងច្រកទ្វារចេញ-ចូលប្រទេស និងការធ្វើចត្តាឡីស័ក ត្រូវយកចិត្តទុកដាក់ពង្រឹងសមត្ថភាពការធ្វើចត្តាឡីស័កចំពោះពលករ និងប្រជាពលរដ្ឋដែលឆ្លងដែនចូលព្រះរាជាណាចក្រកម្ពុជា ឱ្យបានម៉ត់ចត់ ដើម្បីទប់ស្កាត់ការឆ្លងរាលដាលជំងឺកូវីដ-១៩ បំប្លែងថ្មី DELTA ដ៏កាចសាហាវ កុំឱ្យចូលមកក្នុងសហគមន៍»។
ក្រៅពីនោះ លោកក៏បានណែនាំដល់គ្រប់ក្រសួងស្ថាប័ន ត្រូវប្រើប្រាស់ឧបករណ៍តេស្តរហ័សដោយសន្សំសំចៃ និងប្រើថវិកាសសន្សំដើម្បីទិញឧបករណ៍នេះសម្រាប់ប្រើប្រាស់ក្នុងក្រសួងរបស់ខ្លួន។
បើតាមក្រសួងសុខាភិបាល គិតត្រឹមព្រឹកថ្ងៃទី០៩ ខែកក្កដា ឆ្នាំ២០២១នេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន ៥៩ ០៤៥នាក់ ក្នុងនោះអ្នកជំងឺព្យាបាលជាសះស្បើយសរុបចំនួន ៥០ ៩១៧នាក់ និងអ្នកស្លាប់សរុប ៨៥៥នាក់ ខណៈករណីនាំចូលពីក្រៅប្រទេសសរុបមាន ៤ ០៩៥នាក់៕
